LESN 07

Wa Jeuova Komiin Laik?

PLIE

Wen yu tingk bout Jeuova Gad, wa yu tingk im komiin laik? Yu tingk im big an powaful bot im de faar faar fram yu, laik di staar dem we wie op iina spies? Ar yu tingk im komiin laik wan orikien, we big an powaful bot na’av no fiilinz? Bot wa Jeuova riili komiin laik? Wen yu riid di Baibl, yu wi si som a di gud wiez dem we Jeuova av an yu wi si se im kier bout yu.

1. Wa mek wi kyaahn si Gad?

Jan 4:24 se ‘Gad a Spirit.’ Jeuova no av wan badi laik di wan we wi av. Im a wan Spirit we liv op iina evn, an wi kyaahn si op iina evn.

2. Wa’a som a di wiez dem we Jeuova av?

Iivn duo wi kyaahn si Jeuova, im a wan riil Sumadi an wen wi get fi nuo ou im tan, it mek wi get fi lov im. Iina Saam 37:28, di Baibl tel wi se: “Jeuova lov fi chriit evribadi fier an di wan dem we stik tu im no mata wa, im naa go eva lef dem.” An pan tap a dat, it mek wi nuo se Jeuova “jengkl an gud an kain.” ( Jiemz 5:11) Im riili fiil it fi di wan dem we a go chuu aal kain-a prablem. Saam 34:18 se: “Jeuova de de fi di piipl dem we dem aat a tier op insaida dem, an im siev di wan dem we fiil laik dem taiyad an waahn gi op.” Yu did nuo se di sitn dem we wi du kyan mek Jeuova fiil gud ar bad? So ef sumadi aalwiez a du som bad sitn, it a-go ort Jeuova. (Saam 78:40, 41) Bot sumadi we lov fi du wa rait, da sumadi de a-go mek im api.—Riid Pravorbz 27:11.

3. Ou Jeuova shuo wi se im lov wi?

Di wie ou Jeuova shuo im lov a di bes ting bout im. Di Baibl tel wi se “Gad a lov.” (1 Jan 4:8) Jeuova yuuz di Baibl an di ting dem we im mek fi mek wi si umoch im lov wi. (Riid Aks 14:17.) Luk pan ou im mek wi. Im mek wi so dat wi kyan si priti kola, so dat wi kyan ier nais myuuzik, an wi kyan ties som nais nais fuud. Im waahn wi fi enjai wi laif.

LORN SOM MUO

Yu a-go lorn wa Jeuova yuuz fi du som powaful sitn. An yu a-go si ou im shuo wi se im av som gud wiez, an wa im du so wi kyan get fi nuo im wiez dem.

4. Uoli spirit a di powa we Gad yuuz

Jeuova yuuz im uoli spirit fi du tingz, jos laik ou wi yuuz fi wi an dem fi du tingz. Di Baibl mek wi nuo se uoli spirit a no sumadi, bot it a di powa we Gad yuuz fi du di sitn dem we im waahn fi du. Riid Luuk 11:13 an Aks 2:17, an den wi a-go taak bout dem kwestiyan ya:

Gad se im a-go ‘put im spirit iina piipl’ we aks im fi’it. So bies pan dem skripcha ya, yu tingk se uoli spirit a sumadi, ar yu tingk se it a di powa we Gad yuuz fi du tingz? Wa mek yu se so?

Jeuova yuuz im uoli spirit fi du som big an powaful sitn. Riid Saam 33:6 an 2 Piita 1:20, 21, an den wi a-go taak bout da kwestiyan ya:

Wa’a som a di sitn dem we Jeuova yuuz im uoli spirit fi du?

5. Jeuova av som gud wiez we mek yu waahn get kluos tu im

Muoziz did aalwiez a sorv Gad di rait wie, bot im did waahn nuo muor bout Gad. So Muoziz se tu Gad se: “Elp mi fi nuo yu wiez dem, so mi kyan get fi nuo yu beta.” (Eksidos 33:13) So Jeuova tel Muoziz di kain-a sumadi Im bi. Riid Eksidos 34:4-6, an den wi a-go taak bout dem kwestiyan ya:

Wa a som a di wiez dem we Jeuova av we im did mek Muoziz nuo bout?
Wich wan a Jeuova wiez dem yu riili lov?

6. Jeuova kier bout piipl

Di Iibruu piipl dem a did Jeuova piipl, an dem a did sliev iina Iijip. Ou Jeuova did fiil bout aal a di bad sitn dem we dem did afi go chuu? Plie di REKAADIN a Eksidos 3:1-10, an luk pan it wen ya’a lisn it, ar yu kyan riid it. Den wi a-go taak bout dem kwestiyan ya:

REKAADIN: Wen Dem Did A Go Chuu Uol Iip A Sofarin, Jeuova Did Fiil It Fi Dem (2:45)

Wen yu riid da Baibl tuori ya, ou it mek yu si ou Jeuova fiil bout piipl wen dem a sofa?—Luk pan vors 7 an 8.
Yu tingk Jeuova riili waahn fi elp piipl, an yu tingk im kyan dwi’it? Wa mek yu se so?

7. Di ting dem we Jeuova mek kyan mek wi nuo bout im wiez dem

Wen wi luk pan di ting dem we Jeuova mek, wi kyan get fi nuo im wiez dem. Plie di VIDIYO. Den riid Ruoman 1:20, an wi a-go taak bout da kwestiyan ya: