LESON 07
Ki mannyer Zeova i ete?
Ler ou mazin Zeova, kwa ki vin dan ou lespri? En gran personnaz me ki telman lwen parey bann zetwal? Oubyen petet ou mazinen ki i vreman for me i napa en personnalite, i zis en lafors? Ki mannyer Zeova i vreman ete? Labib i fer nou vwar ki Zeova i annan en personnalite. I osi montre ki i enterese avek ou.
1. Akoz nou pa kapab vwar Bondye?
“Bondye i en Lespri.” (Zan 4:24) Zeova napa en lekor fizik. I en Lespri ki reste dan lesyel, en landrwa ki nou pa kapab vwar.
2. Ki mannyer nou pou dekri personnalite Zeova?
I vre nou pa kapab vwar Zeova, me ler nou aprann konn li nou kontan li akoz i en personnaz reel ki annan bann zoli kalite. Labib i dir: “[Zeova] i kontan lazistis. I pa pou abandonn dimoun ki fidel.” (Psonm 37:28) I osi annan “en kantite konpasyon ek mizerikord,” sirtou anver dimoun ki pe soufer. (Zak 5:11) “Zeova i pros avek tou bann ki annan leker brize, i sov bann ki dekouraze.” (Psonm 34:18, NWT) Ou ti konnen sa ki nou fer i annan en lefe lo Zeova? I dezapwente ler i vwar en dimoun swazir pour fer sa ki mal e sa i fer li sagren. (Psonm 78:40, 41) Me i kontan ler i vwar en dimoun ki fer sa ki byen.—Lir Proverb 27:11.
3. Ki mannyer Zeova i montre ki i kontan nou?
Kalite pli remarkab dan Zeova i lanmour. Anfet, “Bondye i lanmour.” (1 Zan 4:8) Zeova i demontre son lanmour, pa zis atraver Labib me osi atraver bann keksoz ki i’n kree. (Lir Akt 14:17.) Par egzanp, gete ki mannyer i’n fer nou. I’n donn nou sa abilite pour vwar bann zoli kouler, ekout bann zoli lanmizik e gout bann manze ki vreman bon. I anvi ki nou lavi i gou.
AL PLI O PROFON
Aprann ki Zeova i servi pour fer bann keksoz enkrwayab. Apre, vwar ki mannyer Zeova i demontre son bann zoli kalite.
4. Lespri sen i lafors Bondye
Zis parey nou servi nou lanmen pour travay, Zeova li i servi son lespri sen. Labib i montre ki lespri sen pa en dimoun me i sa lafors ki Bondye i servi pour akonpli keksoz. Lir Lik 11:13 ek Akt 2:17 e apre reponn sa bann kestyon:
-
Nou kapab demann Bondye lespri sen e i pou donn nou. Alor, eski ou krwar lespri sen i en dimoun oubyen i lafors Bondye? Akoz ou dir sa?
Zeova i servi son lespri sen pour fer bann keksoz enkrwayab. Lir Psonm 33:6 ek 2 Pyer 1:20, 21 e apre reponn sa kestyon:
-
Ki diferan fason Zeova in servi son lespri sen?
5. Zeova i annan en zoli personnalite
Moiz ti en serviter fidel Bondye e i ti anvi konn son Kreater pli byen. Alor Moiz ti dir avek li: “Montre mwan ou semen, pour ki mon ava konn ou.” (Egzod 33:13) Pour reponn li, Zeova ti montre Moiz serten laspe dan son personnalite. Lir Egzod 34:4-6 e apre reponn sa bann kestyon:
-
Nonm serten laspe personnalite Zeova ki i ti montre Moiz?
-
Ki kalite dan Zeova ki ou pli kontan?
6. Zeova i enterese avek dimoun
Pep Bondye, bann Ebre, ti pe viv konman bann lesklav Lezip. Ki mannyer Zeova ti santi ler i ti vwar zot pe soufer? Zwe sa ODYO e swiv ansanm oubyen lir Egzod 3:1-10. Apre reponn sa bann kestyon.
-
Dapre sa resi, ki mannyer Zeova i santi ler i vwar bann imen pe soufer?—(Vwar verse 7 ek 8.)
-
Eski ou krwar Zeova i vreman anvi ed bann imen e i kapab fer li? Akoz ou krwar sa?
7. Bann keksoz ki Zeova in kree i fer nou konn son bann kalite
Zeova i fer nou konn son bann kalite atraver bann keksoz ki i’n kree. Zwe sa VIDEO. Apre lir Romen 1:20 e reponn sa kestyon.
-
Nonm serten kalite dan personnalite Zeova ki ou vwar dan bann keksoz ki i’n fer.
SERTEN DIMOUN I DIR: “Bondye pa en personnaz i zis en lafors, i partou kote.”
-
Ki ou panse?
-
Akoz ou dir sa?
REZIMEN
Zeova i en Lespri envizib. I annan bann zoli kalite, sirtou lanmour.
Revizyon
-
Akoz nou pa kapab vwar Zeova?
-
Kisisa lespri sen?
-
Ki serten kalite ki Zeova i annan?
FER PLIS RESERS
Konn pli byen Zeova par aprann lo son kat kalite prensipal.
Egzamin levidans ki Zeova i pa partou dan tou keksoz.
Vwar akoz Labib i refer avek lespri sen konman lanmen Bondye.
En msye ki pa vwar kler ti vwar li difisil pour krwar ki Bondye i enterese avek li. Aprann kwa ki ti fer li sanz son nide.
“Ozordi mon santi ki mon kapab ed lezot” (Latour Veyer Novanm–Desanm 2015)
You May Also Like
BANN KESTYON KI DIMOUN I SOUVAN DEMANDE LO TEMWEN ZEOVA
Ki sa letid Labib ki Temwen Zeova i ofer?
Ou kapab servi nenport tradiksyon Labib avek sa progranm Labib enteraktif gratwit ki Temwen Zeova i ofer. Santi ou alez pour envit ou fanmir antye oubyen nenport zanmi pour asiste ou letid.
