TOLUMỌYE 07

Jehovah Tebara K’emi Ọkpọnanaowei A O?

FARỊ

Jehovah emi bara mị ị́ mọ iroro daba, teeki ịkịọụ a sụọ mịnị a o? Agụrabo anịghakpọ ịkịkaịmọ sẹrịị emi bara bị, Ọkpọnanaowei kpọ bịsẹ bara ka kị ị́ mọ mọ́ sẹẹrị emi a o? Ị́ tọn bara mị, Ọkpọnanaowei agbararagbururu bara k’emi a? Gbẹsịị mị, Jehovah tebara k’emi a o? Bible mị Jehovah inyenrinbụọmọ, má omịnị ịna dịsẹ nana emi bara gbaa wẹrị emi.

1. Tetuu kị duonị omịnị Ọkpọnanaowei ẹrịgha o?

“Ọkpọnanaowei Tẹmẹ.” (John 4:24) Jehovah mẹnị angọ nanagha. Omịnị tẹmẹ angọ kị nana wẹrị emi má agọnọ kị inyenrin mịnị, anịkị duonị omịnị wó ẹrị a paagha.

2. Te inyenrinbụọ-ama kị Jehovah mọ nana wẹrị emi a o?

Omịnị Jehovah ẹrị a paagha kị gbaa kpọ, omịnị ụ tolumọ nimi dẹ sẹ, Jehovah ebi inyenrinbụọmọ wó mịẹ ụ tarị mịnị. Bible gbaa mị: “Jehovah kịrị ụgụla pẹlẹ inyenrinbụọ tarị wẹrị emi, má omịnị ụ mọ mọ́ kpẹkpẹrẹẹ emi otumọ gbeinmọ koromọgha fa.” (Psalm 37:28) Omịnị “zụzụ tarị má dienini,” nana wẹrị emi. Gbẹsịị mị, omịnị ụya fị mịnị otu kị dienini dẹịn emi. (James 5:11) “Jehovah bolouịmbẹlẹgha otumọ naịn k’emi; omịnị suusụọdẹ otu zụọbụọmọ mịnị.” (Psalm 34:18, footnote) Wó mịẹ emi yemọ Jehovah gbele mịnị bara ị́ mọ nimi wẹrị emi? Sei kị dịsẹ wẹrị mịẹ mịnị kịmịsẹ, Jehovah bolouịmbẹlẹ pịrịgha. (Psalm 78:40, 41) Anịa, kịrịye mịẹ emi kịmị kị Jehovah mịẹ pọwẹịmọ mịnị.—Proverbs 27:11 goo.

3. Jehovah tebara ka kị tarị mịẹ wó dịa mịnị a o?

Tarị kị Jehovah yelaa dẹịn inyenrinbụọ. Gbẹsị bị, “Ọkpọnanaowei tarị.” (1 John 4:8) Jehovah Bible mọ má wo tẹmẹ yebo mọ kị duo wó tarị emi bara mịẹdịa mịnị. (Acts 14:17 goo.) Gbaamaba, Jehovah akị wó tẹmẹ wẹrị emi bara bị wó mọ dii. Omịnị ebi color-ama ẹrị, ebi numu pei, má ịmbẹlẹ fịyaị fịị kụrọ Jehovah mọ akị wó pịrị wẹrị emi. Omịnị pọwẹị pọwẹị inyenrin kị Jehovah mọ dọụ emi.

EBIBARA TUUDỌỤ

Jehovah tamamaa yeama mịẹ mịnị bara tolumọ nimi. Má Jehovah akị wo ebi inyenrinmọ mịẹdịa mịnị bara dii.

4. Yalịyalị tẹmẹ mị—Ọkpọnanaowei fịrị wẹnị kụrọ

Jehovah yalịyalị tẹmẹ bị akị fịrị wẹnị mịnị bara bị, omịnị bara akị fịrị wẹnị mịnị bara mọ kị lei emi. Yalịyalị tẹmẹ mị inyenrin mịnị yegha, anị Ọkpọnanaowei akị fịrị wẹnị mịnị kụrọ bara kị Bible mọ gbaa mị. Luke 11:13 má Acts 2:17 goo dá, bei biibịbịmọ kẹrị ẹrẹtei:

Ọkpọnanaowei bara ghọ yalịyalị tẹmẹ bii emi otumọ omịnị akị a “dẹsịmọ” mịnị. Mọ k’emi aba, yalịyalị tẹmẹ bị, Jehovah fịrịwẹnị kụrọ anịghakpọ kịmị a? Tetuu ki duonị ị́ bịsa bara gbaa ma?

Jehovah wo yalịyalị tẹmẹ mị akị biin tamamaa yeama kị mịẹ mịnị. Psalm 33:6 má 2 Peter 1:20, 21 goo dá, bei biibịbị kẹrị ẹrẹtei:

Jehovah tebara ka kị wo yalịyalị tẹmẹ bị akị fịrịwẹnị mịnị a o?

5. Jehovah ebi inyenrinbụọama nana wẹrị emi

Moses ebi bara ka kị Ọkpọnanaowei karị mị, mọabịkpọ, omịnị wo tẹmẹowei nimi ebi mọ dọụ mị. Anịduonị Moses Ọkpọnanaowei bii mị: “iné akị ye mịẹ mịnị bara gbaa ị pịrị, anịkị ịmịnị iné kịmị paa nimi dẹ.” (Exodus 33:13) Anị duonị, Jehovah wo emi bara bị gbaa Moses pịrị mị. Exodus 34:4-6 goo dá, bei biibịbịmọ kẹrị ẹrẹtei:

Jehovah te inyenrinbụọama kị gbaa Moses pịrị ma o?
Jehovah inyenrinbụọmọ teeki iné angọ a sụọ dẹịn emi a o?

6. Jehovah kịmị kekere mịnị daụ

Hebrew-otu Egypt a omoni sụọ mị. Jehovah tebara ka kị a laa timi ụyamọ diimọ ma o? AUDIO farị anịghakpọ Exodus 3:1-10 goo. Má kirianga bọọ emi biibịbịmọ kẹrị ẹrẹtei.

AUDIO: A Laa Timi Ụyabo Jehovah Gbele Mị (2:45)

Mị egberi mị, Jehovah tebara ka kị kịmị-awọụ laa mịnị ụyabo diimọ wẹrị emi bara kị gbaa ị́ pịrị mịnị a o?—Gooyọ 7 má 8 dii.
Jehovah baratụa kịmị-awọụ pịrị dọụ emi bara ị́ mọ tọn ma, omịnị mịẹ a paa emi a? Tetuu a o?