LÉSON 07

Kisa ou pouvé anprann asou Jéova ?

KOUTÈ SA

Pou ou menm, Jéova a kimoun ? Pitèt a roun moun ou ka rèspèkté bokou, mé ou ka trouvé i tèlman lwen ki sa pa posib konnèt li. Ouben, ès ou ka imajiné ki a roun fòrs ki vréman pwisan mé ki pa gen santiman ? Atò, Jéova a kimoun ? Annan Labib-a, Jéova ka montré nou bèl kalité i gen. I ka montré osi ki i kontan nou.

1. Poukisa nou pa pouvé wè Bondjé ?

Labib-a ka di : « Bondjé sa roun Lèspri » (Jean 4:24). Jéova pa gen zo ké lachè. A roun lèspri ki ka viv annan syèl-a, annan roun koté nou pa pouvé wè.

2. Ki bèl kalité Jéova gen ?

A vré, nou pa pouvé wè Jéova. Mé lò nou ka anprann konnèt li, nou ka konprann ki a roun vré moun ki gen bèl kalité. Labib-a ka di : « Pas Jéova kontan lajistis, é i pa ké anbandonnen so fidèl-ya » (Psaume 37:28). I ka di osi ki « Jéova gen bokou lanmou pou nou é i plen ké mizérikòrd », sa lé di ki i gen lapenn pou moun-yan, èspésyalman pou sa-ya ki ka soufri (Jacques 5:11). « Jéova pròch di sa-ya yé tchò krazé ; i ka sové sa-ya ki dékourajé » (Psaume 34:18). Ès ou savé ki fason nou ka aji ka fè li roun bagaj ? Kisa sa lé di ? Lò nou ka chwazi fè mové bagaj, sa ka fè Jéova lapenn (Psaume 78:40, 41). Mé Jéova gen tchò kontan lò nou ka chwazi fè sa ki byen (li Proverbes 27:11).

3. Kouman Jéova ka montré i kontan nou ?

Pi gran kalité Jéova gen, a lanmou. Pou byen di, Labib-a ka di : « Bondjé sa lanmou » (1 Jean 4:8). Nou pouvé wè lanmou Jéova annan Labib-a, mé osi annan tousa i kréyé (li Actes 14:17). Parèkzanp, pran tan réfléchi asou fason-an i fè nou. Gras a li, nou pouvé wè koulò ki bèl toubonnman, kouté bèl lanmizik é manjé bagaj ki chwit menm. I lé nou viv ké tchò kontan.

ANNOU FOUYÉ ANNAN LABIB-A

Annou wè di kisa Jéova ka sèrvi pou fè gran bagaj. É annou anprann kouman Jéova ka montré nou bèl kalité i gen.

4. Lèspri sen-an a fòrs Bondjé ka sèrvi pou fè sa i lé

Nou ka itilizé nou lanmen pou travay. É Jéova li menm, kisa i ka itilizé ? A so lèspri sen. I gen moun ka krè ki lèspri sen-an a Bondjé, mé Labib-a ka di ki lèspri sen-an a fòrs-a Bondjé ka sèrvi pou fè sa i lé. Li Luc 11:13 ké Actes 2:17, épi kozé asou sa késyon-yan :

Nou wè ki Jéova ké « vidé roun parti » di so lèspri sen asou sa-ya ki ka doumandé l’. Atò, ès ou ka pansé ki lèspri sen-an a Bondjé ouben ès a fòrs Bondjé ka sèrvi pou fè sa i lé ? Poukisa ou ka pansé sa ?

Jéova ka itilizé so lèspri sen pou fè gran bagaj. Li Job 33:4 ké 2 Pierre 1:20, 21, épi kozé asou sa késyon-an :

Kouman Jéova ja itilizé so lèspri sen ?

5. Bèl kalité Jéova gen ka bay nou anvi vin pi pròch di li

Moyiz té ka adoré Jéova dipi lontan. Magré sa, i té lé kanmenm anprann plis bagaj asou so Kréyatèr. A pou sa i doumandé l’ : « Souplé, si mo gen to favèr, fè mo savé kouman to ka aji, pou mo konnèt to é pou mo kontinyé gen to favèr » (Exode 33:13). Atò, Jéova montré Moyiz kèk bèl kalité i gen. Li Exode 34:4-6, épi kozé asou sa késyon-yan :

Ki bèl kalité Jéova gen Moyiz anprann ?
Ki bèl kalité Jéova gen ou pi kontan ?

6. Jéova ka gadé pou nou chak

Anvan, Ébré-ya a té pèp Bondjé, é yé té èsklav an Éjip. Lò so pèp té ka wè mizè, kisa Jéova rousanti ? Pran Exode 3:1-10 épi kouté anréjistréman-an ouben li sa vèrsé-ya. Apré sa, kozé asou sa késyon-yan :

ODIO : Jéhovah se souciait de leurs souffrances (2:45)

Kisa Jéova ka rousanti lò i ka wè moun-yan soufri ? (gadé vèrsé-ya 7 ké 8).
Ès ou ka pansé ki Jéova vréman lé idé nou ? Ès ou ka pansé i pouvé fè sa ? Poukisa ou ka pansé sa ?