EKIRAJAAYA 07
Piʼraaja nukuwaʼipa Jehová
Paapapa nüchiki Jehová, ¿anasüche nukuwaʼipa saaʼin pümüin? ¿Wattashiche maʼin puulia maʼaka wattain tü jolotsükalüirua? ¿Müshiche nia maʼaka saaʼin shiyaa juya sümaa makuwaʼipain nia? ¿Kasa waaʼinrajatka süpüla weʼraajüin tü nukuwaʼipakat? Süküjain tü Bibliakat tü nukuwaʼipakat Jehová jee süküjainya kachipünaain pia naaʼin.
1. ¿Jamüshi nnojoika süpüla weʼrüin Maleiwa?
«Chi Maleiwakai, meʼrujusai sütüma wayuu» (Juan 4:24). Nnojoishi süpüla weʼrüin Jehová maʼaka weʼrüin wanee wayuu. Meʼrujusai nia, chashi nia chaa sirumatuʼu. Nnojotsü süpüla weʼrüin eere nia.
2. Anuu tü nukuwaʼipakat Jehová
Mayaainjeʼe nnojolin süpüla weʼrüin Jehová, aishi maʼin nia wapüla weʼraajapa nukuwaʼipa. Anasü maʼin tü nukuwaʼipakat. Anuu sünüiki tü Bibliakat nüchiki: «Anasü nümüin Jehová lotule sukuwaʼipa wanee kasa otta nnojoleena niyüülajüin na waneepiakana nümaa» (Salmo 37:28). Aipürai maʼin wayuu Jehová otta nümüliajüin na müliakana aaʼin (Santiago 5:11). «Nnojoishi wattaluʼuin Jehová noulia na mojukana aaʼin otta nükaalinjain na wayuu yüülakana aaʼin» (Salmo 34:18). ¿Pütüjaa aaʼu eein süpüla mojuin naaʼin Jehová jee talatüin naaʼin sünainjee tü kasa waaʼinrakat? Waaʼinrüle kasa mojusü mojeerü naaʼin watuma (Salmo 78:40, 41). Waaʼinrüle kasa anasü, talateerü naaʼin Jehová watuma (paashajeʼera Proverbios 27:11).
3. ¿Jamüsü watüjaaka saaʼu alin waya nüpüla Jehová?
Anasü maʼin nukuwaʼipa Jehová, aipürai maʼin nia (1 Juan 4:8). Watüjaa aaʼu alin maʼin waya nüpüla Jehová süka naapüin wamüin tü Bibliakat otta süka nukumajüin wainma kasa wapüleerua (paashajeʼera Aluwataaushikana [Hechos] 14:17). Jülüja paaʼin anain maʼin wakumajia nutuma. Eesü süpüla weʼrüin sünoʼu wainma kasa, talatüin waaʼin waapajapa muusika otta wekapa eküülü eekai jemetüin maʼin. Nücheka achikit Jehová anainjatüin wakuwaʼipa.
WEKIRAJAA SOOʼOMÜIN
Wekirajaa sünain kasain nukumajüin akajee Jehová tü kasakalüirua. Süchikijee wekirajaajeerü anain tü wayaawatakalü anainjee tü nukuwaʼipakat.
4. Tü nüpülainkat Maleiwa shia tü naaʼinrakalü akajee wanee kasa
Waaʼinrüin wanee kasa sükajee tü wajapükat, akaajasaʼa Jehová naaʼinrüin wanee kasa sükajee tü nüpülainkat. Jaashajeʼera Lucas 11:13, TNM otta Aluwataaushikana 2:17, TNM otta yooto jia süchiki tüü:
-
Saashin tia wetsiikulokalüirua, ¿kasa naapeetka Jehová namüin na wayuu achuntakana kaalinwaa nümüin?
Wainma kasa anasü nukumajaka Jehová sükajee tü nüpülainkat. Jaashajeʼera Salmo 33:6 otta 2 Pedro 1:20, 21, TNM otta yooto jia süchiki tüü:
-
¿Kasa naaʼinraka Jehová sükajee tü nüpülainkat?
