LEKSION 07
Anni nga Klase na Dios si Jehova?
Anni i manono mu nga itchura anna personalidad ni Jehova nga Dios? Mappabbaw ka kari nisa ngem matageno mu nga ararayyu yayya kagitta na star ira ta ararayyu nga galaxy? Onu manono mu kari nga makapangngua yayya ngem awan tu kualidadna kagitta na arugug onu addug? Ngem anni talaga nga klase na Dios si Jehova? Mabibbig tam ta Biblia i kualidad ira ni Jehova anna i pangikavurungna nikaw.
1. Ngatta ariattam masingan i Dios?
“I Dios ay Espiritu.” (Juan 4:24) Awan tu pisikal nga baggi ni Jehova. Espiritu yayya nga maddian ta langi—ta lugar nga ariattam masingan.
2. Anni ira i karuan nga kualidad ni Jehova?
Ariattam nga masingan si Jehova, ngem kurug yayya nga Persona anna ayatattam yayya megafu ta makakkasta ira nga kualidadna. Kagian na Biblia: “Ayatan [ni Jehova] i matunung ira; arian na nga pagurayan i mekatalo nga totolay na.” (Salmo 37:28) “Minaggallallo anna minaggiddeddu” yayya, mas ngana ta mazziga-riga ira nga totolay. (Santiago 5:11) “Aranni i YAFU ta makafi i nono da; arian na nga pagurayan danuri i awan tu iddanama.” (Salmo 34:18) Ammum kari nga mafektan si Jehova ta kukukuattam? Kunnasi? Marraddam yayya nu marake i kukukuattam. (Salmo 78:40, 41) Magayayya gapa yayya nu mapia i kukukuattam.—Bibbigan i Proverbio 27:11.
3. Kunnasi nga ipasingan ni Jehova i ayana ta nittam?
Aya i primeru nga kualidad ni Jehova. Kakuruganna, “i Dios ay aya.” (1 Juan 4:8) Mabibbig tam ta Biblia i aya ni Jehova anna masingattam gapa yatun ta pinaratuna ira. (Bibbigan i Kingngua 14:17.) Angngariganna, ikonsideram i pinamaratuna nittam. Iniddanna ittam tu pakawayya nga makasingan tu makakkasta ira nga kulor, makaginna tu makapagayayya ira nga musika, anna makakan tu masingngo ira nga makan. Kayàna nga magayayya ittam ta pattolay.
GIGIAMMUAN I ARU PAGA
Gigiammuan nu kunnasi nga kiningngua ni Jehova i makapabbaw ira nga gannug. Ammuan gapa nu kunnasi nga ipasingan anna ipatageno ni Jehova i makakkasta ira nga kualidadna.
4. Masanto nga espiritu—aktibo nga fuersa na Dios
Usattam i lima tam ta pattrabahu. Usan gapa ni Jehova i masanto nga espirituna. Kagian na Biblia nga ari tu persona i masanto nga espiritu, fuersa yatun na Dios nga usu-usanna tapenu kuan i ganna-gannug. Bibbigan i Lucas 11:13 anna Kingngua 2:17, anna paguvovugan yaw ira nga pakkiavu:
-
“Iyaluvu” onu iyawa na Dios i masanto nga espirituna ta makkiddaw ira nisa. Anni gafu i makagim, tadday kari nga persona i masanto nga espiritu, onu aktibo nga fuersa na Dios? Ngatta?
Usu-usan ni Jehova i masanto nga espirituna tapenu kuan i makapabbaw ira nga gannug. Bibbigan i Salmo 33:6 anna 2 Pedro 1:20, 21, anna paguvovugan yaw nga pakkiavu:
-
Anni ira i nituppal ni Jehova megafu ta masanto nga espirituna?
5. Egga i makakkasta ira nga kualidad ni Jehova
Maski nu matalo nga aripan na Dios si Moises, kayàna paga nga mammammu tu mapia i Namaratu. Kinagina ta Dios: “Ipakannammum niakan i dala-dalammu, tapenu mammammu taka.” (Exodo 33:13) Yatutta nipakannammu ni Jehova kani Moises i kualidadna ira. Bibbigan i Exodo 34:4-6, anna paguvovugan yaw ira nga pakkiavu:
-
Anni ira nga kualidad ni Jehova i nipakannammuna kani Moises?
-
Anni nga kualidad ira ni Jehova i nagustuammu?
6. Ikavurungan ni Jehova i totolay ira
Naaripan ta Ehipto i totolay ira na Dios, i Hebreo ira. Anni i natageno ni Jehova ta pazziga-rigada? Ginnan i AUDIO, onu bibbigan i Exodo 3:1-10. Kabalinna, paguvovugan i tumunug ira nga pakkiavu.
-
Anni i magigiammum taw meyannung ta mataga-tageno ni Jehova ta pazziga-riga na totolay?—Innan i versikulo 7 anna 8.
-
Kurugammu kari nga kayà anna mawayya ni Jehova nga uffunan i totolay ira? Ngatta?
7. Magigiammu tam i kualidad ira ni Jehova ta pinaratuna ira
Nipakannammu ni Jehova i kualidadna ira gukaban na pinaratuna ira. Girawan i VIDEO. Kabalinna, bibbigan i Roma 1:20, anna paguvovugan i tumunug nga pakkiavu.
-
Anni nga kualidad ni Jehova i masingammu ta pinaratuna ira?
I KAGIAN NA KARUAN: “Ariakku mangurug nga awayyà mammammu i Dios.”
-
Kurugammu kari yatun?
-
Ngatta kunnatun i makagim?
ANNI I NAGIGIAMMUM?
Ariattam masingan si Jehova megafu ta Espiritu yayya. Aru i makakkasta ira nga kualidadna kagitta na aya.
Review
-
Ngatta ariattam nga masingan si Jehova?
-
Anni i masanto nga espiritu?
-
Anni ira i karuan nga kualidad ni Jehova?
I AWAYYAM PAGA KUAN
Gigiammuan i appa nga primeru nga kualidad ni Jehova tapenu mas mammammum paga yayya.
Innan i pamakurug ira nga si Jehova ay ari tu egga ta ngamin nga ganna-gannug.
“Egga Kari i Dios ta Ngamin nga Lugar?” (Artikulo ta website)
Ammuammu nu ngatta kagian na Biblia nga i masanto nga espiritu ay lima na Dios.
Narigatan i vulag nga lalaki nga kurugan nga iddukan yayya na Dios. Innan nu anni i nakoffun nisa nga ulian yatun nga panagenona.
“Matageno Ku Ngana nga Egga Meyuffukku ta Tanakuan” (Passifusifutan, Oktubre 1, 2015)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
