ˈCƖAANDHƐ- 07
Ka Zoova -nɩn -ɛn?
ˈBhoo- -gwlɩˈˈ ˈdhee, -kawɛ Ɲɔnsoa Zoova -nɩn -ɛn? Ɛ nɩn ɲɔn -ɔ ˈbhle -faʋn ˈˈdhe -ɔ -tɛɛn bho -ka ˈcɩanzɩɩn nɩan -aeˈˈ ɔ se -pɛɛ ˈdhi -nɩn -ka -pʋɔˈ klaaˈˈ nɩan? Ka Zoova -nɩn gblein -ɛn? Biiblʋ a poɛ -aʋ sʋn bho -aa yea Zoova aˈ kplɩn -ˈnɩɩn jhibho ˈˈdhe -aa yeɛ i ˈŋwɔn -ke -ka ɔɔ ˈˈdua -aaˈ dɩ ɛ.
1. Dhɛɛdɩ- -a se ˈbhɛɛ- -a ˈye Ɲɔnsoa ˈjhe -ɛ?
“Ɲɔnsoa -nɩɛn- -zuu.” (Jean 4:24) Ku -glɔɲiɔn ˈbhlea ɛ sʋmʋn- Zoova ˈbhle -nɩn. Ɔ -nɩɛn- -zuu, ɔ ˈˈtiɛ ˈe jhaʋn ˈdhi, -da ɔ ˈˈtia -a se ˈbhɛɛ- -a ˈye ˈo ˈjhe.
2. Kplɩn -wɛ Zoova ˈbhle -ɛ?
-A se ˈbhɛɛ- -a ˈye Zoova ˈjhe ˈklaa -ka -aa jhibhɔ ˈkamɔn- -aa kman ɔɔˈ dɩ -wɛeˈ -ka ɔ ˈbhlea kplɩn ˈdhɔɛe -aa jhibhi. Biiblʋ ˈnaan: “Zoova -kman ˈˈɩ ˈsrɛ ɛˈ dɩ ˈˈdhe ɲʋn kpʋan ˈbho ɔ ˈˈbun in ɛn, ɔ ˈsʋbʋ bhʋ ˈdhe -za i.” (Psaume 37:28) ˈBho -ˈmɛn ˈdhe ɛ, “ɔ -kman ɲʋn anˈ dɩ ˈˈdhe ɔɔ ˈjheɛ ɲʋn anˈ -ghwɛe-.” Ɲʋn ˈdhe bho ɔɔ toa kplɩn -ˈnɩn gblein ɛn, ɛ nɩn ɲʋn -an ˈjhea ˈkle ɛ. (Jacques 5:11) “Zoova ˈˈkʋaan- ɲʋn sea ˈkpɩ ˈbhle i, ɔɔ zeiɛ ɲʋn ˈmɛan ˈkpɩi.” (Psaume 34:18) Jhibhiˈ -ka dhɩ -aa nʋan ˈbhɛɛa ˈyea Zoova ˈˈzruu- -aeˈˈ ɩn ˈyeɔ ˈmʋnan in po ɛ? -Bho ɲɔn ɔn sa dhɩsaɩn nʋn ɛnˈ, ɔɔ ˈmɛn ˈkpɩi ˈˈdhe ɛɛ nʋɛnˈ ɔɔ yea ˈˈzru. (Psaume 78:40, 41) ˈKlaa ɲɔn -ɔn nʋan dhɩjɛɩn ɛn, ɔɔ poɔ ˈmʋnan in.—Zro Proverbes 27:11.
3. -Ka Zoova kman -aaˈ dɩ ɛ, kɔɔ nʋn ɛnˈ -to sʋn -ɛn?
Ɲʋndɩkman- -mɛn -nɩn Zoova aˈ kplɩn anˈ klaɩˈˈ nɩn. -Ka Biiblʋ a nʋan ɛnˈ ˈtmʋn sʋn ɛn, “Ɲɔnsoa -nɩɛn- ɲʋndɩkman-.” (1 Jean 4:8) Ɛ se Biiblʋ aˈ ˈsʋ -ʋan- ˈtmʋn Zoova aˈ ɲʋndɩkman- anˈ dɩ -nɩn. Ɲʋn an ˈjheɛ ˈˈkpei -ke ˈdhe dhɩ ɔ nʋan ˈdhi. (Zro Actes 14:17.) Ɛɛˈ kpɔ dhueˈ -mɛn -nɩn -ka ɔ nʋan -aaˈ nʋn sʋn ɛn. -A ˈbhɛɛˈ -a ˈye dhɩ jhia -aʋ ˈdhei aˈ ˈˈjhriinmɔɛn ˈˈkpe i ˈjhe, -a ˈye ˈdhɩ ˈdhɔɛe ˈŋwɔn, -a ˈye dhiidhɩ- ˈjɛɩn ŋwɔn ˈdɩn. Ɔɔ ˈbɔn -a ˈye ˈkmʋn anˈ trɔnˈ ˈdhi jheejhee.
