LÈSON 07
Kimoun ki Jéova ?
Si yo mandé-w kimoun ki Bondyé, ka ou té’é réponn ? Sèwten moun ka pansé kè Bondyé sé on moun nou dwèt rèspèkté onlo, men konm i tèlman puisan, pa ni mwayen vin bon zanmi èvè-y. É ni dòt moun ki ka pansé kè a pa on moun, men kè sé on fòs ki puisan toubònman kon on gwo siklòn. É vou, ki lidé a-w asi sa ? Kimoun Jéova yé ojis ? Adan Pawòl a-y Labib, Jéova ka di-nou ki kalité i ni. I ka di osi kè ou ni onlo valè pou-y.
1. Pou ki biten nou pé pa vwè Bondyé ?
« Bondyé sé on Lèspri » (Jan 4:24). Bondyé pa ni on kò kon tan nou. Sé on lèspri ki ka viv an syèl-la é nou pé pa vwè-y.
2. Ki jan dè moun Jéova yé ?
Pa ni mwayen vwè Jéova, men sé on moun ki plen bèl kalité, é lè ou aprann konnèt-li ou ka vin enmé-y. Mi sa Labib ka di : « Jéova enmé lajistis é i pé’é lagé pon sèwvitè a-y ki fidèl » (Sòm 37:28). I ka di osi kè i ni on ‘lanmou ki plen tandrès é kè i plen mizérikòd’, èspésyalman pou moun ki ka soufè (Jak 5:11). « Jéova toupré a moun tchè a yo fann ; i ka sové moun ki dékourajé » (Sòm 34:18). Anplisdisa, sèlon jan nou ka aji, nou pé mèt jwa an tchè a-y oben nou pé rann-li tris. Ès ou té sav sa ? Lè nou ka chwazi fè sa ki pa bon, sa ka désèvwa-y é sa ka fè-y lapenn (Sòm 78:40, 41). Men lè nou ka chwazi fè sa ki byen, sa ka mèt jwa an tchè a-y (li Pwovèb 27:11).
3. Kijan Jéova ka montré-nou kè i enmé-nou ?
Si ni on kalité ou ka touvé plis aka Jéova, sé lanmou. An réyalité, « Bondyé sé lanmou » (1 Jan 4:8). Adan Labib é adan sa i kréyé, Jéova ka montré tout lanmou a-y (li Akt 14:17). Enn gadé kijan i fè-nou ! Jan-la i fè-nou la ka pèwmèt-nou vwè bèl koulè, kouté bèl mizik, é manjé bon ti manjé kè nou enmé. I vlé nou pwofité dè lavi.
AN-NOU FOUYÉ PI FON
An-nou vwè èvè ki biten Jéova ka sèvi pou akonpli dé biten èstraòwdinè. É an-nou vwè kijan i ka montré bèl kalité a-y.
4. Lèspri sen, sé fòs-la Bondyé ka sèvi èvè-y la lèwvwè i ka aji
Lè nou ka travay, nou ka sèvi èvè 2 men an nou. Li Jéova, i ka sèvi èvè lèspri sen a-y. Labib ka di kè lèspri sen, sé fòs-la Bondyé ka sèvi èvè-y la pou fè on biten. Men ni sèwten moun ki ka konprann kè lèspri sen sé on moun. Li Lik 11:13 é Akt 2:17, é fè on ti kozé asi sé kèsyon-lasa :
-
Si nou mandé Jéova lèspri sen a-y, i ka vidé-y asi nou. Alò sèlon vou, ès lèspri sen sé on moun ? Poukwa ou ka di sa ?
Jéova ka sèvi èvè lèspri sen a-y pou fè dé biten ki èstraòwdinè toubònman. Li Sòm 104:30 é 2 Pyè 1:20, 21, é fè on ti kozé asi kèsyon-lasa :
-
Jéova sèvi èvè lèspri sen a-y pou fè diféran biten. Ki biten ésa ?
5. Jéova ni dé bèl kalité ki ka ban-nou anvi rapwoché-nou dè-y
Menmsi té ja ni plizyè lanné Moyiz té ka sèvi Jéova, rivé onlè, i santi i té bizwen konnèt Kréyatè a-y pibyen. Alò mi sa i mandé-y : « Souplé, si an ka bénéfisyé dè favè a-w, fè-mwen konnèt jan ou ka aji, pou an konnèt-vou » (Ègzòd 33:13). Kifè, Jéova fè Moyiz sav ki jan dè moun i yé. Li Ègzòd 34:4-6 é fè on ti kozé asi sé kèsyon-lasa :
-
Jéova ni onlo bèl kalité é i fè Moyiz konnèt déotwa adan yo. Ki kalité ésa ?
-
É vou, ki kalité a Jéova ou pisimé ?
6. Jéova ka sousyé-y dè nou
Sé Ébré-la, sé té pèp a Bondyé an tan lontan é yo té èsklav an Éjipt. Lè Jéova vwè jan pèp a-y ka soufè, ka i rèsanti ? Wouvè Bib a-w an Ègzòd 3:1-10 é kouté anrèjistrèman-la oben li sé vèwsé-lasa. Aprésa, fè on ti kozé asi sé kèsyon-la ki ka vin la :
-
Ka istwa-lasa ka aprann-vou asi sa Jéova ka rèsanti lè i ka vwè-nou ka soufè ? (gadé sé vèwsé 7 é 8 la).
-
Ès ou ka di Jéova vréman désidé a édé-nou é ès i kapab fè sa ? Poukwa ou ka di sa ?
7. Lè ou ka gadé sa Jéova kréyé, ou ka vin sav ki jan dè moun i yé
Jéova ka montré-nou ki jan dè moun i yé grasa sa i kréyé. Gadé VIDÉO-la. Aprésa, li Women 1:20 é fè on ti kozé asi kèsyon-la ki ka vin la :
-
Ki kalité a Jéova ou ka vwè adan sa i kréyé ?
MI SA MOUN KA DI : « Bondyé pa’a mélé-y adan nou. Lontan i ban-nou do a-y. »
-
Ka ou ka pansé dè sa ?
-
Poukwa ou ka di sa ?
ON TI RÉZIMÉ
Jéova sé on lèspri. Kifè, pa ni mwayen vwè-y. I ni onlo bèl kalité, é pli bèl la, sé lanmou.
Ka ou woutyenn
-
Poukwa nou pé pa vwè Jéova ?
-
Si yo mandé-w ka ki lèspri sen, ka ou ké réponn ?
-
Ki kalité a Jéova ou konnèt ?
AY GADÉ SA OSI
Si ou vé konnèt Jéova pibyen, pran tan ègzaminé kat kalité a-y ki èstraòwdinè toubònman.
« Quelles qualités Dieu a-t-il ? » (Tou dè Gad no 1 a 2019 an fransé)
Jéova pa toupatou anmenmtan. Gadé ki prèv Labib ka bay pou montré sa.
« Dieu est-il partout ? Est-il omniprésent ? » (on awtik ki asi jw.org)
Gadé poukwa Labib ka di kè lèspri sen ka touvé-y kon men a Bondyé.
On misyé avèg té ka konpranndèdi kè Bondyé pa té ka sousyé-y dè-y. Gadé ka ki fè-y chanjé lidé...
« J’ai maintenant le sentiment de pouvoir aider les autres » (Tou dè Gad a 1é òktòb 2015 an fransé)
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
