DILONGI 07
Yehowa Kele Nzambi ya Nki Mutindu?
Ntangu nge ke yindulaka Yehowa Nzambi, nki ke kwisilaka nge na ntu? Keti nge ke tadilaka yandi kaka bonso Nzambi mosi ya nene mpi yina kele ntama kibeni ti beto bonso bambwetete kuna na zulu? To keti nge ke tadilaka yandi bonso Nzambi mosi ya ngolo mingi kansi yina kele nku? Yehowa kele mpenza nki mutindu? Biblia ke songaka beto bikalulu ya Yehowa mpi yo ke songaka beto nde Yehowa ke zolaka beto.
1. Sambu na nki beto lenda mona ve Nzambi?
“Nzambi kele Mpeve.” (Yoane 4:24) Nitu ya Yehowa kele ve mutindu mosi ti ya beto. Beto lenda mona yandi ve. Yandi ke zingaka na zulu, na kisika yina beto lenda mona ve.
2. Inki kele mwa bikalulu ya Yehowa?
Beto lenda mona ve Yehowa. Kansi ntangu beto ke sosaka kuzaba yandi, beto ke kumaka kuzola yandi sambu yandi kele Muntu ya kieleka yina ke vandaka ti bikalulu ya mbote. Biblia ke tubaka nde: “Yehowa ke zolaka lunungu, mpi yandi ta yambula ve bantu na yandi ya kwikama.” (Nkunga 37:28) Diaka, yandi kele “kibeni ti lutondo mpi yandi ke wilaka bantu mawa,” mingi-mingi bantu yina ke mona mpasi. (Yakobo 5:11) “Yehowa kele pene-pene ya bantu yina kele na mawa; yandi ke gulusaka bantu yina me lemba nitu.” (Nkunga 34:18, noti na nsi ya lutiti) Keti nge ke zabaka nde mambu ya beto ke salaka lenda pesa Yehowa kiese to mawa? Muntu yina ke salaka mambu ya mbi ke pesaka Yehowa mpasi. (Nkunga 78:40, 41) Kansi muntu yina ke salaka mambu ya mbote ke sepedisaka yandi.—Tanga Bingana 27:11.
3. Inki mutindu Yehowa ke monisaka nde yandi ke zolaka beto?
Zola kele kikalulu ya ntete-ntete ya Yehowa. Ya kieleka, “Nzambi kele zola.” (1 Yoane 4:8) Biblia mpi bima yina Yehowa me salaka, ke monisaka nde yandi ke zolaka beto. (Tanga Bisalu 14:17.) Mu mbandu, tala mutindu yandi me salaka beto. Yandi me pesaka beto mayele ya kutala bakulere ya kitoko, ya kuwa miziki ya kitoko mpi ya kumeka madia ya ntomo. Yandi ke zolaka nde beto sepela ti luzingu.
LONGUKA MAMBU MINGI
Beto tala mutindu Yehowa ke sadilaka mpeve santu na yandi sambu na kusala mambu ya ke yitukisa mpi mutindu yandi ke songaka beto bikalulu na yandi ya mbote.
4. Mpeve santu kele ngolo yina Nzambi ke sadilaka bisalu
Yehowa ke sadilaka mpeve santu na yandi kaka mutindu beto ke sadilaka maboko na beto sambu na kusala bisalu. Biblia ke monisaka nde mpeve santu kele ve Nzambi, kansi yo kele ngolo yina Nzambi ke sadilaka sambu na kusala mambu. Beno tanga Luka 11:13 mpi Bisalu 2:17. Na nima, beno pesa mvutu na bangiufula yai:
-
Nzambi ta “tiamuna” mpeve santu na yandi na zulu ya bantu yina ke lombaka yandi yo. Yo yina, nge ke yindula nde mpeve santu kele Nzambi to ngolo yina Nzambi ke sadilaka bisalu? Sambu na nki nge me tuba mpidina?
