LEKSIYON 07
Unsang Matanga sa Persona si Jehova?
Kon maghunahuna ka bahin kang Jehova nga Diyos, unsay mosulod sa imong hunahuna? Makahunahuna ba ka nga dalayegon kaayo siya pero layo siya nimo, parehas sa mga bituon sa layo kaayong galaksiya? O maimadyin ba nimo nga gamhanan siya pero walay nindot nga mga hiyas, samag dalugdog ug kilat? Unsa man gyod si Jehova? Pinaagi sa iyang Pulong, ang Bibliya, gisulti ni Jehova ang iyang mga hiyas ug nga naghunahuna siya sa imong kaayohan.
1. Nganong dili nato makita ang Diyos?
“Ang Diyos maoy Espiritu.” (Juan 4:24) Si Jehova walay pisikal nga lawas. Siya Espiritu nga nagpuyo sa langit, usa ka lugar nga dili nato makita.
2. Unsa ang pipila sa mga hiyas ni Jehova?
Bisag dili makita si Jehova, tinuod siya nga Persona. Kon mailhan na nato siya, ato gyod siyang higugmaon tungod sa iyang nindot nga mga hiyas. Ang Bibliya nag-ingon: “Si Jehova nahigugma sa hustisya, ug dili niya biyaan ang mga maunongon kaniya.” (Salmo 37:28) Siya “mabination kaayo ug maluluy-on,” ilabina niadtong nag-antos. (Santiago 5:11) “Si Jehova duol niadtong mga dugmok ug kasingkasing; iyang luwason kadtong mga naluya ang buot.” (Salmo 34:18) Ug nahibalo ba ka nga naay epekto kang Jehova ang atong ginahimo? Ang tawo nga mipili sa pagbuhat ug dili maayo makapaguol kaniya. (Salmo 78:40, 41) Pero ang tawo nga naghimo sa kon unsay husto makapalipay kaniya.—Basaha ang Proverbio 27:11.
3. Giunsa pagpakita ni Jehova nga gimahal ta niya?
Ang pinakanindot nga hiyas ni Jehova mao ang gugma. Gani, “ang Diyos gugma.” (1 Juan 4:8) Gipakita ni Jehova ang iyang gugma, dili lang pinaagi sa Bibliya, kondili pinaagi sab sa mga butang nga iyang gihimo. (Basaha ang Buhat 14:17.) Pananglitan, matikdi kon giunsa ta niya paghimo. Gihatagan ta niyag katakos nga makakitag nindot nga mga kolor, makadungog ug nindot nga musika, ug makalasa ug lami nga pagkaon. Gusto niya nga mag-enjoy ta sa kinabuhi.
TUN-IG DUGANG
Sayra kon unsay gigamit ni Jehova sa paghimog katingalahang mga butang. Dayon sayra kon giunsa pagpakita ni Jehova kanato ang iyang nindot nga mga hiyas.
4. Balaang espiritu—aktibong puwersa, o gahom, sa Diyos
Sama nga kita naggamit sa atong mga kamot, si Jehova naggamit sa iyang balaang espiritu sa paghimo sa iyang mga buluhaton. Gipakita sa Bibliya nga ang balaang espiritu dili persona kondili puwersa nga gigamit sa Diyos. Basaha ang Lucas 11:13 ug Buhat 2:17, ug dayon hisgoti kini nga mga pangutana:
-
“Ibubo” sa Diyos ang iyang balaang espiritu niadtong mangayo niini. Busa sa imong hunahuna, ang balaang espiritu ba persona o aktibong puwersa sa Diyos? Nganong kanay imong tubag?
Gigamit ni Jehova ang iyang balaang espiritu sa paghimog katingalahang mga butang. Basaha ang Salmo 33:6 ug 2 Pedro 1:20, 21, ug dayon hisgoti kini nga pangutana:
-
Unsa ang pipila ka paagi nga gigamit ni Jehova ang iyang balaang espiritu?
5. Si Jehova nindot ug personalidad
Si Moises matinumanong alagad sa Diyos, pero gusto niyang mas mailhan pa ang iyang Maglalalang. Busa si Moises miingon kaniya: “Pahibaloa ko sa imong mga dalan, aron mailhan ti ka.” (Exodo 33:13) Ingong tubag, gisulti ni Jehova kang Moises ang pipila sa Iyang mga hiyas. Basaha ang Exodo 34:4-6, ug dayon hisgoti kini nga mga pangutana:
-
Unsa ang pipila sa mga hiyas ni Jehova nga iyang gisulti kang Moises?
-
Unsa nga hiyas ni Jehova ang ganahan kaayo nimo?
6. Gimahal ni Jehova ang mga tawo
Ang katawhan sa Diyos, ang mga Hebreohanon, naulipon sa Ehipto. Unsay gibati ni Jehova sa ilang pag-antos? I-play ang AUDIO ug sundi kini, o basaha ang Exodo 3:1-10. Dayon hisgoti ang mosunod nga mga pangutana:
-
Niini nga estorya, unsay imong nakat-onan sa pagbati ni Jehova bahin sa pag-antos sa tawo?—Tan-awa ang bersikulo 7 ug 8.
-
Sa imong hunahuna, gusto ba gyod ni Jehova nga tabangan ang mga tawo ug kaya ba na niyang himoon? Nganong nakaingon ka ana?
7. Ang mga hiyas ni Jehova makita diha sa kinaiyahan (nature)
Ang mga hiyas ni Jehova makita diha sa iyang mga linalang. I-play ang VIDEO. Dayon basaha ang Roma 1:20, ug hisgoti ang mosunod nga pangutana:
-
Unsang mga hiyas ni Jehova ang imong nakita sa mga butang nga iyang gihimo?
ANG UBAN MOINGON: “Ang Diyos dili persona, puwersa lang siya nga naa bisan asa.”
-
Unsay imong hunahuna?
-
Nganong kanay imong tubag?
SUMARYO
Si Jehova dili makita kay espiritu siya. Daghan siyag nindot nga hiyas, nga ang kinalabwan mao ang gugma.
Review
-
Nganong dili nato makita si Jehova?
-
Unsa ang balaang espiritu?
-
Unsa ang pipila sa mga hiyas ni Jehova?
SUSIHA
Tun-ig dugang ang upat ka pangunang hiyas ni Jehova.
“Unsay mga Hiyas sa Diyos?” (Ang Bantayanang Torre Num. 1 2019)
Sayra ang ebidensiya nga si Jehova dili presente sa tanang butang.
Sayra kon nganong sa Bibliya ang balaang espiritu gipakasamag kamot sa Diyos.
Ang usa ka buta wala mobati nga gimahal siya sa Diyos. Sayra kon unsay nakapausab sa iyang hunahuna.
“Gibati Nakong Makatabang na Ko sa Uban” (Ang Bantayanang Torre, Oktubre 1, 2015)
Basin Ganahan Pod Ka
KOMON NGA MGA PANGUTANA
Unsa ang Bible Study Program nga Gina-offer sa mga Saksi ni Jehova?
Sa libreng interactive program nga gina-offer sa mga Saksi ni Jehova, puwede nimong gamiton ang bisan unsang bersiyon sa Bibliya. Puwede nimong paapilon ang tibuok pamilya o mga amigo o amiga.