5. Kamalainsü wamüin tü nukuwaʼipakat Jehová
Mayaainjeʼe niʼyataain Moisés waneepia nümüin Maleiwa, niʼraajeein sooʼomüin tü nukuwaʼipakat. Müshijeseʼe nümüin mayaa: «Pikiraja taya sünain tü puluwataakalü anain süpüla teʼraajüin pukuwaʼipa» (Éxodo 33:13). Asoutushi Jehová nümüin Moisés jee nüküjain nümüin süchiki tü nukuwaʼipakat. Jaashajeʼera Éxodo 34:4-6 otta yooto jia süchiki tüü:
-
Püküja süchiki tü nukuwaʼipakat Jehová nüküjaka nümüin Moisés.
-
¿Kasa kamalainka pümüin sünainjee nukuwaʼipa Jehová?
6. Nükaalinjeein Jehová na wayuukana
Achepchieeshii chaa Egipto na aʼyataaliikana nümüin Maleiwa. ¿Jamüsü naaʼin Jehová wanaa sümaa niʼrüin namüliala naya wayuukana? Jaapaja tü PÜTCHI AAPAJÜNAJATKAT otta jülüja jaaʼin tü pütchi suluʼukat tü Bibliakat jee shiale neʼe jaashajeʼerüin Éxodo 3:1-10. Süchikijee, yooto jia süchiki tüü:
-
Sünainjee tü paapajüitpakat, ¿aisüche nümüin Jehová sümüliala wayuu? (Jaashajeʼera tü wetsiikulokot 7 otta 8).
-
¿Nükaaliinjeeinche Jehová na wayuukana? ¿Nuunteetche naaʼinrüin tia? ¿Jamüsü maka tia saaʼin pümüin?
7. Weʼraajüin nukuwaʼipa Jehová sükajee tü kasa nukumajalakat
Nikirajüin waya Jehová süchiki tü nukuwaʼipakat sükajee tü kasa nukumajalakat. Jünaja tü VIDEOKOT. Süchikijee, jaashajeʼera Roma 1:20 otta yooto jia süchiki tüü:
-
Püküja süchiki tü nukuwaʼipakat Jehová piyaawataka sünainjee tü kasa nukumajalakat.
EESHII WAYUU EEKAI NAMÜIN: «Nnojoishi taya kachipünaain naaʼin Jehová».
-
¿Jamüsüjaʼa pünüiki süchiki tia?
WATÜJAAITPAKA AAʼU
Nnojoishi süpüla weʼrüin Jehová süka meʼrujuin nia. Anasü maʼin tü nukuwaʼipakat, aipürai maʼin nia.
Pusouta shiʼipajee
-
¿Jamüshi nnojoika süpüla weʼrüin Jehová?
-
¿Kasa naaʼinraka Maleiwa sükajee tü nüpülainkat?
-
¿Jarat tü nukuwaʼipakat Jehová?
PÜNAʼLA SOOʼOMÜIN
Piʼraaja Jehová sükajee pikirajaain süchiki tü nukuwaʼipakat.
«¿Jarat tü nukuwaʼipakat Maleiwa?» (Aapiria Wayuu, nuum. 1, 2019)
Paashajeʼera jamüin nnojoika süpaʼayaa sümüin mmaka süpüshuaʼa chi Maleiwakai.
«¿Süpaʼashiche mmaka süpüshuaʼa chi Maleiwakai?» (Pütchi suluʼuka jw.org)
Saashin tü Bibliakat müsü aka saaʼin najapü Maleiwa tü nüpülainkat, ¿jamüsü makaʼa sünüiki?
«¿Kasa süküjaka tü Bibliakat süchiki tü nüpülainkat Maleiwa?» (Pütchi suluʼuka jw.org)
Eeshi wanee wayuu moʼupaʼasai. Nnojoishi nia kachipünaain naaʼin Maleiwa saaʼin nümüin. Aküjünüsü yaʼayaa jamüin suʼwanajaaka tü jülüjakat naaʼin.
«Eeitpainjaʼa joo süpüla takaalinjain na waneinnua» (Aapiria Wayuu, oʼutuupüroʼu 1, 2015)
Eesüjaʼa kamalainjeerüle pümüin aashajeʼeraa tüü
SÜSAKIRAWAIKA ANAIN WAYUU
¿Jamüsü sukuwaʼipa shikirajia wayuu sünain tü Bibliakat natuma na Aküjaliikana pütchi?
Pikirajaale sünain tü Bibliakat namaa na aküjaliikana pütchi nüchiki Jehová, eesü süpüla pikirajaain süka tü Biblia eekat pümaʼana otta puunejaain püpüshi jee paʼaleewainyuu.
