ƝAAKWƐLƐI 07
Zehova kɛ pələ kaa ləi ?
Ya kɛi ə́ kiliŋahiɛ yɛ́ vilɛn Zehova Yálá ɓa, ə́ wɔ kili ɓa gaa ləi ? Ə́ wɔ kili ɓa gaa a nu maawiaa kɛnɛ ta yii maakweaa yɛ́, yɛ pələi lɔ pɛmɛlɛngɔuɠaa maakweaa la guɔ ? Ə́ wɔ kili ɓa ho ɓaa a nu, gaa lɔ yɛ hwaŋa kɛnɛ ta, yɛ pələi lɔ tulɔ hwaŋa kaa la ? Zehova kɛ pələ kpɔkpɔ kaa ləi ? Biblə hu, Zehova a duwɔ pələɠaa lɛ. Ə lɛɛ a nɛ nwɔnɔ yɛ ə́ maaliihɛlɛn gaa ma.
1. Lə mɛni ɓa gu hwa pɛli Zehova kaai ?
“ Yálá kaa a Nii ” (Ɉaan 4:24). Zehova kɔlɔ kɛ pələ ho yɛ gu wɛi. Gaa a Nii yələkɔlɔn ɉu, gu hwa pɛli gaai.
2. Zehova túwɔ́ pələ taɠaa ɓaa lə ?
Gu hwa pɛli Zehova kaai, kəlaa gwa gɔwɔtɔɔ guɔ gɔlɔnŋaa maakwɛli, gwa gaa guɔ ma gaa a nu leelee yii duwɔ pələɠaa lɛlɛɛ, ə lɛɛ nwɛli a too guɔ. Biblə kaa kɛi ma : “ Teɲa wɛli kaa Yai-laa ɓa, hwa gili kulɔ nwɛlikɛmaa nua hu ” (Maatɛnɛ 37:28). Ə lɛɛ nwɔnɔ ŋɔ “ mɛni lɛlɛɛi, ɲəi laahwɛɛi a mɛinɛɛ, ” gəlee ə ma gɛ nua mɔnɔ mɛɛi di pɔ (Ɉakə 5:11). “ Nuai di lii yaliɛ di kwəi, Yai-laa a maalɛɠɛ diɛ, nuai di hwiikpɛɛ kɛnɛ, a di nii lɔ ” (Maatɛnɛ 34:19 [34:18 NWT]). Gbaɠala kaa yɛ́, yɛ́ ma gu túwɔ́ pələ a Zehova kwəinɛɛ, awala kɛtii ə nii holi ? Nuta a ɉəɠə ɉu yɛ ma gaa mɛni ɲɔnwɔɔɠaa kɛi, yili a hee Zehova hu ə lɛɛ ə viikpɛɛ (Maatɛnɛ 78:40, 41). Kɛlɛɛ nuta a ɉəɠə ɉu yɛ ma gaa mɛni lɛlɛɛɠaa kɛi, yili a Zehova kwəinɛɛ kpɔ kɛnɛ (Hanwon 27:11 ɓo).
3. Zehova a nɛ ləi guɔ yɛ ma gu wɛli kaa ma ?
Wɛlikɛmaa ɓə ɓaa a Zehova ŋɔ tuwɔpələlɛlɛɠaa gɛnɛ mun “ Yálá kaa a wɛlikɛmaa ” (Ɉaan dɔlɔɔ 4:8). Zehova a ŋɔ wɛlikɛmaa lɛ guɔ Biblə hu ə lɛɛ nwɔnɔ a wɛlikɛmaa lɛ guɔ ŋɔ pɛli hɛnŋaa hu (Túwɔ́ pələ 14:17 ɓo). Bələi ə nukan gbɛtɛ la gu gɔɔmaa həɠə lɔ ma. Gwa pɛli gu hɛnŋaa ɲɛi lɛlɛɛɠaa kaa, gu wələwoo lɛlɛɛɠaa mɛn ə lɛɛ guɔ kɔnɔn nɛlɛɛɠaa mii. Gaa bɔ guɔ yɛnɛɛ ɲaanɛɛ kulɔ.
Ə́ WƆ MƐNIKƆLƆNŊAA TA PƐLƐ MA
Gaa kpaalə ləkɛɛ ɓə Zehova a tɛɛ la yɛ pɛli mɛni kpea-kpeaɠaa kɛi. Ə lɛɛ gaa pələi Zehova a ŋɔ tuwɔpələlɛlɛɠaa ɲɛi lɛ la guɔ.
4. Nii-maahəɠɛɛ kaa a Yálá hwaŋa yii kóló kɛi
Pələi lɔ gwa kóló kɛ la a gu yee, bələ lɔ ɓə Zehova a kóló kɛ la a ŋɔ nii-maahəɠɛɛ. Biblə a mo yɛ ma nii-maahəɠɛɛ ho ɓaa a nu, kɛlɛɛ gaa a hwaŋa yii Yálá a kóló kɛ la. Lukə 11:13 da Gɛlaɠaa 2:17 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Yálá kaa pai ŋɔ nii-maahəɠɛɛ “ tɛɛi ” nua da vɛli ma di pɔ. Ə́ wɔ kili ɓa nii-maahəɠɛɛ kaa a nu awala kɛtii Yálá hwaŋa yii kóló kɛi ? Lə mɛni ɓa ə́ kaa moi tii ?
