NIKASEMƆ 07
Te Yehowa Tamɔ Tɛŋŋ?
Kɛ́ okwɛ lɛ, te Yehowa Nyɔŋmɔ tamɔ tɛŋŋ? Ani onaa lɛ akɛ mɔ wulu ko, ni anyɛŋ abɛŋkɛ lɛ? Aloo osusuɔ akɛ eji hewalɛ kpele ko, tamɔ nugbɔshimɔ, ni ejeee mɔ ko diɛŋtsɛ? Yɛ anɔkwale mli lɛ, te Yehowa tamɔ tɛŋŋ? Yehowa etsɔ e-Wiemɔ lɛ, ni ji Biblia lɛ, nɔ ehã ana esui lɛ, ni etsɔɔ hu akɛ ejwɛŋɔ ohe.
1. Mɛni hewɔ wɔnyɛŋ wɔna Nyɔŋmɔ lɛ?
“Nyɔŋmɔ lɛ Mumɔ ni.” (Yohane 4:24) Yehowa bɛ gbɔmɔtso tamɔ wɔnɔ lɛ. Mumɔ ni. Ŋwɛi eyɔɔ, ni wɔnyɛŋ wɔna jɛmɛ nii.
2. Mɛni ji Yehowa sui lɛ ekomɛi?
Eyɛ mli akɛ wɔnaaa Yehowa moŋ, shi eyɛ diɛŋtsɛ, ni eyɛ sui ni hãa mɛi ni le lɛ lɛ sumɔɔ lɛ. Biblia lɛ kɛɛ: “Yehowa sumɔɔ jalɛ sane, ni ekwaŋ enɔkwafoi lɛ.” (Lala 37:28) Yehowa “musuŋ tsɔɔ lɛ waa, ni enaa mɔbɔ hu,” ni ejieɔ sui nɛɛ kpo etsɔɔ mɛi ni miina amanehulu lɛ titri. (Yakobo 5:11) “Yehowa yɛ mɛi ni tsui ekumɔ lɛ amasɛi; ehereɔ mɛi ni nijiaŋ eje wui lɛ.” (Lala 34:18, shishigbɛ niŋmaa) Ani ole akɛ wɔbaanyɛ wɔhã Yehowa aná miishɛɛ loo ewerɛ aho ehe? Kɛ́ mɔ ko je gbɛ efee nibii fɔji lɛ, edɔɔ lɛ ni ewerɛ hoɔ ehe. (Lala 78:40, 41) Shi kɛ́ mɔ ko fee nɔ ni ja lɛ, emii shɛɔ ehe.—Kanemɔ Abɛi 27:11.
3. Mɛɛ gbɛ nɔ Yehowa etsɔɔ akɛ esumɔɔ wɔ?
Suɔmɔ ji Yehowa su titri. Hɛɛ, “Nyɔŋmɔ lɛ, suɔmɔ ji lɛ.” (1 Yohane 4:8) Jeee Biblia lɛ pɛ hãa wɔnaa akɛ Yehowa sumɔɔ wɔ, nibii ni ebɔ lɛ hu hãa wɔnaa nakai. (Kanemɔ Bɔfoi 14:17.) Bo lɛ, susumɔ bɔ ni ebɔ wɔ ehã lɛ he okwɛ. Wɔnyɛɔ wɔnaa kɔlai fɛfɛji, wɔnuɔ lalai ni ŋɔɔŋɔi, ni wɔyeɔ niyenii ni ŋɔɔŋɔi hu. Eesumɔ ni wɔye wala.
KASEMƆ PII OFATA HE
Obaana gbɛ ni Yehowa tsɔɔ nɔ efeɔ nibii ni yɔɔ naakpɛɛ. Ni obaana gbɛi ni etsɔɔ nɔ ejieɔ esui ni nɔ bɛ lɛ kpo hu.
4. Mumɔ krɔŋkrɔŋ—Nyɔŋmɔ hewalɛ ni miitsu nii
Bɔ ni wɔkɛ wɔniji tsuɔ nii lɛ, nakai nɔŋŋ Yehowa hu kɛ emumɔ krɔŋkrɔŋ lɛ tsuɔ nii. Biblia lɛ tsɔɔ akɛ, mumɔ krɔŋkrɔŋ lɛ jeee mɔ pɔtɛɛ ko, shi moŋ hewalɛ ni Nyɔŋmɔ kɛtsuɔ nii. Nyɛkanea Luka 11:13 kɛ Bɔfoi 2:17 lɛ, ni nyɛsusua sanebimɔi nɛɛ ahe:
-
Nyɔŋmɔ ‘baafɔse’ emumɔ krɔŋkrɔŋ lɛ eshwie mɛi ni biɔ lɛ lɛ anɔ. Hewɔ lɛ, ani osusuɔ akɛ mumɔ krɔŋkrɔŋ lɛ ji Nyɔŋmɔ hewalɛ ni miitsu nii, aloo nɔ kroko? Mɛni hewɔ okɛɔ nakai?
