TOƁƁERE 07

Ko honno Yahuwah Alla sifori ?

LECTURE

E miijo mon ko honno Alla sifori ? Hara himo toowi haa en waawataa mo ɓadaade, wano koode ɗen ka kammu ? Kaa hiɗon miijii himo dolniri wa waabiliire ? Ko honno Yahuwah Alla sifori tigi tigi ? E nder Daaluyee makko on, Yahuwah Alla no yewti en fii sifaaji makko ɗin e no o haajiraa non fii men.

1. Fii honɗun en waawataa yi’ude Alla ?

« Alla ko Ruuhu » (Yuuhanna 4:24). Yahuwah Alla maraa ɓanndu wa neɗɗanke. Ko ɓanndu ruuhuyankeeru o mari e himo ka kammu, nokkuure nde en yi’ataa.

2. Ko sifaaji honɗi goo Yahuwah Alla mari ?

En waawataa yi’ude Yahuwah Alla, kono hiɗen yiɗi mo ɓayri ko o wooduɗo e himo mari sifaaji moƴƴi. Deftere Alla nden wi’i : « Ko fii [Yahuwah] Joomiraaɗo on no yiɗi peewal, o hawkataa sella-findeeɓe makko ɓen » (Zabuura 37:28, VPFJ). Ko o « heewuɗo giggol e yurmeende », tentinii fii tampuɓe ɓen (Yaaquuba 5:11). « Joomiraaɗo on no ɓadii maaya-ɓerɗeeɓe ɓen, himo danda ɓe ruuhu mun oƴƴaa ɓen » (Zabuura 34:18 [34:19, VPFJ]). Hiɗon anndi kuuɗe men ɗen no waawi battinde mo ? Si en suɓike waɗugol piiji bonɗi, o weltotaako e o yoomay (Zabuura 78:40, 41). Kono si en suɓike waɗugol ko moƴƴi, o weltoto (janngee Tindi 27:11, VPFJ).

3. Ko honno Yahuwah Alla hollirta himo yiɗi en ?

E nder sifaaji Yahuwah Alla ɗin fow, ko giggol makko ngol ɓuri hittude. Wurin, « Alla ko giggol » (1 Yuuhanna 4:8). Yahuwah Alla no holli giggol makko ngol ka nder Deftere makko, kono himo holli ɗun kadi e piiji ɗi o tagi ɗin (janngee Kuuɗe sahaabaaɓe ɓen 14:17). E piide misal, miijitee no o tagiri en non. O okki en bawgal yi’ugol mbaadiiji fotuɗi, nanugol galli welnayɗi ɓernde e ɲaamugol ɲaameteeji welɗi. Himo faalaa yo en heɓu ngurndan welɗan.

LUGGINEE

Ndaaree no Yahuwah Alla waɗirta piiji hawniiɗi. E ndaaron kadi no Yahuwah Alla hollirta sifaaji makko moƴƴi ɗin.

4. Ruuhu seniiɗo on ko bawgal Alla firnungal ngal

No huutorten juuɗe men ɗen non fii gollugol, ko non Yahuwah Alla huutorta ruuhu seniiɗo makko on. Deftere Alla nden no sifii ruuhu seniiɗo on wonaa goɗɗo, kono ko bawgal ngal Alla huutorta fii waɗugol goɗɗun. Janngee Luuka 11:13 e Kuuɗe sahaabaaɓe ɓen 2:17, ɓawto ɗun yewton fii ɗee lanndaale :

Yahuwah Alla ‘tippinay’ ruuhu seniiɗo makko on e hoore kala lanndotooɓe mo fii mun. E miijo mon, ruuhu seniiɗo on ko neɗɗanke, kaa ko bawgal Alla firnungal ngal ? Fii honɗun ?

Yahuwah Alla no huutora ruuhu seniiɗo makko on fii waɗugol piiji hawniiɗi. Janngee Zabuura 104:30 (VPFJ) e 2 Petruusu 1:20, 21 e yewton fii ngal lanndal :

Ko honno Yahuwah Alla huutori ruuhu makko seniiɗo on ?

5. Yahuwah Alla no mari sifaaji labaaɗi

Annabi Muusa hari ko rewoowo Alla sella-finndeejo, kono himo faalanoo anndude ko ɓuri nii fii Taguɗo mo on. Ko ɗun waɗi o torii mo : « Jooni non, si tawii mi heɓii sulfu maa on, haray andinan laawi maa ɗin, ɗun mi andete » (Eggudu ndun 33:13, VPFJ). Onsay Yahuwah Alla feɲɲinani mo sifaaji goo fii makko. Janngee Eggudu ndun 34:4-6 (VPFJ) e yewton fii ɗee lanndaale :

Ko sifaaji honɗi Yahuwah Alla feɲɲinani annabi Muusa ?
Ko sifaaji Yahuwah Alla honɗi ɓurɗon yiɗude ?

6. Yahuwah Alla no kippi fii yimɓe

Fewndo ko Aabirayankeeɓe ɓen, jamaa Alla on ɓaawo ɗoo, wonunoo maccuɓe e leydi Misira, ɓe tampuno moƴƴa. Ko honɗun Yahuwah Alla miijinoo fii ɗun ? Fijinee ODIO on e jokkon jannde nden maa janngon Eggudu ndun 3:1-10 (VPFJ). Ontuma yewton fii lanndale jokkituɗe ɗen.

ODIO : Yahuwah Alla kippuno fii tampereeji maɓɓe ɗin (2:45)

E nder ko jannguɗon kon, ko honno Yahuwah Alla wa’irta si o yi’ii yimɓe no tampa ? (Ndaaree aayeeje 7 e 8).
Hiɗon miijii Yahuwah Alla no faalaa wallude yimɓe e himo waawi waɗude ɗun ? Fii honɗun ?

7. Sifaaji Yahuwah Alla ɗin no yi’oo e nder tageefo ngon

Yahuwah Alla no feɲɲini sifaaji makko ɗin e nder ko o tagi kon. Fijinee VIDIO on e janngon Roomu 1:20. Ontuma yewton fii lanndal jokkitungal ngal.