KPA DHƐ I ˈŊWƆƐN ƝAN
Dhɩ Zoova -jhiia i -wɛeˈ ɔ nʋan dhɩ klaɩˈˈ ɛ, ˈbɔn ɩanˈ i ˈŋwɔan in. -ˈMɛn -ŋmʋn -ka ɔ nʋan ɔɔˈ kplɩn ˈdhɔɛe -to sʋn ɛn.
4. Ɲɔnsoa aˈ -zuu gwɛai -nɩɛn- ɔɔˈ ˈˈɩkmansʋn-
-Ka -aa nʋʋan -aaˈ sɩn dhbho ɛ, ˈkamɔn- Ɲɔnsoa a nʋʋn ɔɔˈ -zuu dhbho. Biiblʋ a toɛˈ -ka ɔɔˈ -zuu sea ɲɔn -nɩn ɛn. Ɛ nɩn ɔɔˈ ˈˈɩkmansʋn- ɔɔ jhiia i -wɛeˈ ɔɔ nʋan dhɩ ɛ. Zro Luc 11:13 -e Actes 2:17, -ˈmɛn aʋ ˈtmʋn ideedɩ- nɩn anˈ dɩ:
-
-Bho -a dee- Ɲɔnsoa ɔɔˈ -zuu i ɛˈ, ɔɔ mʋn ˈdhe -a “ˈmʋn ˈˈjhii-”. -ˈMɛn ka -man ˈjhe -ɛ, Ɲɔnsoa aˈ -zuu -nɩɛn- ɲɔn -aeˈˈ ɔɔˈ ˈˈɩkmansʋn-? Dhɛɛdɩ- -man ˈdha -kaˈ -a?
Zoova -jhiiɛ- ɔɔˈ -zuu i ɔ ye dhɩ klaɩˈˈ nʋn. Zro Psaume 33:6 -e 2 Pierre 1:20, 21, -ˈmɛn aʋ ˈtmʋn ideedɩ- nɩn anˈ dɩ:
-
-Kawɛ Zoova nʋn ɔɔˈ -zuu dhbho -nʋʋn sʋn ˈdhe dɩ -ˈnɩɩn ˈdhi -ɛ?
5. Zoova ˈbhleɛ kplɩn ˈdhɔɛe
Moizɩ kpʋɛn ˈo Ɲɔnsoa ˈˈbun in -dhe, ˈklaa ɔɔ ˈbɔn ɔ ˈye ɔɔˈ Nʋin jhibho- -kajɔɔnka. Ɛɛˈ dɩ Moizɩ -ghwlu ˈdhe ɔ bho ɔ ˈnaan: “-Tɔɔn ˈmʋn -manˈ dhɩnʋnsʋn -wɛeˈ ˈye ʋn jhibho-.” (Exode 33:13) Zoova nʋn dhɛ ɔɔ ˈbɔan ˈmɛn ɔ ˈyeɔ ɲɔn ɔ nɩan -tɔɔn. Zro Exode 34:4-6, -ˈmɛn aʋ ˈtmʋn ideedɩ- nɩn anˈ dɩ:
-
Zoova aˈ kplɩn -wɛ ɔ -tɔɔn Moizɩ -ɛ?
-
Zoova aˈ kplɩn -wɛ -ɛ nʋn ʋn ˈtʋn -ɛn?
6. Zoova a ˈˈduɛ ɲʋn anˈ dɩ
Ɲɔnsoa aˈ ˈcɛ -nɩɛn- -kʋɔnbʋ- ˈdhe Ezipʋ -bhlʋaˈ -dhe. ˈKledɩ- ʋa ˈjhea, -kawɛ ɩanˈ dɩ -nɩn ˈbho Zoova -gwlɩˈˈ -dhe -ɛ? Zro Exode 3:1-10 -aeˈˈ po ɛɛˈ GHWLU ƝƲN KPƲAN -dheinˈˈ bho. -ˈMɛn aʋ ˈtmʋn ideedɩ- nɩan da ˈzɔn da aˈ dɩ.