Yehowa kɛ emumɔ krɔŋkrɔŋ lɛ feɔ nibii ni yɔɔ naakpɛɛ. Nyɛkanea Lala 33:6 kɛ 2 Petro 1:20, 21 lɛ, ni nyɛsusua sanebimɔ nɛɛ he:
-
Mɛni ji nibii komɛi ni Yehowa kɛ emumɔ krɔŋkrɔŋ lɛ efee?
5. Yehowa sui lɛ yɛ fɛo
No mli lɛ, Mose ji Nyɔŋmɔ tsulɔ anɔkwafo, shi eetao ele e-Bɔlɔ lɛ jogbaŋŋ. Hewɔ lɛ, Mose kɛɛ lɛ akɛ: “Hã male ogbɛi lɛ, koni male bo.” (2 Mose 33:13) No hewɔ lɛ, Yehowa hã Mose le esui lɛ ekomɛi. Nyɛkanea 2 Mose 34:4-6 lɛ, ni nyɛsusua sanebimɔi nɛɛ ahe:
-
Te Yehowa sui lɛ ateŋ nɔ ni ehã Mose le lɛ?
-
Te Yehowa sui lɛ ateŋ nɔ ni onyaa he waa lɛ?
6. Yehowa jwɛŋɔ adesai ahe
No mli lɛ, Nyɔŋmɔ webii lɛ, ni ji Hebribii lɛ, ji nyɔji yɛ Ejipt. Be ni awaa amɛ yi lɛ, te Yehowa nu he ehã tɛŋŋ? Tswaa RIKƆDIŊ lɛ ni nyɛbo toi, loo nyɛkanea 2 Mose 3:1-10 lɛ. No sɛɛ lɛ, nyɛsusua sanebimɔi ni nyiɛ sɛɛ nɛɛ ahe.
-
Mɛni sane nɛɛ tsɔɔ bo yɛ bɔ ni Yehowa nuɔ he ehãa kɛ́ adesai miipiŋ lɛ he?—Kwɛmɔ kuku 7 kɛ 8 lɛ.
-
Kɛ́ okwɛ lɛ, ani Yehowa miitao ewa adesai lɛɛlɛŋ, ni ani ebaanyɛ efee nakai? Kɛ́ okɛɛ ‘Hɛɛ’ lɛ, mɛni hewɔ, ni kɛ́ okɛɛ ‘Dabi’ hu lɛ, mɛni hewɔ?
7. Adebɔɔ nibii hãa wɔnaa Yehowa sui lɛ
Nibii ni Yehowa ebɔ lɛ hãa wɔnaa esui lɛ. Jiemɔ VIDIO lɛ. No sɛɛ lɛ, nyɛkanea Romabii 1:20 lɛ, ni nyɛsusua sanebimɔ ni nyiɛ sɛɛ nɛɛ he.
-
Te Yehowa sui lɛ ateŋ nɔ ni onaa yɛ nibii ni ebɔ lɛ amli?
MƐI KOMƐI KƐƆ AKƐ: “Nyɔŋmɔ jeee mɔ pɔtɛɛ ko, eji hewalɛ ko ni yɔɔ he fɛɛ he, kɛ nɔ fɛɛ nɔ mli.”
-
Bo hu te osusuɔ tɛŋŋ?
-
Mɛni hewɔ osusuɔ nakai?
EMLI OTI
Yehowa ji mɔ ko ni wɔnyɛŋ wɔna lɛ, ni eyɛ sui fɛfɛji pii, titri lɛ, suɔmɔ.
Mɛni Okase?
-
Mɛni hewɔ wɔnyɛŋ wɔna Yehowa lɛ?
-
Mɛni ji mumɔ krɔŋkrɔŋ lɛ?
-
Mɛni ji Yehowa sui lɛ ekomɛi?
EHE SAJI KROKOMƐI
Obaana Yehowa sui fɛfɛji lɛ ateŋ ejwɛ komɛi ni baahã ole lɛ jogbaŋŋ.
Obaana nɔ ni tsɔɔ akɛ Yehowa bɛ he fɛɛ he, kɛ nɔ fɛɛ nɔ mli.
“Ani Nyɔŋmɔ Yɛ He Fɛɛ He Kɛ Nɔ Fɛɛ Nɔ Mli?” (jw.org lɛ nɔ sane)
Mɛni hewɔ Biblia lɛ tsɛɔ mumɔ krɔŋkrɔŋ lɛ akɛ Nyɔŋmɔ nine lɛ?
Kulɛ shwilafo ko heee eyeee akɛ Nyɔŋmɔ jwɛŋɔ ehe. Mɛni hã etsake ejwɛŋmɔ?
“Amrɔ Nɛɛ Mina akɛ Manyɛ Maye Mabua Mɛi Krokomɛi” (Buu-Mɔɔ, October 1, 2015)
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