Zehova a kóló kpea-kpeaɠaa kɛ a ŋɔ nii-maahəɠɛɛ. Maatɛnɛ 33:6 ; Piɛrə veelɛ 1:20, 21 ɓo, ə lɛɛ ka lono kɛ ɛɛmaalən ŋɛi mɛi :
-
Kóló ləkɛɛɠaa ɓə Zehova aa gɛ a ŋɔ nii-maahəɠɛɛ ?
5. Zehova túwɔ́ pələɠaa lɛlɛɛ kpɔ kɛnɛ
Moisə ə kɛ a Yálá ɓatoomun yii kpɔ kɛ dəlimoɔ, pələi ma ə kɛ la tii ə kɛ bɔ ə Yálá kɔlɔn gbɔ a neelee. Yili ɓa ə mo ma yɛ ma : “ Mɛnii ə́ kaa bɔ, nɛ máá, ə gɛ, ŋá ə́ kɔlɔn a neelee ” (Lɛɛ gbɔwɔ ɓa 33:13). Zehova kɛi nwoo pulu pənəi ə ŋɔ tuwɔpələlɛlɛ taɠaa ɲɛi lɛ Moisə ɓa. Lɛɛ gbɔwɔ ɓa 34:4-6 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Zehova ŋɔ tuwɔpələlɛlɛ ləkɛɛɠaa ɓə ə nɛ Moisə ɓa ?
-
Zehova túwɔ́ pələ ləkɛɛɠaa ɓə nwɛli aa too yɛ́ kpɔ kɛnɛ ?
6. Zehova a nua maaliihɛlɛn ɉee
Yálá ŋɔ nu huwui kɛ a hebreuɠaa di kɛ luwɔlaa hu Eziptə. Ɓɛlowai di kɛi mɔnɔ mɛi la, lə ɓə yili ə gɛ Zehova ɓa ? Lɛɛ gbɔwɔ ɓa 3:1-10 həɠə ə́ ŋɔ WOOHƏƓƏƁO woo mɛn, awala kɛtii ə́ vɛlisɛɛɠaa tii ɓo. Ə lɛɛ ka lono kɛ gɛɛmaalənŋaa ŋɛi mɛi.
-
Yii nukanŋaa di wɔ mɔnɔ a gɛ Zehova ɓa, lə ɓə bɔlɔkiliinŋaa ŋɛi a nɛ yɛ́, yɛ hwilɛn na ma ? (Nwookpuɔ 7 da 8 kaa).
-
Ə́ wɔ kili ɓa Zehova a pɛli kpɔnmaa tɛɛi nukanŋaa pɔ, ə lɛɛ yili naa wɛli kaa kpɔ ma a neelee ? Lə mɛni ɓa ə́ kaa kɛi ma ee, awala kɛtii kpaa ?
7. Zehova ŋɔ pɛli hɛnŋaa da pɛli di kpɔnmaa tɛɛ gu pɔ, gu duwɔ pələɠaa kɔlɔn
Zehova ŋɔ pɛli hɛnŋaa haalai ɓə a ŋɔ tuwɔpələlɛlɛɠaa ɲɛi lɛ la VIDIO kaa, ə́ Romə 1:20 ɓo, ə lɛɛ ka lono kɛ gɛɛmaalən ŋɛi mɛi.
-
Zehova ŋɔ tuwɔpələlɛlɛ ləkɛɛɠaa ɓə ya gaa gbɛtɛ hɛnŋaa hu ?
NUTAƓAA DA KƐ KƐI MA : “ Nu lɔpee ta hwa pɛli Yálá kaai, yili ɓa gu hwa pɛli Yálá kɔlɔn ɉii. ”
-
Yáán ə́ kaa kɛi lə ?
-
Lə mɛni ɓa ə́ kaa ə́ kiliŋahiɛi tii ?
YII GU GALAN
Zehova kaa a Nii, yili mukulaa ɓaa gu hwa pɛli gaai. Ə lɛɛ tuwɔpələlɛlɛ tamaa kaa ɲəi, ɉɛnɛ ə ma gɛ wɛlikɛmaa.
Nɛɛ ə́ kili pɔ
-
Lə mɛni ɓa gu hwa pɛli Zehova kaai ?
-
Lə ɓə da kɛ ma nii-maahəɠɛɛ ?
-
Zehova túwɔ́ pələ taɠaa ɓaa lə ?
MƐNI TAKPƐLIƓAA
Ə́ wɔ mɛnikɔlɔnŋaa ta pɛlɛ ma yɛ hwilɛn na Zehova ŋɔ tuwɔpələlɛlɛ kpea-kpea naan ɓa.
Mɛniɠaa da nɛ diɛ ma Yálá ho kɛɛnaa kəlee ŋɔ pɛli hɛnŋaa hu, gaa.
“ Yálá kaa mɔɔn kɛɛnaa kəlee ? ” (Hɛɓɛ yii gaa gwɛli yɛli ɓa)
Gaa, lə mɛni ɓa Biblə a kɛ nii-maahəɠɛɛ kɔɔn ɉii Yálá yee ɓa.
“ Lə ɓə da kɛ ma nii-maahəɠɛɛ ? ” (Hɛɓɛ yii gaa gwɛli yɛli ɓa)
Gɛ laa ho kɛ nɛɛli ɲɛipumun da yəi ə laana akɛ Yálá a kɛ maaliihɛlɛn ɉeei. Gaa yii gɛ yɛ pɛli ŋɔ kiliŋahiɛ maahwalən ɉii.
“ Ŋaa gaa kea gɛ́ ma ŋa pɛli kpɔnmaa tɛɛ nu takpɛliɠaa pɔ ” (La Tour de Garde, 1er octobre 2015)