Yehowa ke sadilaka mpeve santu na yandi sambu na kusala bima ya ke yitukisa. Beno tanga Nkunga 33:6 mpi 2 Piere 1:20, 21. Na nima, beno pesa mvutu na ngiufula yai:
-
Tanga mwa mambu yina Yehowa me salaka na nsadisa ya mpeve santu na yandi.
5. Yehowa kele ti bikalulu ya mbote
Moize vandaka nsadi ya mbote ya Nzambi, kansi yandi vandaka na mfunu ya kuzaba mbote-mbote Nzambi yina salaka yandi. Yo yina Moize tubaka nde: “Songa mono banzila na nge, sambu mono zaba nge.” (Kubasika 33:13) Sambu na kupesa yandi mvutu, Yehowa songaka Moize mwa bikalulu na yandi. Beno tanga Kubasika 34:4-6 mpi na nima beno pesa mvutu na bangiufula yai:
-
Inki bikalulu Yehowa ke vandaka ti yo yina yandi songaka Moize?
-
Inki bikalulu ya Yehowa ke sepedisaka nge mingi?
6. Yehowa ke kudiyangisaka sambu na bantu
Baebreo vandaka bansadi ya Nzambi mpi bo vandaka bampika na Ezipte. Inki mutindu Yehowa kudiwaka ntangu bo vandaka kumona mpasi? Beno landa LUTANGU YA BIBLIA YA BO ME KOTISAKA NDINGA. Kana beno kele ve ti yo, beno tanga Kubasika 3:1-10. Na nima beno pesa mvutu na bangiufula ya ke landa.
-
Mutindu disolo yai ke monisa yo, nki mutindu Yehowa ke kudiwaka ntangu beto ke monaka mpasi?—Tala verse 7 mpi 8.
-
Keti nge ke yindula nde Yehowa ke zolaka kusadisa bantu mpi yandi kele ti ngolo ya kusala yo? Kana mpidina to ve, sambu na nki?
7. Bima yina Yehowa me salaka ke monisaka bikalulu na yandi
Beto ke monaka bikalulu ya Yehowa na bima yina yandi me salaka. Beno tala VIDEO. Na nima beno tanga Baroma 1:20 mpi beno pesa mvutu na ngiufula ya ke landa.
-
Inki bikalulu ya Yehowa nge ke monaka na bima yina yandi me salaka?
BANTU YA NKAKA KE TUBAKA NDE: “Nzambi kele ve muntu ya kieleka. Kansi yandi kele kaka ngolo yina ke vandaka bisika yonso.”
-
Inki nge ke yindula?
-
Sambu na nki nge ke yindula mutindu yina?
NA BUNKUFI
Yehowa kele ti nitu yina beto lenda mona ve mpi yandi kele ti bikalulu mingi ya mbote, mingi-mingi zola.
Inki Nge Me Simba?
-
Sambu na nki beto lenda mona ve Yehowa?
-
Mpeve santu kele nki?
-
Inki kele mwa bikalulu ya Yehowa?
TALA MPI
Longuka mambu mingi sambu na bikalulu iya ya kuluta mfunu yina Yehowa ke vandaka ti yo.
“Inki Kele Bikalulu ya Nzambi?” (Nzozulu ya Nkengi No. 1 2019)
Tala mambu yina ke monisa nde Nzambi ke vandaka ve bisika yonso.
“Keti Nzambi Ke Vandaka Bisika Yonso?” (Disolo ya kele na jw.org)
Tala sambu na nki Biblia ke fwanisaka mpeve santu ti maboko ya Nzambi.
Yo vandaka mpasi sambu muntu mosi ya kifwa-meso kundima nde Nzambi ke zolaka yandi. Tala mambu yina sadisaka yandi na kukatula bangindu yai.
“Mono Lenda Sadisa Bantu ya Nkaka Ntangu Yai” (Nzozulu ya Nkengi, Oktobri 1, 2015)
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
