LEKSION 07
Ania ti Mapampanunotmo Maipapan ken Jehova?
No mangngegmo ti maipapan ken Jehova a Dios, ania ti maimadyinmo? Agbilbilibka kadi iti kinatan-okna ngem mariknam a nakaad-adayo kenka, a kas kadagiti bituen iti adayo a galaxy? Wenno ammom a mannakabalin isuna ngem awan ti mariknana, a kas iti gurruod? Ngem ania a talaga ni Jehova? Iti Saona, ti Biblia, iyam-ammo ni Jehova ti dadduma kadagiti kualidadna, ken ibagana nga interesado kenka.
1. Apay a ditay makita ti Dios?
“Ti Dios ket maysa nga Espiritu.” (Juan 4:24) Awan ti bagi ni Jehova a kas iti tao. Maysa isuna nga Espiritu nga aggigian idiay langit, maysa a lugar a ditay makita.
2. Ania ti dadduma a kualidad ni Jehova?
Saantay a makita ni Jehova, ngem no maam-ammotayo, maayattayo ta agpaypayso isuna a Persona nga addaan kadagiti nagmamayat a kualidad. Kuna ti Biblia: ‘Ay-ayaten ni Jehova ti kinahustisia, ket dinanto baybay-an dagiti napudno kenkuana.’ (Salmo 37:28) Kasta met, isu ket “nadungngo unay ken naasi,” lalo kadagiti marigrigatan. (Santiago 5:11) “Asideg ni Jehova kadagiti nasaktan ti pusoda; isalakanna dagidiay maup-upay.” (Salmo 34:18, footnote) Ken ammom kadi nga adda epektona ken Jehova ti ar-aramidentayo? No pilien ti maysa ti agaramid iti dakes, madismaya ken masaktan ni Jehova. (Salmo 78:40, 41) Ngem maragsakan isuna iti tao nga agar-aramid iti nasayaat.—Basaen ti Proverbio 27:11.
3. Kasano nga ipakpakita ni Jehova nga ay-ayatennatayo?
Ti kasayaatan a kualidad ni Jehova ket ayat. Ti agpayso, “ti Dios ket ayat.” (1 Juan 4:8) Saan laeng nga iti Biblia ti pakasursuruantayo iti ayat ni Jehova, uray met kadagiti pinarsuana. (Basaen ti Aramid 14:17.) Kas pagarigan, kitaem no kasano ti panangaramidna kadatayo. Inikkannatayo iti abilidad a makakita iti nagpipintas a kolor, makangngeg iti makaay-ayo a musika, ken makaraman kadagiti naimas a makan. Kayatna a ma-enjoy-tayo ti biag.
AMMUEM TI AD-ADU PAY
Ammuem no ania ti us-usaren ni Jehova a mangaramid kadagiti nakaskasdaaw a bambanag. Kitaem met no kasano nga ipakpakita ni Jehova dagiti nagpipintas a kualidadna.
4. Nasantuan nga espiritu—aktibo a puersa ti Dios
No kasano nga us-usarentayo dagiti imatayo nga agtrabaho, us-usaren met ni Jehova ti nasantuan nga espirituna. Ibaga ti Biblia a ti nasantuan nga espiritu ket saan a maysa a persona no di ket ti puersa nga us-usaren ti Dios a mangaramid iti bambanag. Basaen ti Lucas 11:13 ken Aramid 2:17, sa pagsaritaan dagitoy a saludsod:
-
‘Ibukbokto’ ti Dios ti nasantuan nga espirituna kadagidiay mangdawdawat iti dayta. Isu a panagkunam, maysa ngata a persona ti nasantuan nga espiritu, wenno aktibo a puersa ti Dios? Apay a kasta ti sungbatmo?
Us-usaren ni Jehova ti nasantuan nga espirituna a mangaramid kadagiti nakaskasdaaw a bambanag. Basaen ti Salmo 33:6 ken 2 Pedro 1:20, 21, sa pagsaritaan daytoy a saludsod:
-
Ania dagiti nangusaran ni Jehova iti nasantuan nga espirituna?
