NǓKPLƆNKPLƆN 07
Nɛ̌ Jehovah ka Cí?
Nɛ̌ Jehovah Mawu ka cí bɔ a lin? É jiwǔ ɖesu bo ka lín dó we sunví ɖěɖee ɖò sunvísɛ́kplé e ɖò zɔ tawun é ɖé mɛ é ɖɔhun wɛ à? Alǒ a lin ɖɔ nǔ agbɔ̌nnɔ xɛbyoso ɖɔhun ɖé kpowun wɛ, bo kún ɖó jijɔ ɖě ó wɛ à? Nɛ̌ Jehovah ka cí tawun? Biblu ɖɔ jijɔ ɖěɖee Jehovah ɖó lɛ é nú mǐ. É lɛ́ ɖɔ ɖɔ nǔ towe nɔ ɖu ayi mɛ n’i.
1. Etɛwu mǐ ma ka sixu mɔ Mawu ǎ?
“Mawu ɔ, [Gbigbɔ] wɛ é nyí.” (Jaan 4:24) Jehovah ɖó agbaza gbɛtɔ́ tɔn ǎ. Gbigbɔ wɛ é nyí bo nɔ nɔ jixwé, fí e mǐ ma sixu mɔ ǎ é ɖé.
2. Jijɔ tɛ lɛ mɔ̌ Jehovah ka ɖó?
Mǐ sixu mɔ Jehovah ǎ. Amɔ̌, nú mǐ tɛ́n kpɔ́n bo tuùn i ɔ, mǐ nɔ yí wǎn n’i, ɖó É tíìn nǔgbo bo ɖó jijɔ ɖagbeɖagbe lɛ. Biblu ɖɔ: “Ðó Mawu Mavɔmavɔ yí wǎn nú nǔ wà ɖó sɛ́nxwi jí; é nɔ jó mɛ e nyí étɔn lɛ dó ǎ.” (Ðɛhan 37:28) É nɔ lɛ́ “nyɔ́ xomɛ ɖesu; mɛ nú nɔ blawǔ n’i titewungbe,” ɖò taji ɔ, mɛ ɖěɖee ɖò wuvɛ̌ mɔ wɛ lɛ é. (Jaki 5:11) “Mawu Mavɔmavɔ ɖò kpɔ́ xá mɛ e ayi yetɔn gbadó lɛ, é nɔ hwlɛn mɛ e nǔ jɛ akɔ́n jí na lɛ.” (Ðɛhan 34:19) A ka tuùn ɖɔ mǐ sixu bló bɔ xomɛ hun Jehovah alǒ wǔ kú i à? Mɛ e nɔ sɔ́ jlǒ dó wà nǔ nyanya é ɖé nɔ bló bɔ awakanmɛ nɔ kú i bɔ wǔ nɔ lɛ́ kú i. (Ðɛhan 78:40, 41) Amɔ̌, mɛ e nɔ wà nǔ jlɔjlɔ é nɔ bló bɔ xomɛ nɔ hun i.—Xà Nǔnywɛxó 27:11.
3. Nɛ̌ Jehovah ka nɔ xlɛ́ ɖɔ emi yí wǎn nú mǐ gbɔn?
Wanyiyi wɛ nyí jijɔ Jehovah tɔn taji hugǎn ɔ. Nǔgbo ɔ, “Mawu ɔ, wanyiyi wɛ é nyí.” (1 Jaan 4:8) Enyi Biblu mɛ kɛɖɛ wɛ Jehovah ɖè wanyiyi tɔn xlɛ́ ɖè ǎ, loɔ, é lɛ́ ɖè wanyiyi tɔn xlɛ́ gbɔn nǔ ɖěɖee é dá lɛ é gblamɛ. (Xà Mɛsɛ́dó 14:17.) Ði kpɔ́ndéwú ɔ, kpɔ́n lee é bló mǐ gbɔn é. É na mǐ nǔwukpíkpé ɔ bɔ mǐ nɔ mɔ sinmɛ ɖɛkpɛɖɛkpɛ lɛ, sè nǔxixo ɖagbeɖagbe lɛ, bo nɔ lɛ́ tuùn nǔɖuɖu e víví lɛ é sín tɔ́n. É ba ɖɔ mǐ ni ɖu gbɛ̀ sín vivǐ.
BA DÒ NÚ NǓ D’EJI
Kpɔ́n nǔ e Jehovah zán dó bló nǔ e jiwǔ lɛ é na é. Enɛ gudo hǔn, kpɔ́n lee Jehovah ɖè jijɔ tɔn ɖagbeɖagbe lɛ xlɛ́ mǐ gbɔn é.
4. Gbigbɔ mímɛ́: Hlɔnhlɔn e Mawu nɔ sɔ́ dó w’azɔ̌ na é
Lee mǐ nɔ zán alɔ mǐtɔn lɛ dó w’azɔ̌ gbɔn é ɔ, Jehovah lɔ nɔ zán gbigbɔ mímɛ́ tɔn dó w’azɔ̌. Biblu ɖexlɛ́ mǐ ɖɔ gbigbɔ mímɛ́ kún nyí Mawu ó, loɔ, hlɔnhlɔn e Mawu nɔ zán dó bló nǔ lɛ é wɛ. Xà Luki 11:13 kpo Mɛsɛ́dó 2:17 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
Mawu na “gbà” gbigbɔ mímɛ́ tɔn kɔn nyi mɛ ɖěɖee nɔ byɔ ɛ lɛ é jí. Enɛ wu ɔ, a nɔ lin ɖɔ gbigbɔ mímɛ́ ɔ Mawu wɛ à? Alǒ hlɔnhlɔn e Mawu nɔ sɔ́ dó w’azɔ̌ é? Etɛwu a ka ɖɔ mɔ̌?
