REIREI 07

Aekakira Iehova?

KAMAIUA

Aekakira Iehova?

Ngkana ko iangoa Iehova ae te Atua, tera ae tei n am iango? E rangi ni kakannato ao n raroanako mairoum, n aron raroanakon taian nna n itoi? Ke ko iangoia bwa e rangi ni korakora, ma akea rabwatana, kaanga ai aron rebwen te baa? Aekakira raoi aroaron Iehova? E kaotii Iehova aroarona tabeua rinanon ana Taeka ae te Baibara, ao e kaotia naba iai ae E tabeakiniko.

1. E aera ngkai ti aki kona n nora te Atua?

“Bon te Taamnei te Atua.” (Ioane 4:24) Akea rabwatan Iehova ae ai aron rabwatara. Bon te taamnei ngaia ae e mamaeka i karawa, ae te tabo ae ti aki kona n noria.

2. Baikara aroaron Iehova tabeua?

E ngae ngke ti aki kona n nora Iehova, ma bon iai Ngaia ao iai aroarona aika e na tangiraki iai irouia akana kinaa. E kangai te Baibara: “E tangira te kaetitaeka ae riai Iehova ao e na aki kaaki taekaia ana aomata aika kakaonimaki ni koaua.” (Taian Areru 37:28) E ‘rangi n tatangira ao n nanoanga,’ riki nakoia naake a karawawataaki. (Iakobo 5:11) “E kaan Iehova ma akana uruaki nanoia. E kamaiuia akana a bwara nanoia.” (Taian Areru 34:18 kabwarabwara mai nano) Ko ataia ae e kona n rotaki Iehova n te bae ti karaoia? E nanokawaki iroun te aomata ae karaoi baika bubuaka. (Taian Areru 78:40, 41) Ma e kukurei iroun te aomata ae karaoa ae eti.—Wareka Taeka N Rabakau 27:11.

3. E kangaa ni kaotia Iehova bwa e tangirira?

Aroaron Iehova ae moan te rianako bon te tangira. “Te Atua bon te tangira.” (1 Ioane 4:8) E aki tii kaota ana tangira Iehova rinanon te Baibara, ma rinanon naba baike e karikii. (Wareka Mwakuri 14:17.) N te katoto, iangoa aroni karikara irouna. E anganira te konabwai n nori kaara aika titikiraoi, n ongo katangitang aika tangiraoi, ao ni katoong amwarake aika kangkang. E tangirira bwa ti na kimwareirei ni maiura.

REIAKINA AE BATI RIKI

Nora te bae e kabongana Iehova ni kakororaoi iai baika kamimi. Nora naba aron Iehova ni kaotiota ao ni katereterei aroarona aika anainano.

4. Te taamnei ae raoiroi boni mwaakan te Atua ae mwamwakuri

N aron ae ti kabonganai baira ni karaoa iai te mwakuri, Iehova e kabongana taamneina ae raoiroi. E kaotia te Baibara ae bon tiaki te aomata te taamnei ae raoiroi, ma boni mwaakan te Atua ae karaoi iai bwaai. Wareka Ruka 11:13 ao Mwakuri 2:17, ao maroroakin titiraki aikai:

E na “kabwaroa” taamneina ae raoiroi te Atua i aoia naake a bubutii ibukina. Ngaia are ko iangoia bwa te aomata te taamnei ae raoiroi, ke mwaakan te Atua ae mwamwakuri? E aera ngkai ko taekina anne?

E kabongana taamneina ae raoiroi Iehova ni kakororaoi iai baika kamimi. Wareka Taian Areru 33:6 ao 2 Betero 1:20, 21, ao maroroakina te titiraki aei:

Baikara aanga tabeua ake e kabongana iai taamneina ae raoiroi Iehova?

5. Iai aroaron Iehova ae anainano

Mote bon te tia taromauria te Atua ae kakaonimaki, ma e kani kinaa riki ana tia Karikiriki. Ngaia are e taku nakon te Atua: “Kaotii nakoiu aroarom nako bwa I aonga ni kinako.” (Te Otinako 33:13) E kaekaa Mote Iehova n arona ni kaotii tabeua aroarona. Wareka Te Otinako 34:4-6, ao maroroakin titiraki aikai:

Baikara aroaron Iehova ake e kaotii nakoni Mote?
Baikara aroaron Iehova aika e anaaki riki iai nanom?

6. E tabeakinia aomata Iehova

A tautoronaki i Aikubita ana aomata Iehova aika taian Ebera. N te aro raa ae e rotaki iai Iehova n rawawataia naakai? Katanga te BWANAA ao irira warekana, ke wareka Te Otinako 3:1-10. Ao maroroakin titiraki aikai.

BWANAA: E Nora Rawawataia Iehova (2:45)

Tera ae ko tuangaki n te rongorongo aei ni kaineti ma ana namakin Iehova ibukin rawawataia aomata?—Nori kibuna 7 ao 8.
Ko kakoauaa ae e rangi ni kani buokiia aomata Iehova ao e boni kona ni karaoa anne? Kabwarabwaraa am kaeka.