JOKWA 07

Ne̱ni Yehova eno̱ e?

OKA

O mo̱nge̱le̱ ná Yehova Loba e nde ne̱ni e? Mo̱ o mo̱nge̱le̱ nde ná asame̱ kańena o titino̱ ná o sisea mo̱ be̱be̱, kapo̱ ka ngengeti yena i po̱ti e? Nga o mo̱nge̱le̱ ná e nde ngińa ba si me̱ne̱no̱ kapo̱ ka mùdi munde̱ne̱ e? Ne̱ni Yehova eno̱ na mbale̱ e? Bibe̱l e malangwa njika bede̱mo Yehova a be̱nno̱; e malangwa pe̱ ná a mombwea wa.

1. Ońola nje di titino̱ ná je̱ne̱ Loba e?

“Loba e nde Mudī.” (Yohane 4:24) Yehova a si be̱n ńolo ka wa na mba. E nde Mudī, a maja pe̱ nde o mo̱ń, wuma di titino̱ ná je̱ne̱.

2. Njika bede̱mo bō̱ Yehova a be̱nno̱ e?

To̱ná di titino̱ ná je̱ne̱ Yehova, a be̱n bede̱mo be mabole̱ ná ba bena ba bi mo̱ ba to̱nde mo̱. Bibe̱l e makwala ná: “Yehova a to̱ndi ka ni te̱m, a si mese̱le̱ basangedi bao.” (Myenge 37:28) E mabata pe̱ ná “a londi na bwam, a be̱n pe̱ na mulema ma ndedi,” tobotobo ońola bato ba matake̱. (Yakobo 5:11) “Yehova a bakam na babe̱ne̱ milema mi ńo̱sedi, a mongwane̱ babe̱ne̱ mudī mu sibi.” (Myenge 34:19) Mo̱ o ta o bia ná bedangwedi basu be ná be tapa Yehova e? Moto a po̱si te̱ o bola mambo ma bobe nik’e mabwese̱ mo̱ ndutu. (Myenge 78:40, 41) Nde moto a po̱si te̱ o bola bwam, nik’e mabwese̱ mo̱ muńe̱nge̱.—Langa Minia 27:11.

3. Ne̱ni Yehova a malee̱le̱no̱ ná a to̱ndi biso̱ e?

Ede̱mo a boso ya Yehova ye nde ndolo. “Loba e nde ndolo.” (1 Yohane 4:8) Yehova a malee̱le̱ ndol’ao tongwea na Bibe̱l name̱ne̱ pe̱ na mambo a wekino̱. (Langa Bebolo 14:17.) Jombwe k’eyembilan mbadi a wekino̱ biso̱. A boli ná di be̱ ńai ni dongame̱n o je̱ne̱ miso̱no̱ ma mpesa, senga musiki ma bwam na bwane̱ pe̱ da la bwam muńe̱nge̱. A mapula ná di bwane̱ longe̱ muńe̱nge̱.

ALA O NJIBA

Okwa bia nje Yehova a mabolane̱no̱ o bola mambo ma betańsedi. Nde we̱ne̱ pe̱ ne̱ni Yehova a malee̱le̱no̱ bede̱mo bao be mabwesane̱ muńe̱nge̱.

4. Mudī musangi mwe nde ngińa Loba a mabolane̱no̱

Ka nje te̱ di mabolane̱no̱ mā masu o bola mambo, nika pe̱ nde Yehova a mabolane̱no̱ mudī mao musangi. Bibe̱l e malee̱ ná mudī musangi mu titi moto, mwe nde ngińa Loba a mabolane̱no̱ o bola mambo. Langa Lukas 11:13 na Bebolo 2:17, nde lo kwaleye pe̱ ońola min myuedi:

Loba a me̱nde̱ “koma” mudī mao musangi omo̱ń a ba ba mabaise̱ mo̱ mu mudī. O mo̱nge̱le̱ so̱ ná mudī musangi mwe nde moto nga mwe nde ngińa Loba a mabolane̱no̱ e? Ońola nje pe̱ o makwalano̱ nika e?

Yehova a mabolane̱ mudī mao musangi o bola mambo ma betańsedi. Langa Myenge 33:6 na 2 Petro 1:20, 21, nde lo kwaleye pe̱ ońola min myuedi:

Njika mambo mō̱ Yehova a bolino̱ tongwea na mudī mao musangi e?

5. Yehova a be̱n bede̱mo be mabwesane̱ muńe̱nge̱

Mose a ta nde muboled’a Loba ńa jemea, nde a ta a pula bata bia Muweked’ao. Mose a kwalane̱ so̱ mo̱ ná: “Lee̱le̱ mba mangea mo̱ngo̱ ná na bie wa.” (Bebusedi 33:13) Na Yehova a bīse̱ so̱ mo̱ bede̱mo bao bō̱. Langa Bebusedi 34:4-6, nde lo kwaleye pe̱ ońola min myuedi:

Njika bede̱mo bao bō̱ Yehova a bīse̱no̱ Mose e?
Njika bede̱mo ba Yehova be mabwese̱ wa muńe̱nge̱ jita e?

6. Yehova a mombwea bato

Bonahebe̱r bena ba ta nde tumba la Loba, ba ta bakom o Egipto. Ne̱ni Yehova a tano̱ a senga ponda ba tano̱ ba taka e? We̱le̱ BOSENGA nde o mulemlem ma ponda pe̱ o lange Bebusedi 3:1-10. Ombusa nika kwalea ońola myuedi mi mabupe̱.

BOSENGA: Yehova a ta a bwa ndutu ońola taka labu (2:45)

Nje min myango mi malee̱no̱ wa jombwea ne̱ni Yehova a masengano̱ ke̱ bato ba mataka e?—Ombwa myemba 7 na 8.
Mo̱ o mo̱nge̱le̱ ná Yehova a mapula jongwane̱ bato na mbale̱ na ná e pe̱ ná a bola nika e? Ońola nje o makwalano̱ nika e?

7. Mambo Yehova a wekino̱ ma mabonde̱ bede̱mo bao

Yehova a malee̱ biso̱ bede̱mo bao tongwea na mambo a wekino̱. Ombwa SINIMA. Denge̱ langa Roma 1:20, nde lo kwaleye pe̱ ońola myuedi mi mabupe̱.