Jehovah nɔ zán gbigbɔ mímɛ́ tɔn dó bló nǔ é jiwǔ lɛ é na. Xà Jɔbu 33:4 kpo 2 Piyɛ́ɛ 1:20, 21 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Ali tɛ lɛ nu mɔ̌ Jehovah ka zán gbigbɔ mímɛ́ tɔn ɖè?
5. Jehovah ɖó jijɔ e nɔ dɔn mɛ lɛ é
Mɔyizi nyí Mawu sɛntɔ́ gbejinɔtɔ́ ɖé, amɔ̌, é ba na lɛ́ tuùn Gbɛɖotɔ́ tɔn d’eji. Enɛ wu ɔ, Mɔyizi ɖɔ n’i ɖɔ: “Blǒ bonu má tuùn linlin towe lɛ; enɛ ɔ, un na tuùn we nǔgbo nǔgbo.” (Tíntɔ́n 33:13) Jehovah ɖè mɛ alɔkpa e É nyí é xlɛ́ Mɔyizi dó na xósin i. Xà Tíntɔ́n 34:4-6, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
Jijɔ tɛ lɛ Jehovah ka ɖexlɛ́ Mɔyizi?
-
Jijɔ Jehovah tɔn ɖětɛ lɛ ka dɔn hwɛ tawun?
6. Jehovah nɔ kpé nukún dó gbɛtɔ́ lɛ wu
Togun Mawu tɔn, Eblée lɛ nyí kannumɔ ɖò Ejipu. Nɛ̌ nǔ ka cí nú Jehovah hwenu e togun tɔn ɖò ya jì wɛ é? Xò XÓYIDÓKANJI ɔ bo xwedó, alǒ xà Tíntɔ́n 3:1-10. Enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
-
Etɛ tan enɛ ka kplɔ́n we dó lee nǔ nɔ cí nú Jehovah dó wuvɛ̌ e mɔ wɛ gbɛtɔ́ lɛ ɖè é wu é wu?—Kpɔ́n wemafɔ 7 kpo 8 kpo.
-
A ka lin ɖɔ Jehovah jló nǔgbo nǔgbo bo na d’alɔ gbɛtɔ́ lɛ à? A ka lin ɖɔ é kpéwú bá wà mɔ̌ à? Etɛwu?
7. Nǔɖiɖó lɛ nɔ ɖè jijɔ Jehovah tɔn lɛ xlɛ́
Jehovah nɔ ɖè jijɔ tɔn lɛ xlɛ́ gbɔn nǔ ɖěɖee é dá lɛ é gblamɛ. Xò VIDEO ɔ. Enɛ gudo hǔn, xà Hlɔmanu lɛ 1:20, bonu mi ɖɔ xó ɖó kpɔ́ dó nǔkanbyɔ e bɔ d’ewu é jí.
-
Jijɔ Jehovah tɔn tɛ lɛ a ka nɔ mɔ ɖò nǔ e é bló lɛ é mɛ?
MƐÐÉ LƐ ÐƆ: “Mɛ ɖě nyí Mawu ǎ, hlɔnhlɔn ɖé kpowun wɛ bo ɖò fí bǐ.”
-
Etɛ hwɛ ka lin?
-
Etɛwu a ka lin nǔ gbɔn mɔ̌?
ETƐ LƐ A KA KPLƆ́N?
Jehovah ɔ, Gbigbɔ wɛ é nyí bo ɖó jijɔ e dɔn mɛ lɛ é gegě, ɖò taji ɔ, wanyiyi.
Vɔ̌gbɔnji
-
Etɛwu mǐ ma ka sixu mɔ Jehovah ǎ?
-
Etɛ ka nyí gbigbɔ mímɛ́?
-
Jijɔ ɖětɛ lɛ mɔ̌ Jehovah ka ɖó?
KÍJÉ
Kplɔ́n nǔ dó jijɔ taji Jehovah tɔn lɛ ɛnɛ jí gɔ́ na.
Kpɔ́n kúnnuɖenú ɖěɖee xlɛ́ ɖɔ Jehovah kún ɖò fí bǐ ó lɛ é.
Kpɔ́n nǔ e wu Biblu nɔ dó gesí gbigbɔ mímɛ́ ɖɔ é nyí alɔ Mawu tɔn lɛ é.
É vɛwǔ nú nya nukúntɔ́nnɔ ɖé b’ɛ na ɖi ɖɔ Mawu yí wǎn nú emi. Kpɔ́n nǔ e ɖyɔ linlin tɔn é.
“Un Mɔ Dìn Ðɔ Un Sixu D’alɔ Mɛ Ðevo Lɛ” (Atɔxwɛ [Gungbe] 1er octobre 2015)
Xóta élɔ́ lɛ́ lɔ sixú jɛjí nú we
NǓ E MƐ LƐ́ NƆ YÁ WǓ KANBYƆ́ LƐ́ É
Nɛ̌ tuto Biblu kplɔ́nkplɔ́n tɔn e Kúnnuɖetɔ́ Jehovah tɔn lɛ́ nɔ xwlé mɛ é ka nɔ yi gbɔn?
Kpó Biblu kplɔ́nkplɔ́n vɔ̌nu sín tuto e Kúnnuɖetɔ́ Jehovah tɔn lɛ́ nɔ xwlé mɛ é kpó ɔ, a sixú zán lǐlɛ́dógbeɖévomɛ Biblu tɔn ɖěbǔ. A vo bó ná ylɔ́ xwédo towe blěbú alǒ xɔ́ntɔn towe lɛ́ ɖěbǔ bɔ yě ná gɔ́ nú we.
