LESONI 07
E Kalou Vakacava o Jiova?
Na cava o nanuma me baleta na Kalou o Jiova ni o vakasamataki koya? E vakatubuqoroqoro qai cecere, ia vakacava e yawaki iko me vaka na kalokalo tu yawa? Se o nanuma ni sa rui kaukaua qai sega ni vakila e dua na ka me vaka na kurukuru? E Kalou vakacava o Jiova? E vakaraitaka o Jiova ena nona vosa na iVolatabu eso na nona itovo kei na nona kauaitaki iko.
1. Na cava eda sega ni raica kina na Kalou?
“E yalo na Kalou.” (Joni 4:24) E sega ni yago vakayago o Jiova me vakataki keda na tamata. E kabula vakayalo, e vakaitikotiko mai lomalagi na vanua eda sega ni raica rawa.
2. Na cava eso na itovo i Jiova?
Eda sega ni raici Jiova, ia eda rawa ni kilai koya, eda lomani koya tale ga ena vuku ni nona itovo totoka. E kaya na iVolatabu: “[E] taleitaka na lewadodonu o Jiova, ena sega ni biuti ira na nona tamata yalodina.” (Same 37:28) E “dau veikauaitaki qai dau yalololoma,” vakabibi vei ira na rarawa. (Jemesa 5:11) “E voleka o Jiova vei ira sa ramusu na lomadra, e vakabulai ira [na yalolailai].” (Same 34:18, ivakamacala e ra) O kila ni o rawa ni vakamarautaki koya se vakararawataki koya ena ka o cakava? E rarawa o koya ni dua e vakatulewataka me cakava na ka ca. (Same 78:40, 41) Ia e marau ni dua e cakava na ka dodonu.—Wilika Vosa Vakaibalebale 27:11.
3. E vakaraitaka vakacava o Jiova ni lomani keda?
Na itovo uasivi duadua i Jiova na loloma. E tukuni ni “Kalou ga na loloma.” (1 Joni 4:8) E vakaraitaka o Jiova nona loloma ena iVolatabu kei na veika e bulia. (Wilika Cakacaka 14:17.) Me kena ivakaraitaki, vakasamataka mada nona buli keda. Eda rawa ni raica na roka totoka, rogoca na ivakatagi rogo vinaka, meda tovolea tale ga na kakana vakatitiweli. E vinakata meda marautaka na bula.
VAKEKELI
Vulica na ka e vakayagataka o Jiova me cakava kina na veika vakatubuqoroqoro. Raica na sala e vakaraitaka kina o Jiova na nona itovo talei.
4. Na igu kaukaua ni Kalou na yalo tabu
Me vaka noda vakayagataka na ligada meda cakacaka, e vakayagataka o Jiova nona yalo tabu. E vakaraitaka na iVolatabu ni yalo tabu na igu kaukaua e vakayagataka me vakayacori kina nona inaki. Wilika Luke 11:13 kei na Cakacaka 2:17, qai veivosakitaka na taro qo:
-
Na Kalou ena “sovaraka” na nona yalo tabu vei ira era kerea. Cava o nanuma e Kalou na yalo tabu se nona igu kaukaua? Na vuna?
E vakayagataka o Jiova nona yalo tabu me vakayacora kina na veika vakatubuqoroqoro. Wilika Same 33:6 kei na 2 Pita 1:20, 21, qai veivosakitaka na taro qo:
-
Na cava eso na sala e vakayagataka kina o Jiova nona yalo tabu?
5. E talei na itovo i Jiova
E dua na dauveiqaravi yalodina ni Kalou o Mosese, ia e via kila vinaka na nona Dauveibuli. E kerea vua o Mosese: “Vakatakila vei au na nomuni ivalavala meu kilai kemuni kina.” (Lako Yani 33:13) Mani sauma o Jiova ni vakaraitaka vei Mosese eso nona itovo talei. Wilika Lako Yani 34:4-6, qai veivosakitaka na taro qo:
-
Na cava eso na itovo e vakaraitaka o Jiova vei Mosese?
-
Na itovo cava i Jiova o taleitaka?
6. E kauaitaki keda o Jiova
Era bobula na tamata ni Kalou na Iperiu mai Ijipita. Na cava na rai i Jiova me baleta nodra vakararawataki? Rogoca na KATOKATONI qai vakamuria, se Wilika Lako Yani 3:1-10. Oti veivosakitaka na taro tarava.
-
Na cava nona rai o Jiova me baleta noda rarawa? —Raica na tikina e 7 kei na 8.
-
O nanuma ni vinakata dina o Jiova me vukei keda, qai tu vua na kaukaua me veivuke? Na vuna?
7. E vakaraitaka na veika bula na itovo i Jiova
E vakaraitaka o Jiova nona itovo ena veika e bulia. Sarava na VIDIO. Wilika Roma 1:20, qai veivosakitaka na taro tarava.
-
Na itovo cava i Jiova o raica ena veika e bulia?
KA ERA KAYA ESO: “E sega ni kabula na Kalou, e dua ga na igu kaukaua e tu e veivanua kece.”
-
Na cava o nanuma?
-
Na cava e va kina qori?
KA O VULICA
E kabula tawarairai o Jiova e levu nona itovo talei, me vaka na loloma.
Railesuvi
-
Na cava eda sega ni raici Jiova kina?
-
Na cava na yalo tabu?
-
Na cava eso na itovo talei i Jiova?
IKURI
Mo vakatitobutaka nomu kilai Jiova ni o vulica e va na nona itovo qoroi.
“Na Cava e Kilai me Baleta Nona iTovo?” (Na Vale ni Vakatawa Nb. 1 2019)
Raica na ivakadinadina ni sega ni tu o Jiova ena ka kece.
Dikeva na vuna e kaya kina na iVolatabu ni yalo tabu e dusia na liga ni Kalou.
E dredre me vakabauta e dua na mataboko ni kauaitaki koya na Kalou. Wilika na ka e veisautaka nona rai.
“Au sa Qai Rawa ni Vukei Ira Eso Tale” (Na Vale ni Vakatawa, 1 Okotova, 2015)
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
