NUPINPLỌN 07
Omẹ Nankọ Wẹ Jehovah Yin?
Eyin a lẹnnupọndo Jehovah Jiwheyẹwhe ji, omẹ nankọ wẹ a nọ yí i do mọ? Be a nọ mọ ẹn di mẹhe klo taun de bọ a ma gán dọnsẹpọ, taidi sunwhlẹvu he to olá boboe de wẹ ya? Kavi be a nọ mọ ẹn di mẹhe dohuhlọn taun de, bo ma ka tindo jẹhẹnu tangan de, taidile yujẹhọn te do wẹ ya? Omẹ nankọ wẹ Jehovah yin na taun tọn? To Ohó etọn Biblu mẹ, Jehovah do jẹhẹnu etọn delẹ hia, taidi owanyi he e tindo na we.
1. Naegbọn mí ma gán nọ mọ Jiwheyẹwhe?
“Gbigbọ wẹ Jiwheyẹwhe.” (Johanu 4:24) Jehovah ma tindo agbasa taidi míwlẹ nkọ. Gbigbọ wẹ ewọ bo nọ nọ̀ olọn mẹ, to fie nukun ma gán mọ de.
2. Etẹwẹ yin delẹ to jẹhẹnu Jehovah tọn lẹ mẹ?
Dile etlẹ yindọ mí ma gán nọ mọ Jehovah, Omẹ jọnun de wẹ ewọ yin, podọ jẹhẹnu etọn lẹ nọ zọ́n bọ mẹhe yọ́n ẹn lẹ nọ yiwanna ẹn. Biblu dọmọ: “Jehovah yiwanna whẹdida dodo, podọ ewọ ma na gbẹ́ nugbonọ etọn lẹ dai.” (Salmu lẹ 37:28) Humọ, Jehovah nọ ‘tindo owanyi sisosiso po lẹblanu po,’ titengbe na mẹhe to yaji lẹ. (Jakọbu 5:11) “Jehovah ma dẹn do mẹhe ahun yetọn jẹflumẹ lẹ; e nọ whlẹn mẹhe gbọjọ lẹ.” (Salmu lẹ 34:18, nudọnamẹ odò tọn) Be a yọnẹn dọ walọyizan mítọn lẹ nọ yinuwado Jehovah ji ya? Eyin mẹde de nado wà nuylankan lẹ, e nọ vẹna ẹn. (Salmu lẹ 78:40, 41) Amọ́, mẹhe de nado wà nuhe sọgbe nọ hẹn homẹ etọn hùn.—Hia Howhinwhẹn lẹ 27:11.
3. Nawẹ Jehovah nọ dohia dọ ewọ yiwanna mí gbọn?
Jẹhẹnu titengbe hugan Jehovah tọn wẹ owanyi. Na nugbo tọn, “Jiwheyẹwhe wẹ owanyi.” (1 Johanu 4:8) Gbọnvona dọ Jehovah do owanyi etọn hia mí gbọn nuhe e dọna mí to Biblu mẹ lẹ dali, nuhe e dá lẹ sọ do enẹ hia. (Hia Owalọ lẹ 14:17.) Di apajlẹ, lẹnnupọndo lehe e dá mí do ji. E dá mí to aliho de mẹ bọ mí gán nọ mọ sinmẹ alọpa alọpa lẹ, nọ sè hàngbe milomilo lẹ, bosọ nọ duvivi otọ́n núdùdù dagbe lẹ tọn. Na nugbo tọn, e jlo dọ mí ni duvivi ogbẹ̀ tọn.
DINDONANU DOGỌ
Plọnnu gando nuhe Jehovah yí do dá nujiawu he tin lẹ go. Enẹgodo, pọ́n lehe Jehovah nọ do jẹhẹnu etọn he nọ dọnmẹdogo lẹ hia do.
4. Gbigbọ wiwe yin huhlọn de he Jiwheyẹwhe nọ yí do wazọ́n
Kẹdẹdile mí nọ yí alọ mítọn lẹ do wazọ́n do, mọ wẹ Jehovah nọ yí gbigbọ wiwe etọn zan do. Biblu dohia dọ gbigbọ wiwe ma yin omẹ jọnun de gba, amọ́ huhlọn he Jiwheyẹwhe nọ yí do wà nulẹ wẹ. Hia Luku 11:13, gọna Owalọ lẹ 2:17, enẹgodo dọhodo kanbiọ ehelẹ ji:
-
Jiwheyẹwhe na “kọ̀n” gbigbọ wiwe etọn “do” mẹhe nọ biọ ẹ to E si lẹ ji. Enẹwutu be a lẹndọ gbigbọ wiwe yin omẹ jọnun de kavi huhlọn he Jiwheyẹwhe nọ yí do wazọ́n wẹ ya? Naegbọn a do dọ mọ?