5. Addaan ni Jehova kadagiti nagpipintas a kualidad
Ni Moises ket napudno nga agdaydayaw iti Dios, ngem kayatna a mas maam-ammo pay ti nangaramid kenkuana. Isu nga imbaga ni Moises iti Dios: “Ipakaammom koma kaniak dagiti dalanmo, tapno maam-ammoka.” (Exodo 33:13) Kas sungbat, impakaammo ni Jehova ken Moises ti dadduma a kualidadna. Basaen ti Exodo 34:4-6, sa pagsaritaan dagitoy a saludsod:
-
Ania dagiti kualidad ni Jehova nga impakaammona ken Moises?
-
Ania ti magustuam unay a kualidad ni Jehova?
6. Ipatpateg ni Jehova dagiti tattao
Naadipen idi idiay Egipto dagiti Hebreo nga agserserbi iti Dios. Ania ti narikna ni Jehova iti panagrigrigatda? I-play ti AUDIO ken suroten ti pannakaibasana, wenno basaen ti Exodo 3:1-10, sa pagsaritaan dagiti sumaruno a saludsod.
-
Ania ti masursurom iti daytoy a salaysay maipapan iti marikrikna ni Jehova iti panagrigrigat dagiti tattao?—Kitaen ti bersikulo 7 ken 8.
-
Panagkunam, talaga kadi a kayat ni Jehova a tulongan dagiti tattao ken kayana ngata nga aramiden dayta? Apay, wenno apay a saan?
7. Makita dagiti kualidad ni Jehova kadagiti parsuana
Impakaammo ni Jehova dagiti kualidadna babaen kadagiti pinarsuana. I-play ti VIDEO. Kalpasanna, basaen ti Roma 1:20, sa pagsaritaan ti sumaruno a saludsod.
-
Ania dagiti kualidad ni Jehova a makitkitam kadagiti pinarsuana?
KUNA TI DADDUMA: “Saan a persona ti Dios; maysa la a puersa nga adda iti uray sadino.”
-
Ania ti makunam?
-
Apay a kasta ti sungbatmo?
SUMARIO
Ni Jehova ket maysa a di makita nga Espiritu nga addaan kadagiti nagmamayat a kualidad, kangrunaanna ti ayat.
Rebiu
-
Apay a ditay makita ni Jehova?
-
Ania ti nasantuan nga espiritu?
-
Ania ti dadduma a kualidad ni Jehova?
AGDISKOBREKA PAY
Adalem ti uppat a kangrunaan a kualidad ni Jehova tapno maam-ammom a naimbag isuna.
“Ania Dagiti Kualidad ti Dios?” (Ti Pagwanawanan No. 1 2019)
Kitaem dagiti ebidensia a ni Jehova ket saan nga adda iti amin a bambanag.
“Adda Kadi ti Dios iti Amin a Lugar?” (Artikulo iti website)
Kitaem no apay nga ibagbaga ti Biblia a ti nasantuan nga espiritu ket im-ima ti Dios.
Marigatan ti maysa a bulsek a lalaki a mamati nga ipatpateg isuna ti Dios. Kitaem no ania ti nangbalbaliw iti kapanunotanna.
“Mariknak Itan a Kabaelak ti Tumulong” (Ti Pagwanawanan, Oktubre 1, 2015)
Baka Kayatmo Met ti
MASANSAN A MAISALSALUDSOD
Ania ti Panagadal iti Biblia nga Iyaw-awis Dagiti Saksi ni Jehova?
Iti libre a panagadal nga iyaw-awis dagiti Saksi ni Jehova, mabalinmo nga usaren ti aniaman a patarus ti Biblia. Mabalinmo nga awisen ti amin a kapamiliam wenno ti asinoman a gayyemmo.
