LECCION 07
Cosa Clase de Dios si Jehova?
Cosa tu ta puede imagina si ta pensa tu acerca con Dios Jehova? Ta sinti ba tu que imposible kita queda cerca con ele? Ta pensa ba tu que un poderoso persona lang le que nuay emocion? Cosa ba gayot clase de Dios si Jehova? Por medio na de suyu Palabra, el Biblia, si Jehova ya dale mira el cuanto del de suyu maga calidad. Ta habla tambien le que interesao le contigo.
1. Porque kita gendeh ta puede mira con Dios?
“El Dios Espiritu.” (Juan 4:24) Nuay fisical cuerpo si Jehova. Ele amo un espiritu Persona quien ta queda na cielo, un lugar que gendeh kita ta puede mira.
2. Cosa el cuanto maga calidad de Jehova?
Gendeh kita ta puede mira con Jehova. Pero si conoce kita con ele, puede kita ama con ele cay ele un deverasan persona que tiene maga bonito calidad. El Biblia ta habla: “Si Jehova ta ama con el justicia y gendeh le abandona con el maga leal con ele.” (Salmo 37:28) Ele “bien lleno de compasion y lastima,” especialmente con aquellos quien ta sufri. (Santiago 5:11, El Nuevo Testamento) “Cerca si Jehova con aquellos quien dolorido el corazon; ta salva le con aquellos bien triste.” (Salmo 34:18) Y sabe ba tu que puede kita hace alegre o triste con Jehova? El un persona quien ta hace mal cosas ta hace con ele triste. (Salmo 78:40, 41) Pero el un persona quien ta hace buen cosas ta hace alegre con ele.—Le con el Proverbio 27:11.
3. Paquemodo si Jehova ta dale mira que ta ama le kanaton?
El de con todo bonito calidad de Jehova amo el amor. Gane, el Biblia ta habla que el Dios gendeh lang basta tiene amor sino “el Dios [mismo] amor.” (1 San Juan 4:8) Ta dale mira si Jehova de suyu amor, gendeh lang por medio na Biblia sino por medio tambien na cosas le ya crea. (Le con el Maga Actividad 14:17.) Por ejemplo, considera si paquemodo le ya crea kanaton. Ya dale le kanaton abilidad para mira maga bonito color, oi maga bonito cancion y saboria maga sabroso comida. Quierre le alegre el diaton vida.
APRENDE PA MAS
Sabe si cosa ta usa si Jehova para hace maga bonito cosas. Despues, mira si paquemodo ele ta dale mira el de suyu maga bonito calidad.
4. Sagrao espiritu—el activo fuerza del Dios
Igual si paquemodo kita ta usa con el diaton mano para hace trabajo, si Jehova ta usa con el de suyu sagrao espiritu. El Biblia ta dale mira que el sagrao espiritu gendeh un persona. Sino este amo un fuerza que ta usa el Dios para cumpli con el maga cosas. Le con el Lucas 11:13 y Maga Actividad 2:17, y despues, discuti con este maga pregunta:
-
El Dios hay “vacia” el de suyu sagrao espiritu con aquellos quien ta pidi con este. Entonces ta mira tu, el sagrao espiritu ba un persona o un activo fuerza del Dios? Porque tu se ya puede habla?
Si Jehova ta usa con el de suyu sagrao espiritu para hace maga bonito cosas. Le con el Salmo 33:6 y 2 Pedro 1:20, 21, y despues, discuti con este pregunta:
-
Na cosa maga manera si Jehova ya usa con el de suyu sagrao espiritu?
5. Si Jehova tiene maga bonito calidad
Si Moises leal ya sirvi con Dios por largo tiempo pero ta sinti le que necesita pa le mas conoce con el de suyu Creador. Poreso ya habla le con Dios: “Pabor manda sabe conmigo el de tuyu maga camino para puede yo conoce contigo.” (Exodo 33:13) Y ya habla si Jehova con Moises el cuanto del De Suyu maga calidad. Le con el Exodo 34:4-6 y despues, discuti con este maga pregunta:
-
Cosa maga calidad si Jehova ya menciona con Moises?
-
Cosa na maga calidad de Jehova el bien quierre tu?
6. Si Jehova ta ama con el maga gente
El maga siervo del Dios, el maga Hebreo, ya queda esclavo na Egipto. Cosa ya sinti si Jehova cuando ya sufri sila? Man play con el AUDIO o le con el Exodo 3:1-10. Despues, discuti con el maga pregunta.
-
Cosa este ta habla contigo acerca na cosa si Jehova ta sinti si ta sufri el maga gente?—Mira con el versiculo 7 y 8.
-
Para contigo, quierre ba gayot ayuda si Jehova con el maga gente y puede ba se ele hace? Porque?
7. El creacion ta dale mira el maga calidad de Jehova
Si Jehova ya dale mira de suyu maga calidad por medio na cosas le ya crea. Man play con el VIDEO. Despues, le con el Roma 1:20, NWT y discuti con el pregunta.
-
Cosa maga calidad de Jehova el ta puede tu mira na cosas le ya crea?
EL CUANTO TA HABLA: “El Dios gendeh un persona. Ele un fuerza lang que talli alrededor.”
-
Cosa tu puede habla?
-
Porque tu se ya puede habla?
SUMARIO
Si Jehova amo un espiritu Persona que tiene mucho maga bonito calidad, especialmente el amor.
Repaso
-
Porque kita gendeh ta puede mira con Jehova?
-
Cosa el sagrao espiritu?
-
Cosa el maga cuanto calidad de Jehova?
SABE PA MAS
Aprende pa mas acerca na cuatro importante calidad de Jehova.
“Cosa el Maga Calidad del Dios?” (The Watchtower Num. 1 2019)
Considera con el evidencia si porque gendeh deverasan que talli si Jehova na todo lugar y na todo cosas.
Mira si porque el Biblia ya refiri con el sagrao espiritu como mano del Dios.
El un bulak hombre tan dificil creé que ta ama con ele el Dios. Mira si cosa ya cambia con el de suyu pensamiento.
“Ta Sinti Yo que Puede Ya Yo Ayuda con Otro” (The Watchtower, Octubre 1, 2015)
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
