KAPITE 7

E Fefeʼaki Ko Ia a Seova?

PLAY

Koleā lau manatu o uiga mo le Atua? Ko se tasi ko ia e ke fakaʼapaʼapa ki ai kae e mamaʼo mo koe, o fai pe le mamaʼo o se fetuʼu? Pe ko se makeke lasi e leʼaise mafai ke ke tio mata ki ai o fai pe se afā? Ko ia, ko ai māʼoki ko ia a Seova? E fakasā i le Tosi-Tapu e iai a agaaga o Seova ti e tokaga aia kiate koe.

1. Koleā e leʼaise mafai ai ke tou tio mata ki le Atua?

“E laumalie le Atua.” (Soane 4:24) Ko Seova, e leʼai sona tino fakatagata. Ko le laumālie aia e maʼuli i le lagi, ko le ganeʼa e leʼaise mafai ke tou tio ki ai.

2. Koā a ʼiki agaaga o Seova?

E leʼaise mafai ke tou tio mata kia Seova. Ka tou ako le Tosi-Tapu e tou iloa aia mo alofa kiate ia. E tou matala ai ko Seova e maʼuli māʼoki ti e iai ona agaaga. E pati i le Tosi-Tapu: “E alofa [“Seova,” NWT] ki le faitotonu, ti e leaise tiaki e ia lana kau agatonu.” (Pesalemo 37:28) Ti e toe ‘apele i le manavaalofa ti mo le alofa,’ kia lātou alā e maʼuli mamae. (Sakopo 5:11) “E ofi [“Seova,” NWT] kia latou ala e loto fatifati, ti e fakamauli e ia latou ala e loto mamae.” (Pesalemo 34:19) E ke iloa ko ia e malave a neʼa alā e tou fai kia Seova? Ka tou fai se neʼa e veli ti e lotomamae aia. (Pesalemo 78:40, 41) Ti kāpau e tou filifili ke tou fai le neʼa leia e mālie, ti e tou fakafiafiaʼi ai lona loto.—Lau Taagapati 27:11.

3. E fakasā fefeʼaki e Seova lona alofa kia tātou?

Ko le alofa ko le kalitate takimuʼa aia o Seova. E pati i le Tosi-Tapu: “E alofa le Atua.” (1 Soane 4:8) I le Tosi-Tapu, e fakasā e Seova lona alofa i neʼa fuli alā na fakatupu e ia. (Lau Tosi Gaoi 14:17.) Ke ke fakakaukauʼi muʼa na fakatupu e Seova le tagata. Na faʼu e ia tātou mo faigamālie alā ke tou tio ki lanu fulumālilie, ke tou logo ki musika logomālie ti mo kai ki neʼa kai mālilie. E loto a Seova ke tou fiafia i lotātou maʼuli.

MANATU LOLOTO

Ta tioʼi pe koleā leia e fakaʼaogaʼi e Seova ke fakasoko ai ana gaʼoi fulumālilie. Ti e fakasā fefeʼaki mai e ia ona agaaga.

4. Le laumālie māʼokiʼoki ko le makeke gaʼoi o le Atua

E tou fakaʼaogaʼi otātou lima ki le fakasoko o se gaʼoi, kae ko Seova e fakaʼaogaʼi e ia lona laumālie māʼokiʼoki. E fakasā i le Tosi-Tapu ko le laumālie māʼokiʼoki ko le makeke gaʼoi o le Atua, e fakaʼaogaʼi e ia ke fakasoko ai lona finegalo. Lau Luka 11:13 mo Tosi Gaoi 2:17, ti fai a vesili anei:

E soli e Seova lona laumālie māʼokiʼoki kia lātou alā e kole ake kiate ia. E fakaʼuiga ko ia le laumālie māʼokiʼoki ki se tasi? Koleā lona tupuʼaga?

E fakaʼaogaʼi e Seova lona laumālie māʼokiʼoki ke fakasoko ai ana gaʼoi fulumālilie. Lau Pesalemo 33:6 mo 2 Petelo 1:20, 21, ti fai le vesili leinei:

Koā gaʼoi na fakasoko e Seova ki lona laumālie māʼokiʼoki?

5. E iai a agaaga o Seova

Logo ai kua fualoa le tausi o Moisese kia Seova, kae na faiga aia ke iloa mālie leia na fakatupuʼia a ia. Na kole Moisese ki le Atua: “Kapau kua kau maua lou alofa, fakasa mai kiate au ou ala; ti e kau iloa maoki loa a koe.” (Ekesote 33:13) Na fakasā loa e Seova a ʼiki ona agaaga kia Moisese. Lau Ekesote 34:4-6, ti fai a vesili anei:

Koā ʼiki ona agaaga na fakasā e Seova kia Moisese?
Koā agaaga o Seova e ke mālieʼia?

6. E tokaga Seova ki le kakai

I le temi muʼa, na maʼuli mamae mo popula i Esipito a le kakai a le Atua leia ko le kau Epeleo. Koleā na logoʼi e Seova? FAKALOGO ki vaega anei na tāʼofi pe lau Ekesote 3:1-10. Ti fai a vesili anei.

FAKALOGO: Na Tokaga Seova Ki Olātou Mamae (2:45)

O mulimuli ki le koga tosi leinei, koleā na logoʼi e Seova o uiga mo lātou alā e maʼuli mamae?—Tioʼi vaega 7 mo le 8.
E fia tokoi māʼoki ko ia Seova ki le kakai? Ti e mafai ko ia e ia? Koleā lona tupuʼaga?