UKỌCHẸ 07
Ọla Ẹnẹ Jihofa Che?
Ichẹñwu k’ẹ kpibe lugbo Jihofa, ọla ẹnẹ ẹ neju kaki i che? Ẹ neju kaki ẹnẹ k’a neke d’ojima ñwu i che, ama i chẹ jiji ru wa alu k’amilawo jiji ru anẹ-ilẹ-i? Abẹki ẹ neju ka k’Ọjọ ch’ẹnẹ ki nukpahiu ki ma muda n’ejumomi n? Ọla ẹnẹ Jihofa che ochochi? Baibul du t’ejugede ọla ẹnẹ ki Jihofa che kpai alu ki adeju t’uwẹ.
1. Ẹñwu chi ka ma neke li Ọjọ n?
“Ọjọ ch’Afu.” (Jọn 4:24) Jihofa n’ọrẹla dabu onẹ n. Jihofa ch’Afu ki gugu efojale ugbo k’eju ma li n.
2. Ẹñwu ch’amali ọmẹmẹlẹ ki bọ ki Jihofa nẹ?
A neke li Jihofa n, ama ichẹñwu ka fu ma, i n’amali ọmẹmẹlẹ ki ajẹñwu wa tẹmẹru. Baibul kakini: “Jihofa afẹdọ ajọ ọkpakpa; i la ahi abo ku ma kpẹdọ r’owñ tinyọ n.” (Eli Ekọ D’Ọjọ 37:28) I ñọ “n’ẹdọ ki ach’iwọ onẹ gbẹ, i ali ejumomi onẹ,” ololo-wñ ch’amẹnọbata. (Jemis 5:11) “Jihofa mẹr’abo k’ẹdọ-ma ch’ẹkpabiẹ, i la ajadu abo k’ẹwñ ku ma che akwobi awọ ma gbali.” (Eli Ekọ D’Ọjọ 34:18) Ẹ che ma kaki am’ẹñwu k’a ache neke jẹñwu ẹdọ Jihofa bọ, abẹk ekpabiẹ? Ichẹñwu k’onẹ tu ki ch’ẹbiẹnẹ, i ajẹñwu ẹdọ Jihofa kpabiẹ. (Eli Ekọ D’Ọjọ 78:40, 41) Ama ẹnẹ ki achẹñwu ẹnyọ ajẹñwu ẹdọ Jihofa bọ.—Gba Ita Ita 27:11.
3. Abu Jihofa du ña kaki i afẹdọ wa?
Ufẹdọ ch’ali ki tọgba ñw’amali ki bọ ki Jihofa nẹ. Ochochi, “Ọjọ ch’ufẹdọ.” (1 Jọn 4:8) Jihofa d’ufẹdọ-wñ tejugede lefu Baibul kate n, i ño du tejugede lefu amẹñwu ki nyi gẹ. (Gba Ẹwñ 14:17.) G’ujiwe ọna ki nyi wa le. Jihofa nyi wa ọna k’a neke li ikọlọ am’ẹñwu ojoji ojoji ki ach’utọ, k’a neke gbọ eli ọmẹmẹlẹ manyu em’urinyọ am’ujẹñwu k’a jẹ. Jihofa atene k’a jura.
N’UMA NYỌGBA
Kọchẹ alu ki Jihofa ach’amẹñwu awuwu le. Ubilẹ, g’alu ki Jihofa ad’amali ọmẹmẹlẹ-wñ ki nẹ ña wa.
4. Afu kiafọ ch’ukpahiu ki kwugbo Ọjọ
Dabalu k’a d’ọwọ wa ch’ukọlọ, abalẹ Jihofa ad’afu-wñ kiafọ chekwu i. Baibul du tejugede kakini, afu kiafọ ch’Ọjọ i che n, ama ukpahiu k’Ọjọ adu ch’amẹñwu i che. Gba Luku 11:13 kpai Ẹwñ 2:17. Ubilẹ, mẹ ch’oluka oji am’ene-i:
-
Ọjọ ad’afu kiafọ “dany’oji” abo ku ma abi ebi-wñ. Todulẹ, ẹ neju kaki afu kiafọ ch’Ọjọ abẹki ukpahiu k’Ọjọ adu chẹñwu i che? Ẹñwu chi k’ẹ k’abalẹ?
