ƐLĀ Ō NWU ƆMƐ 07

Ɔdi Nɛ Ubáyíbu Da Alɔ Lɛyikwu Ujehofa A?

GBƆƆ

Ɔdaŋ ku a gbɛlá lɛyikwu Ujehofa, ɔdi gē wa ipu ɔtu ku uwɔ a? Ācɛ ōhī gbɛlá ka ɔfu ku Ɔwɔico nwune ibi ku aa i cɛgbá lɛ ɔ fluflu ŋ. A gbɛla ku Ɔwɔico wɛ ɔcɛ nōo lɔfu nɛhi nɛ ó gē lɛ ɛlá wu alɔ ŋ? Ɔdi nɛ Ubáyíbu da alɔ lɛyikwu Ujehofa piii a? Ubáyíbu da alɔ auce ō ya ku Ujehofa. Ó klla da alɔ ka Ɔwɔico lɛ ɛlá wu alɔ.

1. Ɔdiya nɛ alɔ i má Ɔwɔico eyī gla ŋ ma?

“Ɔwɔicō wɛ Alelékwū.” (Ujɔ́ni 4:24) Ujehofa i Iɛ ɔkpiye bɛɛka ɔcɛ ɔlamu a ŋ. Ó wɛ Alelekwu nōo lā ɔkpanco, ɛga nɛ alɔ i má mla eyī ku alɔ gla ŋ.

2. Ɔdi wɛ uce ō ya ku Ujehofa ōhī a?

Alɔ i má Ujehofa eyī gla ŋ. Amáŋ ɔdaŋ ku alɔ gáā lɛ ɔ jé, alɔ géē yihɔtu nu ohigbu ka ó wɛ ɔcɛ nōo lɛ aɛnɛɛnɛ uce olɔhi nōo gē cɛ lɛ alɔ tubla ɔ. Ubáyíbu kahinii: “Ɔdā nōo le kpaakpa he Óndú ā ɔtū á. Ó gē kwu hɛ́ ācɛ ɔlɛ́ nū ā tá ŋ́.” (Aíjē Kú Ɛ̄gbā 37:28) Ó “gbonɛnɛ, klla kē ī méyinyinyi ɔ̄cɛ,” ó fiyɛ duu a ɛgiyi ācɛ nōo gē má ōwē a. (Ujɛ́mīsi 5:11) “Óndú ā gē kwu ācɛ nɛ̄ ɔtū kú uwā le gbenyi ā ajaajɛ. Ó klla gē nya ācɛ nēé lɛ eyīyōce ŋ́ mā tá.” (Aíjē Kú Ɛ̄gbā 34:18) A jé ku alɔ lɔfu ya ku Ujehofa kóō cɔnu amāŋ gweeye gla? Ɔcɛ duuma nōo cɛ ō ya ɔdobɔbi a yɔ i lɛ Ujehofa abɔ gaajɛ klla yɔ i ya ɔ cɔnu. (Aíjē Kú Ɛ̄gbā 78:40, 41) Amáŋ ɔcɛ duuma nɛ ó cɛ ō ya ɔdā okpaakpa a gē cɛ lɛ ɔtu he Ondu a.—Jé Aíita 27:11.

3. Ɛgɛnyá nɛ Ujehofa mafu ka ó yihɔtu alɔ a?

Ɛnɛɛnɛ uce ō ya ku Ujehofa nōó lɛ ɛdɔ ŋ ma wɛ ihɔtu. Ɔkwɛyi wɛ ka, “Ɔwɔicō wɛ ihɔtū.” (1 Ujɔ́ni 4:8) Ó wɛ ipu Ubáyíbu foofunu nɛ Ujehofa mafu ihɔtu ku nu lɛ alɔ a ŋ, amáŋ ó bu ipu aɔdā nɛ ó ya a duu. (Jé Úklɔ́ kú Ācotɛ̄hɔ̄ 14:17.) Leyi yɛ ocabɔ ku ɛgɛ nɛ ó ya alɔ nōo wɛ alɛɛcɛ a. Ó ya alɔ ku alɔ má ɛnɛɛnɛ aukɔlɔ, jɔɔnyɛ ō po aijé klla jɔɔnyɛ ɔdole ɛyɛɛyɛyi. Ó dɔka ku alɔ jɔɔnyɛ oyeeyi.

