CAWN DINGMI 07
Jehovah Cu Zei Bantuk Pathian Dah A Si?
Jehovah Pathian kong na ruah tikah na lung ah zeidah a chuak? Anih cu upat awk a tlak tukmi mi pakhat a si i lamhlapi ah a ummi vancung arfi bantukin nangmah he aa hlatnak ah a ummi a si tiah na ruat maw? Asiloah thlichia bantukin pumpak pakhat si loin a ṭhawng tukmi mi pakhat in dah na ruah? Jehovah cu zei bantuk Pathian dah a si taktak? Baibal ah Jehovah nih na cungah siaherhnak a ngeihnak kong i telin a sining cheukhat kong kha a langhter.
1. Pathian cu zeicah kan hmuh khawh lo?
“Pathian cu thlarau a si.” (Johan 4:24) Jehovah cu taksa pum a ngei lo. Anih cu Thlarau pum a si i kan hmuh khawh lonak vancung ah a um.
2. Jehovah i a sining cheukhat cu zei hna dah an si?
Jehovah cu kan hmu kho lo. Asinain a ṭha tukmi a sining a ngeimi a um taktakmi Pakhat a si ti kha kan hngalh tikah amah kha kan hun dawt. Baibal nih hitin a ti: “A hmaanmi thil kha BAWIPA nih a duh i zumhtlak a simi a mi kha a kaltak bal hna lo.” (Salm 37:28) A hleiin Jehovah cu sifah harnak a tongmi hna cungah “zaangfahnak le zawnruahnak in a khatmi” Pathian a si. (Jeim 5:11) “Lung a dongmi kha BAWIPA nih a umpi hna i ruahchannak a ngei lomi kha a khamh hna.” (Salm 34:18) Kan tuahsernak nih Jehovah a hnorsuan khawh ti kha na hngal maw? Cucaah mi pakhat nih a ṭhalomi thil a tuah tikah Jehovah cu a ngaih a chia tuk. (Salm 78:40, 41) Asinain a ṭhami thil a tuah tikah Jehovah cu aa lawm tuk.—Phungthlukbia 27:11 rel.
3. Jehovah nih a kan dawt kha zeitindah a langhter?
Jehovah i a lang bikmi a sining cu dawtnak a si. Cucaah Baibal nih “Pathian cu dawtnak a si” tiah a ti. (1 Johan 4:8) Jehovah nih Baibal lawngah si loin a sermi thil zongah dawtnak kha a langhter. (Lamkaltu 14:17 rel.) Tahchunhnak ah, a kan ser ning kong kha ruathmanh. Jehovah nih aa dawh tukmi rong hmuh khawhnak, aw dawh theih khawhnak le a thaw tukmi rawl a thawtnam theih khawhnak sining he a kan ser. Cun nuam tein nung hna seh ti zong a kan duh.
TAM DEUH IN HLATHLAI
Jehovah nih zei hmangin dah khuaruahhar thil a tuah ti kha hlathlai. Cun Jehovah nih duh a nung tukmi a sining hna a langhter ning kong zong kha hlathlai.
4. Thiang thlarau cu Pathian rianṭuan ṭhawnnak a si
Kan kut kha rianṭuannak ah kan hman bantukin Jehovah nih a thiang thlarau kha a hman ve. Baibal nih thiang thlarau cu mi pakhat si loin Pathian nih thil sernak ah a hmanmi ṭhawnnak a si tiah a ti. Luka 11:13 le Lamkaltu 2:17 rel law mah biahalnak hna hi i ruah u:
-
Pathian nih a thiang thlarau a halmi hna kha a pek hna lai. Cu a si ah thiang thlarau cu mi pakhat in maw na ruah asiloah Pathian rianṭuan ṭhawnnak in dah? Zeicah cutin na ruah?
Jehovah nih a thiang thlarau hmangin khuaruahhar thil hna kha a tuah. Salm 33:6 le 2 Peter 1:20, 21 rel law mah biahalnak hi i ruah u:
-
Jehovah nih a thiang thlarau hmangin zei thil hna dah a tuah?
5. Jehovah i duh a nungmi a sining hna
Moses cu Pathian cungah zumhfek tein a ummi a si ko nain Sertu kong kha tam deuh in hngalh a rak duh. Cucaah Moses nih Pathian kha hitin a ti: “Na lung kaan tlinter khawh nakhnga, naa tinhmi cu ka chim tuah.” (Exodus 33:13) Mah tikah Jehovah nih zei bantuk Pathian dah a si ti kha a rak chimh. Exodus 34:4-6 rel law mah biahalnak hna hi i ruah u:
-
Jehovah nih Moses sinah zei a sining kong hna dah a phuan?
-
Jehovah i zei a sining dah na duh bik?
6. Jehovah cu mi cungah zawnruahnak a ngei
Pathian miphun a simi Hebru mi pawl cu Izipt ram ah sal an rak tang. Sifah harnak an ton tikah Jehovah nih zeitindah a intuar? AWKHUMHMI kha chuah asiloah Exodus 3:1-10 rel. Cun mah biahalnak hna hi i ruah u.
-
Mah kong nih minung tonmi sifah harnak kong he aa tlaiin Jehovah intuar ning kha zeidah aan hngalhter?—Caang 7 le 8 ah zoh.
-
Jehovah nih mi pawl kha bawmh a duh taktak hna i bawmh zong a bawmh khawh hna tiah na ruat maw? Zeicah na ruah asiloah zeicah na ruah lo?
7. Sermi thil nih Jehovah sining an langhter
Jehovah nih a sermi thil in a sining kha a langhter. VIDEO kha piah. Cun Rom 1:20 rel law a tanglei biahalnak hi i ruah u.
-
A sermi thil ah Jehovah i zei a sining dah na hmuh?
MI CHEUKHAT CHIMMI: “Pathian cu mi pakhat a si lo, khoika hmun paohah a ummi ṭhawnnak pakhat a si.”
-
Nangtah zeitindah na ruah?
-
Zeicah cutin na ruah?
A TAWINAK
Jehovah cu hmuh khawh lomi Thlarau pum a si i duh a nung tukmi sining tampi a ngei, a hleiin dawtnak a si.
I Ruahṭi Ṭhannak
-
Jehovah cu zeicah kan hmuh khawh lo?
-
Thiang thlarau timi cu zeidah a si?
-
Jehovah sining cheukhat cu zei hna dah an si?
HLATHLAI CHAP
Jehovah i a lang bikmi a sining pali na hlathlainak thawngin a kong kha hngalhthiam deuh awkah i zuam.
“Zei Bantuk Pathian Dah A Si?” (2019, Vennak Innsang, No. 1)
Jehovah cu khoika hmun paohah a ummi a si lo ti a langhtermi kong hna kha hlathlai.
Baibal nih thiang thlarau kha Pathian kut in zeicah a langhter ti kha hlathlai.
A mit a cawmi pa pakhat nih Pathian nih a ka zohkhenh ti kha zumh awkah aa harh. Zeinihdah a lungput a thlenter ti kha hlathlai.
“Midang Kha Ka Bawmh Khawh Cang Hna” (Vennak Innsang capar)
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
