YI 07

¿Sãwũãchu Jeowara?

Bed’eabira

¿Sãwũãchu Jeowara?

Bʉa Jeowa ʉ̃rʉ krĩchabʉrʉdera. ¿Bʉa krĩchabʉka Jeowa jĩgabʉta akʉza yi zroma baera mia kʼaiba iyira orra be ẽãta? Mawũã ẽ bʉrʉ, ¿Bʉa krĩchabʉka iyi mejãcha zarea barabʉmina yãrãta zʉbʉria akʉ ẽãta? Mawũẽra wãrĩnubaira, ¿sãwũãchuba Jeowara? Jeowabara Daizeze Bedʼeadeba ũdubibʉ iyi sode nebia erbʉta akʉza bʉ mejãcha kãgabʉta.

1. ¿Kʼãrẽa ũduda ẽ Daizezera?

«Daizezera Jawurea» (Juan 4:24). Jeowara yarata akʉza bʉwʉrʉ barabʉ ẽ. Iyira jaure akʉza ʉ̃tʉ ewaradebʉ.

2. Ʉ̃kʉrʉ nebia Jeowa sodebʉta, ¿saʉ̃rape maʉ̃ra?

Jeowa dayirãba ũdu ẽ mina, iyi nebia sode erbʉta kʼawuabʉrʉde dayirãba mejãcha kʼãgabʉ. Daizeze Bedʼeaba jarabʉ: «Jeowabara kãga nekʼãrẽ aripe oita akʉza ẽbẽra iyiʉ̃me kʼẽrẽpabʉra idubʉ ẽ» (Salmo 37:28). Adewara Jeowaba «so borekea akʉbʉta akʉza so zʉbʉria akʉbʉta» mawũã akʉbʉ audre ẽbẽrarã mejãcha zʉbʉriabʉrata (Santiago 5:11). «Jeowarabʉ yi jipa sopʉapanʉra kʼawa; kʼarebabʉ yi jipa kʼãrẽ ẽ kĩrãkʼa krĩchapanʉrãra» (Salmo 34:18). ¿Bʉa kʼawuabasika dayirãba obʉdeba Jeowaʼa sopʉabiseabʉta mawũã ẽ bʉrʉ sobiabiseabʉta? Ẽbẽraba jidara nekayirua oita naʉ̃ba mejãcha sopʉabibare Jeowata (Salmo 78:40, 41). Mamina ẽbẽraba jidara nebia oita naʉ̃ba mejãcha sobiabibare Jeowata (akʉra Proverbios 27:11).

3. ¿Sãwũã ũdubibʉ Jeowabara dayirã kãgata?

Nekʼãrẽ bia Jeowa sodebʉra kãga. «Daizezera kãga baera» (1 Juan 4:8). Jeowabara dayirã kãgata ũdubibʉ Daizeze Bedʼea dayirã diadadeba akʉza nekʼãrẽ jõmabʉ parãnaneba (akʉra Hechos 14:17). Krĩchara Jeowaba dayirã sãwũã parãnata. Dayirãbara nekʼãrẽ kĩrãtana akʉseabʉ, trãbirata ũrĩseabʉ akʉza yiko warrata koseabʉ. Jeowaba kãgabʉ dayirã sobiapanamarẽã.

AUDRE BIʼIA KʼAWUADADRɄ

Kʼawuadaya kʼãrẽta zokʼabʉta Jeowaba nekʼãrẽ oita. Akʉza kʼawuadayi sãwũã Jeowaba ũdubibʉta nebia iyi sode erbʉta.

4. Daizeze jaure zarea

Dayirãbara zokʼabʉ juwata nekʼãrẽ oita, abarika Jeowabida zokʼabʉ iyi jaure zareata nekʼãrẽ oita. Daizeze Bedʼeabara jarabʉ jaure zareara yi zromata nekʼãrẽ baduira akʉza Jeowaba zokʼabʉta nekʼãrẽ jõma oita, mamina ʉ̃kʉrʉ ẽbẽraba krĩchapanʉ Daizeze jaure zareara ẽbẽrata. Akʉra Lucas 11:13, mõbe naʉ̃ta panʉidua:

Jeowaʼa iyi jaure zareata wididara iya dayirãʼa diayi. Mawũẽra Daizeze jaure zareata ẽbẽra ẽ bʉrʉ, ¿kʼãrẽ Daizeze jaure zareara? ¿Kʼãrẽa mawũã krĩchabʉ?

Jeowabara zokʼabʉ iyi jaure zareata nekʼãrẽ bia mejãcha okʉaita. Akʉra Salmo 33:6; akʉza 2 Pedro 1:20, 21, mõbe naʉ̃ta panʉidua:

¿Sãwũã zokʼabʉ Jeowabara iyi jaure zareara?

5. Jeowabara nekʼãrẽ biata iyi sode erbʉ dayirãba kãgata

Moisésʼra kʼẽrẽpabasi Daizezeʉ̃me, mamina iya audre ũdu kʼawuakĩrãbasi iyi parãnata. Maʉ̃ kʼarea Moisésba jarasi: «Jaradiara bʉ ota mʉ̃a bʉ audre bia ũdu kʼawuaita» (Éxodo 33:13). Jeowabara panʉsi Moisés bedʼeara iyi sode nebia erbʉta jaradiaside. Akʉra Éxodo 34:4-6, mõbe naʉ̃ta panʉidua:

¿Saʉ̃ Jeowaba iyi sode nebia erbʉta Moisésʼa jaradara?
¿Jeowaba iyi sode nebia erbʉdebemara bʉara saʉ̃ta audre kãga?

6. Jeowabara kãga ẽbẽrarã

Ebreorãra, Daizeze pʉwʉrʉbasi, maʉ̃rata Egipto nezokʼarabasi. Mamina, ¿Jeowara sãwũã sentibasi iyi pʉwʉrʉ zʉbʉrianʉmʉ akʉbasidera? Ũrĩseabʉ yi AUDIOTA akʉza leseabʉ Éxodo 3:1-10. Mõbe naʉ̃ta panʉidua:

AUDIO: Jeowara sopʉabasi iyi pʉwʉrʉ zʉbʉriabaside (2:45)

¿Kʼãrẽta jaradiabʉ naʉ̃ audioba Jeowaba ẽbẽra zʉbʉrianʉmʉ akʉbʉ ʉ̃rʉra? (Akʉra nejʉacha zake 7 akʉza 8).
Bʉmara, ¿Jeowabara wãrĩnu kʼarebakĩrãbʉka ẽbẽrarã? ¿Iyira zarea barabʉka kʼarebaita? ¿Bʉa kʼãrẽa mawũã krĩchabʉ?