Jehovah nọ yí gbigbọ wiwe etọn zan nado wà onú jiawu lẹ. Hia Salmu lẹ 33:6 gọna 2 Pita 1:20, 21, enẹgodo dọhodo kanbiọ ehe ji:
-
Aliho tẹlẹ mẹ wẹ Jehovah ko yí gbigbọ wiwe etọn zan te?
5. Jehovah tindo jẹhẹnu dagbedagbe lẹ
Mose ko yin sinsẹ̀n-basitọ nugbo Jiwheyẹwhe tọn de, amọ́ e jlo na yọ́n Mẹdatọ etọn ganji dogọ. Abajọ, Mose do dọna ẹn dọmọ: “Jaale hẹn mi yọ́n ali towe lẹ, na yẹn nido yọ́n we.” (Eksọdusi 33:13) Enẹwutu, Jehovah do jẹhẹnu etọn delẹ hia Mose. Hia Eksọdusi 34:4-6, enẹgodo dọhodo kanbiọ ehelẹ ji:
-
Jẹhẹnu Jehovah tọn tẹlẹ wẹ ewọ dohia Mose?
-
Detẹ to jẹhẹnu Jehovah tọn lẹ mẹ wẹ a yiwanna?
6. Jehovah nọ hò gbẹtọ lẹ tọn pọ́n
Whenue omẹ Jiwheyẹwhe tọn lẹ, yèdọ Heblu lẹ yin kanlinmọ to Egipti, nawẹ yajiji yetọn duahunmẹna Jehovah gbọn? Hò HOYIDOKANJI lọ bo hodo to Biblu towe mẹ, kavi hia Eksọdusi 3:1-10. Enẹgodo, dọhodo kanbiọ he bọdego lẹ ji.
-
Etẹwẹ kandai ehe plọn we gando lehe e nọ ṣí na Jehovah eyin gbẹtọvi lẹ to yaji go?—Pọ́n wefọ 7, po 8 po.
-
Be a lẹndọ Jehovah jlo nado gọalọna gbẹtọvi lẹ, podọ dọ ewọ penugo nado wàmọ nugbonugbo ya? Etẹwutu a lẹnmọ?
7. Nudida lẹ do jẹhẹnu Jehovah tọn lẹ hia
Jehovah do jẹhẹnu etọn lẹ hia gbọn nuhe ewọ dá lẹ gblamẹ. Hò VIDEO lọ. Enẹgodo hia Lomunu lẹ 1:20, bo dọhodo kanbiọ he bọdego ji.
-
Jẹhẹnu Jehovah tọn tẹlẹ go wẹ a nọ doayi to nuhe ewọ dá lẹ mẹ?
MẸDELẸ NỌ DỌ DỌ: “Jiwheyẹwhe ma yin omẹ jọnun de, dọ huhlọn de wẹ ewọ bo tin to filẹpo.”
-
Etẹ a lẹn?
-
Naegbọn a do lẹnmọ?
BLADOPỌ
Jehovah yin Gbigbọ mayinukundomọ de, podọ e tindo jẹhẹnu dagbedagbe lẹ, titengbe owanyi.
Dogbapọn
-
Naegbọn mí ma gán nọ mọ Jehovah?
-
Etẹwẹ gbigbọ wiwe yin?
-
Etẹwẹ yin delẹ to jẹhẹnu Jehovah tọn lẹ mẹ?
PỌ́N NUDỌNAMẸ DEVO LẸ
Plọnnu gando jẹhẹnu titengbe Jehovah tọn ẹnẹ delẹ go he na zọ́n bọ a na yọ́n ewọ ganji dogọ.
“Omẹ Nankọ Wẹ Jiwheyẹwhe Yin?” (Atọ̀họ̀-Nuhihọ́ lọ Tọn, Sọha 1 2019 tọn)
Gbadopọnna kunnudenu delẹ he dohia dọ Jehovah ma tin to filẹpo.
Pọ́n nuhewutu Biblu do dlẹnalọdo gbigbọ wiwe taidi alọ Jiwheyẹwhe tọn.
E vẹawuna dawe nukuntọ́nnọ de nado yise dọ Jiwheyẹwhe nọ hò etọn pọ́n. Pọ́n nuhe wá diọlinlẹnna ẹn.
“N’Mọdọ N’Sọgan Gọalọna Mẹdevo lẹ Todin” (Atọ̀họ̀-Nuhihọ́ lọ Tọn, octobre-décembre 2015 tọn)
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Tito Biblu Pinplọn Tọn Tẹwẹ Kunnudetọ Jehovah Tọn lẹ Do?
Vọnu wẹ tito Biblu pinplọn tọn Kunnudetọ Jehovah tọn lẹ tọn, podọ a gán zan lẹdogbedevomẹ Biblu tọn depope. Voawu nado ylọ whẹndo towe blebu po họntọn towe depope po wá nupinplọn lọ tẹnmẹ.
