ANG ỌJẸ́JẸ 07

Ányị IJihova à Tị́ La?

Ányị a tị́ me irya ká iJihova la? À yọọ lala ọngọlẹ kọ la ẹbyẹbyị, ma kọ tị lụrụ pyiipyii hing lala ịdịchụ iluhye-ọgba? Lee à tị́ yọọ lala ọngọlẹ kọ la ọngịrị, ma kọ tị la abwẹla ọhẹ datị ka lala ịkpala? Ányị iJihova à tị́ la kpangga? IJihova chị abwụma nyamwụ ehe bwula Omyi Ẹla nyamwụ. Ọ myịmyị kpa Omyi Ẹla ọọwa mẹjẹ nyori ọ kpahị jung.

1. Ịyẹ tị́ du kahị jẹ́-ẹ yẹ Ohe ka?

“Ohe Oluhye . . . ri olegu.” (ỊJọn 4:24) IJihova á la ugbinyịrọ lala ahị ka. O ri Olegu ịnyị. Epwoohe o ji lẹ, áhị tị jẹ́-ẹ yẹ epwoohe ka.

2. Abwụma iyina iJihova à tị́ la?

Nanana nyori áhị jẹ́-ẹ yẹ iJihova ka, ọ la abwụma ịnyịịla-ịnyịịla ịlẹ kị kaa tụ́ụhị jwoo chwẹẹ ụka kahị wẹ ka jọ́ọ. ỊBayịbụụ yẹkẹẹ: “Ang ọlẹ kọ la kpakpa-à há [iJihova] lẹ, ọ́ ka nyẹẹkpẹ da angịnyị ịkpẹẹkpẹẹ nyamwụ ka. (Eje Ọnyịịla 37:28) O ri “Ọlọnahị bala Ọngọ la ahyẹẹrwẹrwa lụmẹ” ịnyịnyị, ọgụgụụgụ ẹ-ẹga nya angịlẹ kị ja yẹ akama. (IJemsi 5:11) IJihova “ju angị la ọkịlẹtụ ọ-kpụ enyi chwẹẹ, ọọ chị angịlẹ ká ahị ọdahile gwaa myị da.” (Eje Ọnyịịla 34:18) À jẹ́ nyori ang ọlẹ kahị họ ka jẹ́-ẹ kpa iJihova chị ọkẹkẹnị lee ọ-wọọ ẹjẹ? Ọngịnyị ọlẹ kọ chụ nyọka họ ang ọtịpyọ kaa họ ẹla wụ iJihova ẹjẹ bala ọ-bịrị ahị ọdahile ọlẹ ká iJihova la ẹ-ẹga nyamwụ. (Eje Ọnyịịla 78:40, 41) Ma ọngọlẹ kọ họ ang ọnyịịla kaa kpa ọkẹkẹnị wọọ.—Wa Etu 27:11.

3. Ányị iJihova à tị́ bwu mẹjẹ nyori ahị họ́ọ?

Ọháha à ri abwụma nya iJihova ọlẹ kọ gụgụ wuu lẹ. “Ọháha . . . Ohe Oluhye a ri lẹ.” (1 ỊJọn 4:8) IJihova á mẹ ọháha nyamwụ jẹ bwula ịBayịbụụ kem ka, ma ọ họ ịnyị bwula ang ịlẹ kọ họ. (Wa Ụkụrwọ nya Alẹrụ 14:17.) Ọ-chụ pwokwita, kụ irya nya abwọlẹ kọ họhị wẹẹ. Ọ họhị kahị ka jẹ́-ẹ yẹ ido ịhụ́hị-hụ́hị, ke ụrụ wo ang odudu ịkpịpyọ-kpịpyọ, bala ọ-jẹ́ ịpyọ nya ang oriri. Ọ tịtọ ká ọhịhị ka kpụhị ịpyọ.

