LESEN 07

Jiowa, I Met Sókkun Kot?

PLAY

Met a ppiitá lón ekiekum atun ka ekieki usun Jiowa Kot? Ka meefi pwe a kon tekia sonuk, iwe ese tufich óm kopwe chiechi ngeni? Are ka ekieki pwe a fókkun manaman usun chék chopulap, me ese wor memmeef ren? Jiowa, i met sókkun Kot? Jiowa a pwári ekkóch me lein napanapan kewe lón an we Kapas ewe Paipel, me a pwal pwári pwe a chúnguk.

1. Pwata sise tongeni kúna Kot?

“Kot Ngün.” (Johannes 4:24) Jiowa ese usun inisich, inisin futuk. I emén Ngún mi nóm láng, eú leeni sise tongeni kúna.

2. Ikkefa ekkóch me lein napanapen Jiowa kewe?

Sise tongeni kúna Jiowa, nge atun sia sissileeló, sia tongei pokiten i wesewesen Emén mi eáni ekkewe napanap mi echipwér. Iei alon Paipel: “Ewe Samol mi Lapalap a efich mine a pwüng, esap likitala nöün kewe mi allükülük.” (Kölfel 37:28) A pwal “uren kirikiröch me tong,” nge ákkáeúin ngeni chókkewe mi kúna riáfféú. (James 5:11) “Ewe Samol mi Lapalap a kan ngeni chokewe mi luketatakis, a amanaua chokewe mi apilükingau.” (Kölfel 34:18) Ka silei pwe minne sia féri a tongeni eletipengawa Jiowa are apwapwaai i? Emén mi filatá le féri minne mi ngaw, a elichippúngú I me eletipengawa. (Kölfel 78:40, 41) Nge emén mi féri minne mi pwúng, a apwapwaai I.—Álleani Än Salomon Fos 27:11.

3. Ifa usun Jiowa a pwári pwe a tongekich?

Tong, ina napanapen Jiowa we mi fókkun aúchea lap seni meinisin. Ren enletin, ewe Paipel a apasa pwe Kot ese chék eáni ena napanap tong, nge fen i “Kot mi tong.” (1 Johannes 4:8, Testament mi Fö) Jiowa ese chék pwári an tong seni me lón ewe Paipel, nge a pwal pwári seni me lón ekkewe mettóch a fériiretá. (Álleani Föför 14:17.) Áwewe chék ren napanapen an férikichetá. A atufichikich le kúna lingéchún anúwen ekkewe mettóch, rong tikitikin nikáttik mi ekinamwe, me ach neni mwéngé mi anné. A mochen ach sipwe pwapwa lón manawach.

KÚTTAFICHI

Káé met Jiowa a áeá le féri ekkewe mettóch mi amwarar. Mwirin, ppii ifa usun a pwári ngenikich napanapan kewe mi echipwér.

4. Ewe ngún mi fel, ina án Kot we manaman

Jiowa a áeá an we ngún mi fel le angang usun chék ach áeá péúch le angang. Ewe Paipel a pwári ngenikich pwe ewe ngún mi fel esap emén kot, nge ina ewe manaman Kot a áeá le ataweei an angang. Föför 2:17, TF a erá: ‘Kot a apasa, pwe lon ekkewe sopolon ran, upwe niinatiu nguni won sokkun fituk meinisin.’ Álleani Lukas 11:13. Mwirin álleaan ekkena wokisin, pwóróusfengen wóón ekkeei kapas eis:

Kot epwe “niinatiu” an we ngún mi fel wóón chókkewe mi tingor. Iwe óm ekiek pwe ewe ngún mi fel i emén kot, are ina án Kot manaman? Pwata ka erá ena?

Jiowa a áeá an we ngún mi fel le féri ekkewe mettóch mi amwarar. Álleani Kölfel 104:30 me 2 Petrus 1:20, 21, me mwirin pwóróusfengen wóón ei kapas eis:

Ikkefa ekkóch mettóch Jiowa a féri ren an áeá an we ngún mi fel?

5. Jiowa a eáni ekkewe napanap mi echipwér

Moses a fen tuppwél ngeni Kot ren fite ier, nge a pwal mochen alapaaló an silei ewe Chón Fératá. Ina popun a ereni Jiowa: “Kopwe aiti ngeniei om akot pwe üpwe sileek.” (Ekistos 33:13) Jiowa a pélúweni Moses ren an ápwár ngeni ekkóch napanapan kewe. Álleani Ekistos 34:4-6, me mwirin pwóróusfengen wóón ekkeei kapas eis:

Ikkefa ekkóch napanapen Jiowa kewe a ápwár ngeni Moses?
Menni lein napanapen Jiowa kewe ka kon sani?

6. Jiowa a tongei aramas

Néún Kot kewe aramas, chón Ipru, ra slave lón Isip. Met meefien Jiowa atun néún kana aramas ra nóm lón riáfféú? Etiki ei PWÓRÓUS MI RECORD me fiti álleaan, are álleani Ekistos 3:1-10. Mwirin pwóróusfengen wóón ekkeei kapas eis.

PWÓRÓUS MI RECORD: Jiowa A Tongeer lón Ar Riáfféú (2:45)

Met ena pwóróus a áiti ngenikich usun meefien Jiowa ren án aramas nóm lón riáfféú?—Nengeni wokisin 7 me 8.
Óm lúkú nge Jiowa a fókkun mochen álisi aramas me a tufichin álisiir? Pwata ka erá ena?