-
-Ka Zoova a nʋan -glɔɲiɔn ɔnˈ ˈklejheɛ- ˈjhe sʋn ɛn, ka -bo nɔn ɔn nʋn -aʋ sʋn bho -po sʋn -wɛeˈ -aa ˈŋwɔɛn in -ɛn?—-Ŋmʋn ˈe ˈˈjhri -mɩɩnˈˈ 7 -e 8 ˈdhi.
-
ˈBhoo- -gwlɩˈˈ ˈdhee, Zoova a ˈbɔn ɔ ˈye -glɔɲiɔn sʋn bho po ˈˈdhe ɔ ˈbhɛɛˈ ɔ ˈyeɛ nʋn? Dhɛɛdɩ- ɔ ˈbhɛɛ ɔ ˈyeɛ nʋn -aeˈˈ dhɛɛdɩ- ɔ seɛ ˈbhɛɛ-?
7. Dhɩ Zoova poa ˈnɔn ˈkmʋn an toɛ ɔɔˈ kplɩn
ˈDhe dhɩ jhia -aʋ ˈdhei ˈdhi ɲʋn an ˈjhee ɔɔˈ kplɩn. Po ˈo VIDEO, -ˈmɛn zro Romains 1:20, ˈˈdhe aʋ ˈye ideedɩ- nɩan da ˈzɔn da aˈ dɩ ˈtmʋn.
-
Zoova aˈ kplɩn -wɛ -man ˈjhe ˈdhe dhɩ ɔ nʋan ˈdhi -ɛ?
ƝƲN -ˈNƲƲN ˈNAAN: “Ɲɔnsoa se ɲɔn -ɔ -nɩn -da dhueˈ -nɩn, ɛ nɩn ˈˈɩkmansʋn- -ʋn -gbaa i ˈnɔn ˈkmʋn ɔnˈ klɛɛ.”
-
Ka -man ˈjheɛ -ɛ?
-
Dhɛɛdɩ- -man ˈdha -kaˈ -a?
DHƐWƐ- ˈCƖAN-?
Zoova -nɩɛn- -Zuu, -a se ˈbhɛɛ- -a ˈyeɔ ˈjhe. Ɔ ˈbhleɛ kplɩn ˈdhɔɛe -duuˈˈ, ɩanˈ dhueˈ -mɩn -nɩn ɲʋndɩkman.
Dhɛwɛ- -ˈŋwɔn in -ɛn?
-
Dhɛɛdɩ- -a se ˈbhɛɛ- -a ˈye Zoova ˈjhe -ɛ?
-
Dhɛwɛ- -nɩn Zoova aˈ -zuu -ɛ?
-
Zoova aˈ kplɩn -wɛ jhibho- -ɛ?
ˈBƆN DHƖ -ˈNƖƖN ANˈ I ˈŊWƆAN IN
ˈBɔn Zoova aˈ kplɩn klaɩˈˈ ɲiɛn ɛnˈ jhibhɛ- i.
“Quelles qualités Dieu a-t-il?” (La Tour de Garde no 1 2019)
-Ŋmʋn dhɛ -ɛɛ toɛ -ka Zoova sea dhɩ aˈ klɛɛ ˈmʋin -nɩn ɛn.
“Dieu est-il partout? Est-il omniprésent ?” (Dɩ ˈghwlʋa ˈo ɛntɛɛnɛtɩ ˈˈkpe ɛ)
-Ŋmʋn dhɛɛdɩ- Biiblʋ ˈnaan Ɲɔnsoa aˈ -zuu gwɛ ɔɔˈ sʋn ɛn.
“Qu’est-ce que l’esprit saint?” (Dɩ ˈghwlʋa ˈo ɛntɛɛnɛtɩ ˈˈkpe ɛ)
ˈˈJhu dhueˈ -ɔɔˈ ˈjhea i -dhe ɛ, ɔ seɛ -gwlɩˈˈ de -dhe -ka Ɲɔnsoa ˈbhɛɛa ɔ ˈyea ɔɔˈ dɩ -kman an. Dhɛwɛ- poɔ sʋn bho -wɛeˈ ɔ zian- ɔɔˈ dhɩjhesʋn ˈˈɩn -ɛn?
“J’ai maintenant le sentiment de pouvoir aider les autres” (La Tour de Garde, 1er octobre 2015)
