LISON 07

Modi ki Jeová é?

TOKA

Modi ki Jeová é?

Óras ki bu ta pensa na Jeová, modi ki bu ta imajina ma el é? Bu ta atxa ma el é un algen txeu poderozu, má omésmu ténpu el sta lonji di nos, sima strélas la na séu? Ô bu ta atxa ma el é sô un forsa di naturéza, sima un strubada? Má modi ki Jeová é? Bíblia ta pâpia di alguns kualidadi di Jeová, i tanbê el ta fla ma el ta preokupa ku bo.

1. Pamodi ki nu ka ta konsigi odja Deus?

‘Deus é spritu’. (João 4:24) Jeová ka ten un korpu sima di nos. El é un Algen invizível ki ta mora na Séu, un lugar ki nu ka ta konsigi odja.

2. Kal ki é alguns kualidadi di Jeová?

Nu ka ta konsigi odja Jeová, má óras ki nu ta konxe-l, nu ta ama-l pamodi el é un Algen ki ten kualidadis bunitu. Bíblia ta fla: ‘Jeová ta ama justisa, i el ka ta bandona kes ki é lial pa el.’ (Salmo 37:28) Tanbê el ‘ten grandi konpaxon i el é mizerikordiozu’, inda más pa kes algen ki sta ta sufri. (Tiago 5:11) ‘Jeová sta pértu di kes ki tene korason maguadu, el ta salva kes ki tene spritu dizanimadu.’ (Salmo 34:18) Bu sabia ma kuzas ki nu ta faze ta afeta Jeová? Si un algen disidi faze kuzas mariadu, el ta fika tristi i maguadu. (Salmo 78:40, 41) Má si un algen disidi faze kuzas dretu, el ta fika kontenti. — Lé Provérbios 27:11.

3. Kuzê ki ta mostra ma Jeová ta ama-nu?

Kualidadi prinsipal di Jeová é amor. Na verdadi, ‘Deus é amor.’ (1 João 4:8) Jeová ta mostra se amor através di Bíblia i tanbê através di kuzas ki el faze. (Lé Atos 14:17.) Pur izénplu, pensa na manera ki el faze-nu. El da-nu kapasidadi di odja koris bunitu, di obi múzika i di sprimenta kumida sábi. El krê pa nu goza vida.

SABE MÁS

Odja modi ki Jeová ta konsigi faze kuzas spetakular. Dipôs odja modi ki Jeová ta mostra-nu se kualidadis bunitu.

4. Spritu santu é forsa di Deus

Sima nu ta uza nos mô pa nu trabadja, Jeová ta uza se spritu santu. Bíblia ta mostra ma spritu santu é ka un algen, má é forsa ki Deus ta uza pa faze kuzas. Lé Lucas 11:13 i Atos 2:17, i dipôs pâpia sobri kes pergunta li:

Deus ta ben ‘baza’ se spritu santu riba kes ki ta pidi-l. Nton, bu ta atxa ma spritu santu é un algen, ô é forsa di Deus? Pamodi ki bu ta pensa si?

Jeová ta uza se spritu santu pa faze kuzas spetakular. Lé Salmo 33:6 i 2 Pedro 1:20, 21, i dipôs pâpia sobri kel pergunta li:

Kal ki é alguns manera ki Jeová dja uza se spritu santu?

5. Jeová ten kualidadis bunitu

Muizés éra un sérvu fiel di Deus. Má el krê konxeba se Kriador midjór. Pur isu, Muizés fla Jeová: ‘Pô-m ta konxe bus kaminhu, pa N pode konxe-u’. (Êxodo 33:13) Nton, Jeová fla Muizés ki tipu di algen ki el é. Lé Êxodo 34:4-6, i dipôs pâpia sobri kes pergunta li:

Ki kualidadis di Jeová Muizés fika ta konxe?
Ki kualidadi di Jeová ki bu gosta más txeu?

6. Jeová ta preokupa ku algen

Ebreus éra povu di Jeová ki bira skravus na Ijitu. Modi ki Jeová xinti kantu el odja se povu ta sufri? Obi GRAVASON i sigi leitura, ô lé Êxodo 3:1-10. Dipôs pâpia sobri kes pergunta li:

GRAVASON: Jeová preokupa ku ses sufrimentu (2:45)

Kuzê ki kel stória li ta inxina-u sobri modi ki Jeová ta xinti óras ki nu ta sufri? — Odja versíklus 7 i 8.
Bu ta atxa ma Jeová krê djuda-nu i ma el ta konsigi faze-l? Pamodi?