JẸ́ GỤ ỌỌWA

Jẹ́ ang ọlẹ ká iJihova kaa kpa họ akụrwọ ịlẹbyẹbyị. Ká myịmyị yẹ jaabwọ ká iJihova bwu chị abwụma ịnyịịla-ịnyịịla nyamwụ ehe bala ọ-maa jẹ ẹ-ẹga nyahị.

4. Olegu ịgọgọ ri ọngịrị nya Ohe

Jaabwọ kahị kaa kpa ụbwọ nyahị họ ụkụrwọ, ịnyị iJihova à kaa kpa olegu ịgọgọ nyamwụ họ ụkụrwọ lẹ. ỊBayịbụụ mẹjẹ nyori olegu ịgọgọ á ri ọngịnyị ka, ma o ri ọngịrị ọlẹ ká Ohe Oluhye kaa kpa họ ang ịnyị. Wa iLuku 11:13 bala Ụkụrwọ nya Alẹrụ 2:17, kanụ ya ẹla u-uhye nya ịtọ ẹla ịlẹ:

Ohe ka ya olegu ịgọgọ nyamwụ “chị kụrụ” angịlẹ kị bịlọọ. Lẹ, à tị́ me irya ká olegu ịgọgọ ri ọngịrị nya Ohe lee ang ọkịla tị́? Ịyẹ tị́ du ká ya ịnyị?

IJihova kpa olegu ịgọgọ họ ang ịtụka-ịtụka. Wa Eje Ọnyịịla 33:6 bala 2 iPita 1:20, 21, kanụ ya ẹla u-uhye nya ịtọ ẹla ọlẹ:

Agbẹyị iyina iJihova à tị́ kpa olegu ịgọgọ nyamwụ họ ụkụrwọ ụka ọhẹ lẹ?

5. IJihova la abwụma ịnyịịla-ịnyịịla

IMosisi ri ọnchẹ nya Ohe Oluhye ọlẹ kọ chịla o-hu ọkịlẹtụ ha, ma ọ tịtọ nyọka jẹ́ Ọngọ họọ họ gụ ọọwa. Lẹ iMosisi byoo yẹkẹẹ: “Me irya nyang jẹm chajị kam ka juwa myịng ẹrụ [lee ọ-jẹ́ng] mẹ.” (Ehe Ọkpụkpụ 33:13) Chajị nyọọwa lẹ, iJihova chị abwụma nyamwụ ịhyẹ ehe mẹjẹ iMosisi. Wa Ehe Ọkpụkpụ 34:4-6, kanụ ya ẹla u-uhye nya ịtọ ẹla ịlẹ:

Abwụma nya iJihova iyina ọ tị́ mẹjẹ iMosisi?
Abwụma nya iJihova iyina à tị́ háng ahụ gụgụụgụ?

6. IJihova kaa kpahị ju angịnyị

Ala iHiburu, kị ri angịnyị nya Ohe, ri anyịhị ọ-ọpyị nya Ijipiti ene-ene. Ányị ọ tị́ la iJihova nyọlẹ ká angịnyị nyamwụ juwa yẹ akama? Ke ụrụ wo ẸLA ỌKỊLA-JU ọlẹ, ká ja kpa ịBayịbụụ nyang bọọ jẹ, lee wa Ehe Ọkpụkpụ 3:1-10. Kanụ ya ẹla u-uhye nya ịtọ ẹla ịlẹ.

ẸLA ỌKỊLA-JU: Akama Nyaa Gu IJihova ọ-Ọkịlẹtụ (2:45)

Ẹlịyẹ ẹla ọla ẹgẹwẹ à tị́ mẹjẹ́ng u-uhye nya abwọlẹ ká iJihova yẹ akama nya angịnyị ehe?—Yẹ ọgba 7 bala 8.
À me irya ká iJihova tịtọ nyọka da angịnyị ehe ụbwọ? Ọ la ọngịrị nyọka họ ịnyị? Ịyẹ tị́ du ká ya ịnyị?