ADZESUA 07
Jehovah Tse Dɛn?
Isusu dɛ Jehovah Nyankopɔn tse dɛn? Aso ihu no dɛ ɔnwanwanyi bi a noho yɛ hu naaso ɔmmbɛn wo, tse dɛ nworaba bi a ɔwɔ nworabakuw bi mu wɔ ekyirkyir beebi koraa? Anaa ihu no dɛ ɔyɛ obi a ɔwɔ tum naaso onnyi nyimpasu biara, tse dɛ asenaman bi a ɔrepaapae? Jehovah tse dɛn ankasa? Jehovah ada no su ahorow bi edzi wɔ n’Asɛm Bible no mu, na ɔasan so ada no edzi wɔ Bible no mu dɛ ɔdwen woho.
1. Ebɛnadze ntsi na yennhu Nyankopɔn?
“Nyankopɔn yɛ Sunsum.” (John 4:24) Jehovah nnyi honandua dɛ hɛn. Ɔyɛ Sunsum na ɔtse sor, beebi a yerunntum mmfa hɛn enyi nnhu.
2. Jehovah no su ahorow no bi nye dɛn?
Ɔwɔ mu dɛ yerunntum mmfa hɛn enyiwa nnhu Jehovah dze, naaso sɛ yɛfa no nyɛnko a, yebohu dɛ ɔyɛ Obi a ɔwɔ hɔ ankasa, na ɔwɔ suban ahorow bi so a ɔyɛ fɛw. Bible no ka dɛ: ‘Jehovah dɔ atsɛmbu, na ɔmmpa n’anokwafo.’ (Ndwom 37:28) Ɔsan so “yɛ tsimbɔbɔr nye ehumbɔbɔr” papaapa, nkanka ma hɔn a wɔrefa ɔhaw mu. (James 5:11) “[Jehovah] bɛn hɔn a hɔn akoma abobɔ, na ɔgye hɔn a hɔn sunsum abotow no nkwa.” (Ndwom 34:18) Bio so, ana inyim dɛ mbrɛ yesi yɛ hɛn adze no ka Jehovah a? Sɛ obi yɛ ndzeyɛɛ bɔn a, ɔma Jehovah dzi yaw na no werɛ how. (Ndwom 78:40, 41) Naaso obi a ɔyɛ adze a ɔtsen no ma n’enyi gye.—Kenkan Mbɛbusɛm 27:11.
3. Ebɛn kwan do na Jehovah akyerɛ dɛ ɔdɔ hɛn?
Jehovah no su a ɔda nsew nye ɔdɔ. Nokwasɛm nye dɛ, “Nyankopɔn nye dɔ.” (1 John 4:8) Jehovah nam Bible no nye ndzɛmba ahorow a ɔabɔ no do da no dɔ edzi. (Kenkan Asomafo Ndwuma 14:17.) Dɛ mfatoho no, susu kwan a ɔfaa do bɔɔ hɛn no ho hwɛ. Ɔbɔɔ hɛn wɔ kwan bi do a ɔma yetum hu kɔla ahorow a ɔyɛ fɛw, yɛtse ndwom a ɔyɛ dɛw, na yetum tse edziban ne dɛw. Ɔpɛ dɛ hɛn enyi gye wɔ asetsena mu.
PƐNSAPƐNSA MU KƆ EKYIR
Ma yensua mbrɛ Jehovah yɛ ndzɛmba ahorow a ɔyɛ nwanwa no ho adze, na yɛnhwɛ mbrɛ Jehovah da no su ahorow a ɔyɛ fɛw no edzi kyerɛ hɛn.
4. Sunsum krɔnkrɔn no yɛ Nyankopɔn no tum a ɔdze yɛ adze
Dɛ mbrɛ yɛdze hɛn nsa yɛ ndwuma ahorow no, dɛmara so na Jehovah dze no sunsum krɔnkrɔn no yɛ adze. Bible no ma yehu dɛ sunsum krɔnkrɔn no nnyɛ obi a ɔwɔ hɔ ankasa, mbom no ɔyɛ tum a Nyankopɔn dze yɛ ne ndzɛmba. Ma yɛnkenkan Luke 11:13 nye Asomafo Ndwuma 2:17, na yensusu nsɛmbisa yi ho:
-
Nyankopɔn se ‘obohue’ no sunsum krɔnkrɔn egu hɔn a wobisa no do. Ntsi ehwɛ a sunsum krɔnkrɔn no yɛ obi a ɔwɔ hɔ ankasa, anaa ɔyɛ tum a Nyankopɔn dze yɛ adze? Ebɛnadze ntsi na ereka dɛm?