JÉ GƆBU

Nwu ɛgɛ nɛ Ujehofa ya auklɔ idaago lɛ a. Ku a klla má ɛgɛ nɛ ó mafu ɛnɛɛnɛ auce olɔhi ō ya nɛ anu abɔyinu lɛ a.

4. Alelekwu ihɔ wɛ ɔfu nɛ Ɔwɔico gē bi le yuklɔ

Ɛgɛ nɛ alɔ gē bi abɔ ku alɔ le yuklɔ a, ɛgɔɔma nɛ Ujehofa gē bi alelekwu ihɔ ku nu le yuklɔ duu a. Ubáyíbu mafu ka alelekwu ihɔ a i wɛ ɔlɛɛcɛ ŋ, amáŋ ó wɛ ɔfu nɛ Ɔwɔico gē bi le yuklɔ. Jé Ulúku 11:13 mla Úklɔ́ kú Ācotɛ̄hɔ̄ 2:17, cɛɛ ku aa kɔka lɛyikwu aɔka nōo ba nyā:

Ɔwɔico géē “cē” alelekwu ihɔ ku nu kla ācɛ nōo ba ŋma ɛgiyi nu a. Ohigbu ɛnyā, a gbɛlá ka alelekwu ihɔ ku Ɔwɔico a wɛ ɔcɛ nɛɛ kɛɛ ka ɔfu ō bi le yuklɔ ku nu? Ɔdiya nɛ a ka lɛ a?

Ujehofa gē bi alelekwu ihɔ ku nu le ya uklɔ idaago alɛwa. Jé Aíjē Kú Ɛ̄gbā 33:6; mla 2 Upíta 1:20, 21, cɛɛ ku aa lɛ kɔka lɛyikwu ɔka nyā:

Ɔwɛ ōhī nyá nɛ Ujehofa bi alelekwu ihɔ ku nu le yuklɔ ɛ ma?

5. Ujehofa lɛ aɛnɛɛnɛ uce ō ya olɔhi

Umosisi wɛ ɔcɛ nōo hayi kpaakpa ipu ɛ̄gbā ō gba ku Ujehofa, amáŋ ó dɔka ō jé ɔcɛ nōo ya ɔ a tōōtɔ̄ɔ̄. Umosisi da ɔ kahinii: “Lɛ ɔdā nāa miya ipú ɔtū ka uwɔ ka anúɔ gaá yá ā ka gā um.” (Oōyɛbɛ̄ɛcɛ 33:13) O bu ipu ohi nɛ Ujehofa je lɛ ɔ a, ó da ɔ ɛdɔ ku ɔcɛ nɛ ó wɛ a. Jé Oōyɛbɛ̄ɛcɛ 34:4-6 cɛɛ ku aa lɛ kɔka lɛyikwu aɔka nōo ba nyā:

Ɛdɔ uce ō ya ku Ujehofa nyá nɛ ó ka lɛ Umosisi a?
Uce ō ya ku Ujehofa nyá kē he uwɔ ɔtu a?

6. Ujehofa gē lɛ ɛlá wu ācɛ

Ācɛ ɔlɛ Ujehofa nōo wɛ ācɛ ku Uhibru a wɛ ɔfiyɛ ipu éwo ku Ijipiti. Ɛgɛnyá nɛ owe néē yɔ i má a lɛ abɔ kwu Ujehofa iyē a? Lɛ ƆKƐLA Ō GWOTU nyā ce ɔ, cɛɛ ku a yɔ i yɛce ɔ amāŋ jé Oōyɛbɛ̄ɛcɛ 3:1-10. Cɛɛ ku aa kɔka lɛyikwu aɔka nōo ba nyā.

ƆKƐLA Ō GWOTU: Ujehofa Lɛ Ɛlá Wu Uwa Abɔ É Yɔ I Má Owe A (2:45)

Ɔdi nɛ ɛnyā yɔ i nwu uwɔ lɛyikwu ɛgɛ nɛ ɔtu gē ya Ujehofa lɛyikwu owe nɛ alɛɛcɛ gē má a?—Má ɔgba 7 mla 8.
A gbɛla ka Ujehofa dɔka ō ya odee lɛyikwu owe nɛ alɛɛcɛ gē má a? A gbɛla ka ó lɔfu ō ya odee lɛyikwu owe a? Ɔdiya nɛ a ka lɛ a?