ĨSOMO YA 07
Yeova Ailye Ata?
Yĩla wasũanĩa ĩũlũ wa Yeova Ngai, nĩ kyaũ kyũkaa kĩlĩkonĩ kyaku? Ũmwonaa e Ngai wa ũsengyʼa mũno ĩndĩ wĩ vaasa naku o tondũ ndata syĩ kũasa? Kana ũmwonaa e Ngai wĩ vinya mwingĩ ĩndĩ ũte tei na ũtelemasya andũ o ta kĩtundumo? We Yeova ailye ata? Ndetonĩ yake Mbivilia, Yeova nũvuanĩtye nguma imwe syake na akonanyʼa kana nũkũthĩnĩkĩaa.
1. Nĩkĩ tũtatonya kũmwona Ngai?
“Ngai nĩ Veva.” (Yoana 4:24) Yeova nde mwĩĩ wa nyama taitũ. Ĩndĩ e mwĩĩ wa veva na ekalaa ĩtunĩ, vala o na vo tũtatonya kũvona.
2. Nguma imwe sya Yeova nĩ syĩva?
O na kau tũitonya kũmwona Yeova, we e kwʼo na e nguma nzeo itumaa ala mamwĩsĩ menda kũmũthengeea. Mbivilia yaĩtye: “Yeova nũwendete sila wa katĩ, na ndamatiaa atheu make.” (Savuli 37:28) O na ĩngĩ, “e wendo mwingĩ na e tei,” na mũno mũno kwa ala me na mathĩna. (Yakovo 5:11) “Yeova e vakuvĩ na ala matũlĩkĩte ngoo, na nũtangĩĩaa ala mekwĩlila vevanĩ.” (Savuli 34:18) Na we waamanya kana no tũtume Yeova ewʼa mũyo kana akathata? Yĩla mũndũ watwʼa kwĩka maũndũ mathũku, nũtumaa Yeova atũlĩka ngoo na akathata. (Savuli 78:40, 41) Ĩndĩ mũndũ ũla wĩkaa maũndũ ala maĩlĩte nũtumaa atana mũno.—Soma Nthimo 27:11.
3. Yeova onanasya ata kana nũtwendete?
Nguma ĩla nene vyũ ya Yeova nĩ wendo. O na eka ũu, Mbivilia yaĩtye “Ngai nĩ wendo.” (1 Yoana 4:8) Yeova onanĩtye kana e wendo kwĩsĩla Ndeto yake Mbivilia na kwĩsĩla syĩndũ ila woombie. (Soma Meko ma Atũmwa 14:17.) Kwa ngelekanyʼo, kwasũanĩa ũndũ watũmbie. Nũtũnengete ũtonyi wa kwona malangi manake, kwĩwʼa tũwathi tũseo, na kũsama malĩu me mũyo. Kwa wʼo, endaa tũtanĩe thayũ.
ĨMANYĨSYE MŨNANGO
Ĩmanyĩsye wone kĩla Yeova ũtũmĩaa kwĩanĩsya mawĩa make ma ũsengyʼa. Na ĩndĩ ũyona ũndũ Yeova ũtwonasya nguma syake sya kwendeesya.
4. Veva mũtheu nĩ vinya ũla Ngai ũtũmĩaa kwĩka maũndũ
O ũndũ tũtũmĩaa moko kũtethya wĩa, Yeova atũmĩaa veva wake mũtheu. Mbivilia nĩyonanĩtye kana veva mũtheu ti kyũmbe kya veva, ĩndĩ nĩ vinya ũla Ngai ũtũmĩaa kwĩanĩsya maũndũ. Somai Luka 11:13 na Meko ma Atũmwa 2:17, na ĩndĩ mũineenea makũlyo aa:
-
Ngai ‘akatulũĩla’ veva mũtheu ala mamwĩtasya. Kwoou, we wĩona veva mũtheu ta Ngai-ĩ, kana nĩ vinya wa Ngai? Na nĩkĩ wasũngĩa ũu?