Jehovah dze no sunsum krɔnkrɔn no yɛ ndzɛmba ahorow pii a ɔyɛ nwanwa. Ma yɛnkenkan Ndwom 33:6 nye 2 Peter 1:20, 21, na yensusu dɛm asɛmbisa yi ho:
-
Ebɛn ndzɛmba na Jehovah dze no sunsum krɔnkrɔn no ayɛ?
5. Jehovah wɔ su ahorow bi a ɔyɛ fɛw
Nna Moses dze nokwardzi asom Nyankopɔn mfe pii, naaso nna ɔtse nka dɛ ɔwɔ dɛ ohu no Bɔfo no yie. Ntsi Moses kaa kyerɛɛ Nyankopɔn dɛ: “Kyerɛ me w’akwan, ama meehu wo.” (Exodus 33:13) Ntsi, Jehovah kaa no su ahorow no bi ho asɛm kyerɛɛ Moses. Ma yɛnkenkan Exodus 34:4-6, na yensusu nsɛmbisa yi ho:
-
Su ahorow a Jehovah wɔ no, no mu hendze na ɔdaa no edzi kyerɛɛ Moses?
-
Su ahorow a Jehovah wɔ no, no mu hendze na w’enyi gye ho papaapa?
6. Jehovah dwen nyimpa ho
Nna Hebrewfo no yɛ Nyankopɔn no nkorɔfo a wɔyɛ nkowaa wɔ Egypt. Aber a nna wɔretseetsee no, Jehovah tsee nka dɛn? Ma yentsie AUDIO no anaa ma yɛnkenkan Exodus 3:1-10. Afei ma yensusu nsɛmbisa a odzidzi do no ho.
-
Sɛ ehwɛ asɛm yi a, ebɛnadze na ɔma ihu fa mbrɛ Jehovah tse nka wɔ ɔhaw a adasamba refa mu no ho?—Hwɛ nyiyimu 7 na 8.
-
Ehwɛ a, Jehovah wɔ ɔpɛ ankasa dɛ ɔbɔboa adasamba, na obotum aboa hɔn anaa? Ebɛnadze ntsi na ereka dɛm?
7. Abɔdze ma yehu Jehovah no su ahorow
Yehu Jehovah no su ahorow wɔ ndzɛmba a ɔabɔ no mu. Ma yɛnhwɛ VIDEO no. Afei ma yɛnkenkan Romefo 1:20, na yensusu asɛmbisa a odzi do no ho.
-
Jehovah no su ahorow a ihu wɔ ndzɛmba a ɔabɔ mu no, ibi nye dɛn?
BINOM KA DƐ: “Nyankopɔn nnyɛ obi a ɔwɔ hɔ ankasa, mbom ɔyɛ tum bi a ɔwɔ beebiara.”
-
Edwen ho dɛn?
-
Ebɛnadze ntsi na etse nka dɛm?
DZA ESUA
Jehovah yɛ obi a yerunntum mmfa hɛn enyiwa nnhu no. Ɔwɔ su ahorow pii a ɔyɛ fɛw, nkanka ɔdɔ.
Mbobɔdo
-
Ebɛnadze ntsi na yerunntum mmfa hɛn enyiwa nnhu Jehovah?
-
Ebɛnadze nye sunsum krɔnkrɔn no?
-
Su ahorow a Jehovah wɔ no bi nye dɛn?
HWEHWƐ PII KA HO
Sua Jehovah no su etsitsir anan no ho adze na ama eehu no yie.
Hwɛ dase ahorow a ɔma yehu dɛ nnyɛ beebiara na Jehovah wɔ.
Hwɛ siantsir a Bible no dze sunsum krɔnkrɔn no toto Nyankopɔn ne nsa ho.
Nna ɔyɛ dzen ma owura bi a n’enyi efura no dɛ ɔbɛgye ato mu dɛ Nyankopɔn dwen no ho. Hwɛ dza ɔmaa n’adwen sesae.
“Afei Dze, Metse Nka Dɛ Mubotum Aboa Afofor” (Ɔweɔn-Aban, October 1, 2015)
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
