LEKSION 07
Ano nga Klase sang Persona si Jehova?
Kon pamensaron mo si Jehova nga Dios, ano ang mahunahuna mo? Pareho bala sia sa mga bituon nga nagadayaw ka sa kanami, pero indi mapalapitan? Ukon pareho bala sia sa daguob nga grabe ang puersa, pero wala sing balatyagon? Ano gid bala nga klase sang persona si Jehova? Paagi sa iya Pulong ang Biblia, ginasugid ni Jehova ang pila niya ka kinaiya kag kon daw ano ka niya ka palangga.
1. Ngaa indi naton makita ang Dios?
“Ang Dios Espiritu.” (Juan 4:24) Si Jehova wala sing pisikal nga lawas. Isa sia ka Espiritu nga nagaistar sa langit nga indi naton makita.
2. Ano ang pila sa mga kinaiya ni Jehova?
Bisan indi naton makita si Jehova, matuod sia nga Persona. Kon mabal-an naton ang iya mga kinaiya, mas palanggaon naton sia. Ang Biblia nagasiling: “Si Jehova mahigugmaon sa katarungan, kag indi niya pagbiyaan ang mga mainunungon sa iya.” (Salmo 37:28) ‘Mapinalanggaon gid sia kag maluluy-on,’ ilabi na sa mga tawo nga nagaantos. (Santiago 5:11) “Malapit si Jehova sa mga nagaantos; ginaluwas niya ang mga naluyahan sing buot.” (Salmo 34:18, footnote) Kag kabalo ka bala nga apektado si Jehova sa aton mga ginahimo? Kon ang isa ka tawo maghimo sing malain, nasakitan gid sia kag nasubuan. (Salmo 78:40, 41) Pero kon ang isa maghimo sing maayo nalipay gid sia.—Basaha ang Hulubaton 27:11.
3. Paano ginapakita ni Jehova nga palangga niya kita?
Ang panguna gid nga kinaiya ni Jehova amo ang gugma. Ang matuod, “ang Dios gugma.” (1 Juan 4:8) Ginpakita ni Jehova ang iya gugma indi lang paagi sa Biblia, kundi sa iya man mga gintuga. (Basaha ang Binuhatan 14:17.) Binagbinaga kon paano niya kita ginhimo. Gindesinyo niya kita nga makita ang matahom nga mga kolor, mabatian ang manami nga musika, kag matilawan ang manamit nga pagkaon. Gusto niya nga mangin malipayon kita.
USISAA PA GID
Hibaluon naton kon paano ginhimo ni Jehova ang matahom nga mga butang kag kon paano niya ginapakita ang iya manami nga mga kinaiya.
4. Ang balaan nga espiritu amo ang aktibo nga puersa sang Dios
Pareho sang aton mga kamot nga ginagamit naton sa pag-obra, ginagamit man ni Jehova ang iya balaan nga espiritu. Suno sa Biblia, ang balaan nga espiritu indi isa ka persona, kundi aktibo ini nga puersa ukon gahom sang Dios nga ginagamit niya sa paghimo sang mga butang. Basaha ang Lucas 11:13 kag Binuhatan 2:17, dayon binagbinaga ini nga mga pamangkot:
-
“Ibubo” sang Dios ang iya balaan nga espiritu sa mga nagapangayo sini. Ti sa banta mo, ang balaan nga espiritu bala Dios, ukon aktibo nga puersa sang Dios? Ngaa?
Ginagamit ni Jehova ang iya balaan nga espiritu para mahimo ang dalayawon nga mga butang. Basaha ang Salmo 33:6 kag 2 Pedro 1:20, 21, dayon binagbinaga ini nga pamangkot:
-
Ano ang pila ka paagi nga gingamit ni Jehova ang iya balaan nga espiritu?
5. Ang manami nga mga kinaiya ni Jehova
Si Moises isa ka matutom nga alagad sang Dios, pero gusto niya nga makilala pa gid ang iya Manunuga. Amo nga nagsiling sia sa Dios: “Ipahibalo sa akon ang imo mga dalanon, agod makilala ko ikaw.” (Exodo 33:13) Gani ginsugid ni Jehova kay Moises ang pila Niya ka kinaiya. Basaha ang Exodo 34:4-6, dayon binagbinaga ini nga mga pamangkot:
-
Ano nga mga kinaiya ni Jehova ang ginsugid niya kay Moises?
-
Ano nga mga kinaiya ni Jehova ang nanamian mo gid?
6. Nagaulikid gid si Jehova sa mga tawo
Ang katawhan sang Dios sadto, ang mga Hebreo, naulipon sa Egipto. Ano ang ginbatyag ni Jehova sang nakita niya ang ila pag-antos? Pamatii ang AUDIO kag sundi ini, ukon basaha ang Exodo 3:1-10. Dayon binagbinaga ang masunod nga mga pamangkot.
-
Base sa sini nga mga bersikulo, ano ang ginabatyag ni Jehova kon nagaantos ang mga tawo?—Tan-awa ang bersikulo 7 kag 8.
-
Sa banta mo, gusto gid bala buligan ni Jehova ang mga tawo, kag masarangan bala niya ini? Ngaa?
7. Makita sa mga tinuga ang mga kinaiya ni Jehova
Ginapakita ni Jehova ang iya mga kinaiya paagi sa iya mga tinuga. Tan-awa ang VIDEO. Dayon basaha ang Roma 1:20, kag binagbinaga ang masunod nga pamangkot.
-
Ano nga mga kinaiya ni Jehova ang nakita mo sa mga butang nga iya ginhimo?
KON MAGSILING ANG IBAN: “Indi naton makita ang Dios, ti indi man naton sia makilala.”
-
Ano ang isabat mo?
-
Ngaa amo sina ang imo pagpati?
SUMARYO
Si Jehova isa ka Espiritu kag indi naton sia makita. Pero madamo sia sing manami nga kinaiya, ilabi na ang gugma.
Rebyu
-
Ngaa indi naton makita si Jehova?
-
Ano ang balaan nga espiritu?
-
Ano ang pila ka kinaiya ni Jehova?
DUGANG NGA IMPORMASYON
Kilalaha pa gid si Jehova paagi sa pagtuon sa iya apat ka panguna nga kinaiya.
“Ano ang mga Kinaiya sang Dios?” (Ang Lalantawan Num. 1 2019)
Basaha ang ebidensia nga sala ang pagpati nga si Jehova ara bisan diin.
Hibalua kon ngaa ginatawag sang Biblia ang balaan nga espiritu nga kamot ukon tudlo sang Dios.
Ang isa ka bulag wala nagapati nga ang Dios nagaulikid sa iya. Basaha kon ano ang nagpabag-o sa iya pagpati.
“Nabatyagan Ko Na nga Makabulig Ako sa Iban” (Ang Lalantawan, Oktubre 1, 2015)
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