Yeova atũmĩaa veva wake mũtheu kwĩka maũndũ ma ũsengyʼa. Somai Savuli 104:30 na 2 Vetelo 1:20, 21, na ĩndĩ mũineenea ĩkũlyo yĩĩ:
-
Yeova atũmĩĩte veva wake mũtheu kwa nzĩa syĩva?
5. Yeova e nguma sya kwendeesya mũno
Mose aĩ mũthũkũmi mũĩkĩĩku wa Ngai, ĩndĩ nĩwendaa kũmanya Mũmbi wake nesanga. Nĩkyo kĩtumi weeie Ngai atĩĩ: “Mbonʼya yu mĩendele yaku, nĩkũmanye.” (Kuma 33:13) Yeova amũsũngĩie kwa kũmũtavya nguma imwe syake. Somai Kuma 34:4-6, na ĩndĩ mũineenea makũlyo aa:
-
Yeova atavisye Mose nguma syĩva syake?
-
We nĩ nguma syĩva sya Yeova ikwendeeasya mũno?
6. Yeova nũthĩnĩkĩaa andũ
Ve ĩvinda Aevelania, ala maĩ andũ ma Ngai, maĩ ngombo nthĩ ya Misili. Mathĩna ala makomanaa namo matumaa Yeova ewʼa ata? Thaũkai KĨLUNGU KYA KŨSOMA MBIVILIA na mũyĩatĩanĩa na ũla ũkũsoma, kana mũsome Kuma 3:1-10. Na ĩndĩ mũineenea makũlyo aa:
-
Kwosana na kĩlungu kĩu, Yeova ewʼaa ata yĩla andũ meũthĩna?—Sisya mũsoa wa 7, na wa 8.
-
We nũkwona Yeova ta wendaa kũtetheesya andũ, na ta wĩ na ũtonyi wa kwĩka ũu? Nĩkĩ wasũngĩa ũu?
7. Wũmbi nĩwonanasya nguma sya Yeova
Yeova nũvuanĩtye nguma syake kwĩsĩla syĩndũ ila wũmbĩte. Ĩloelei VITIO. Ĩtina wa ũu, somai Alomi 1:20, na ĩndĩ mũineenea ĩkũlyo yĩla yĩatĩĩe.
-
Yĩla weeloela wũmbi, wonaa nguma syĩva sya Yeova?
ANDŨ AMWE MAASYA: “Ngai ethĩawa ngoonĩ ya kĩla mũndũ.”
-
We wĩona ata?
-
Nĩkĩ wĩ na woni ũsu?
KĨLA TWEEMANYĨSYA
Yeova nĩ Ngai wĩ thayũ na ethĩawa na nguma mbingĩ nzeo, na nguma yake ĩla nene nĩ wendo.
Makũlyo ma Kũsyokeleela
-
Nĩkĩ tũtatonya kũmwona Yeova?
-
Veva mũtheu nĩ kyaũ?
-
Yeova ethĩawa na nguma ta syĩva?
MAŨNDŨ ANGĨ MA KWĨMANYĨSYA
Ongelanga ũmanyi waku ĩũlũ wa Yeova kwa kwĩmanyĩsya ĩũlũ wa nguma syake inya ila nene.
Soma wone ũĩkĩĩthyo wa kana Yeova ndethĩawa kĩla vandũ.
Soma wone nĩkĩ Mbivilia yĩtĩte veva mũtheu moko ma Ngai.
Ve ĩvinda mũndũũme ũmwe ũtonaa nthĩ weewʼaa wĩ ũndũ wĩ vinya kũĩkĩĩa kana Ngai nũmũthĩnĩkĩaa. Soma wone nĩ kyaũ kyatumie alyũla woni wake.
“Yu no Nĩtetheesye Andũ Ala Angĩ” (Mũsyaĩĩsya, Ĩtukũ 1, Mwei wa 10, 2015)
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