Jihofa ad’afu-wñ kiafọ ch’amẹñwu awuwu. Gba Eli Ekọ D’Ọjọ 33:6 kpai 2 Pita 1:20, 21. Ubilẹ, mẹ ch’oluka oji ene-i:
-
Ẹñwu ch’amọna ki Jihofa d’afu-wñ kiafọ chekwu?
5. Jihofa che n’amali ọmẹmẹlẹ
Mosis ch’ẹnẹ ki dago kpaka efu arẹ Ọjọ. Ama i atene ki m’Ọjọ ki nyiu nyọnyọ. Oñ Mosis ka ñwu kakini: “Ẹ k’ọn’Ọna-wẹ ña mi k’omi ki f’uwẹ ma.” (Akwodufu 33:13) Jihofa dohi ñwu Mosis lefu ed’amali-wñ ka ñọ. Gba Akwodufu 34:4-6, ubilẹ mẹ ch’oluka oji amene-i:
-
Ẹñwu ch’amali ọmẹmẹlẹ ki Jihofa du tejugede ñwu Mosis?
-
Ẹñwu ch’amali Jihofa k’uwẹ añeju tule?
6. Jihofa akwula ñwu wa
Abo Israẹl, amẹnẹ Ọjọ, che adu ojanẹ Ijipti. Abu ẹdọ Jihofa dẹ ẹgba k’abo-wñ ach’ọbata? Du Baibul ku ma rẹkọdu no k’e netiru alo, abẹki mẹ gba Akwodufu 3:1-10. Ubilẹ, mẹ ch’oluka oji am’ene-i.
-
Ẹñwu oji Baibul-i jẹñwu ẹ ma lugbo alu ki Jihofa ali amonẹ ku ma chọbata le?—G’ọgba 7 kpai 8.
-
Ẹ neju kaki Jihofa atene ech’abunẹ amonẹ, i la che bọjọ ki che ochochi? Ẹñwu chi k’ẹ k’abalẹ?
7. Amẹñwu ki Jihofa nyi che d’amali ọmẹmẹlẹ ki nẹ ña
Jihofa d’amali-wñ ña lefu amẹñwu ki nyi. G’IFIDIO-i. Ubilẹ, gba Abo Rom 1:20, ku mẹ ch’oluka oji ene ki rọno-i.
-
Ẹñwu ch’amali Jihofa k’ẹ li kwefu amẹñwu ki nyi?
ABO KA KAKINI: “Ọjọ d’ugbo duu.”
-
Ẹñwu ch’ibe wẹ?
-
Ẹñwu chi k’ẹ k’abalẹ?
ẸY’ỌLA UKỌ-I
Jihofa ch’Afu k’onẹ ma neke li n. I che n’amali ọmẹmẹlẹ wewe dab’ufẹdọ.
Ẹñwu ẹ kọchẹ?
-
Ẹñwu chi k’a ma neke li Jihofa n?
-
Ẹñwu ch’afu kiafọ?
-
Ẹñwu ch’amali ọmẹmẹlẹ ki Jihofa nẹ?
KỌCHẸ MANYU
K’ẹ neke m’ọla ẹnẹ ki Jihofa che nyọnyọ, kọchẹ manyu lugbo am’ali ogbogaga mẹlẹ ki Jihofa nẹ.
G’ijali ki du tejugede kaki Jihofa d’ugbo duu dab’alu k’amonẹ aka n.
G’ẹñwu ki chi ki Baibul kaki afu kiafọ ch’ọwọ Ọjọ i che.
I chẹgbiti ñwu ẹnẹkẹlẹ afeju ka ki k’ẹdọno kaki Jihofa akwula ñwu. Tejanẹ ẹñwu ki jẹñwu r’ibeda.
“Abajọ-i U Li Kaki U Neke Ch’atẹko Amonẹ” (Ọdọgọ Ide, October 1, 2015)
