ITHOMO RĨA 07

Jehova Atariĩ Atĩa?

THAAKA

Jehova Atariĩ Atĩa?

Rĩrĩa weciria ũhoro wa Jehova Ngai-rĩ, wonaga atariĩ atĩa? Hihi wonaga arĩ Ngai wa magegania no ũkona arĩ kũraihu nawe o ta njata irĩ kũraihu mũno? Kana hihi wonaga arĩ hinya mũingĩ o ta ngwa no ndarũmbũyagia andũ? Jehova atariĩ atĩa? Kũgerera Kiugo gĩake, Bibilia, Jehova nĩ atwĩrĩte ũrĩa atariĩ, na agatwĩra atĩ nĩ atũrũmbũyagia.

1. Nĩ kĩĩ gĩtũmaga twage kuona Ngai?

“Ngai nĩ Roho.” (Johana 4:24) Jehova ndakoragwo na mwĩrĩ ta witũ. We nĩ Roho na aikaraga igũrũ. Tũtingĩhota kuona kũrĩa aikaraga.

2. Ngumo imwe cia Jehova nĩ irĩkũ?

O na gũtuĩka tũtingĩhota kuona Jehova, we nĩ Ngai wa biũ, na nĩ arĩ ngumo njega iria itũmaga tũmwende. Bibilia yugaga ũũ: “Jehova nĩ endete kĩhooto, na ndagaatiganĩria andũ ake arĩa ehokeku.” (Thaburi 37:28) Ningĩ nĩ “arĩ wendo muororo mũno na nĩ mũigua tha,” makĩria kwerekera andũ arĩa marathĩnĩka. (Jakubu 5:11) “Jehova akoragwo hakuhĩ na arĩa mathuthĩkĩte ngoro; nĩ ahonokagia arĩa makuĩte ngoro.” (Thaburi 34:18, kohoro ka magũrũ-inĩ) Na Jehova nĩ ahutagio nĩ maũndũ marĩa twĩkaga. Mũndũ angĩthuura gwĩka maũndũ moru, nĩ atũmaga Jehova aigue ũũru na anyitwo nĩ kĩeha. (Thaburi 78:40, 41) No mũndũ ũrĩa wĩkaga maũndũ mega, nĩ amũkenagia.—Thoma Thimo 27:11.

3. Jehova onanagia atĩa atĩ nĩ atwendete?

Ngumo ĩrĩa nene ya Jehova nĩ wendo. Bibilia yugaga “Ngai nĩ wendo.” (1 Johana 4:8) Jehova nĩ atũguũrĩirie wendo wake kũgerera Bibilia na kũgerera indo iria ombĩte. (Thoma Atũmwo 14:17.) Kwa ngerekano-rĩ, ta wĩcirie ũrĩa tũũmbĩtwo. Nĩ atũheete ũhoti wa kuona marangi mathaka, kũigua mĩgambo ĩragũcĩrĩria, na kũigua mĩcamo ya irio njega. Nĩ endaga tũkenere ũtũũro.

THUTHURIA MAKĨRIA

Reke twĩrute kĩrĩa Jehova ahũthagĩra kũruta mawĩra maingĩ. Tũcoke twĩrute ũrĩa Jehova atũguũrĩirie ngumo ciake njega na ũrĩa acionanagia.

4. Roho mũtheru nĩ hinya wa Ngai wa gwĩka maũndũ

Jehova ahũthagĩra roho wake mũtheru ta ũrĩa ithuĩ tũhũthagĩra moko maitũ kũruta wĩra. Bibilia yonanagia atĩ roho mũtheru ti Ngai, no nĩ hinya ũrĩa Ngai ahũthagĩra gwĩka maũndũ. Thomai Luka 11:13 na Atũmwo 2:17, mũcoke mwarĩrĩrie ciũria ici:

Mũndũ angĩhoya aheo roho mũtheru, Ngai nĩ ‘amũitagĩrĩria’ roho ũcio. Kwoguo ũngiuga roho mũtheru nĩ Ngai-ĩ kana nĩ hinya wa Ngai wa gwĩka maũndũ? Ũngiuga ũguo nĩkĩ?

Jehova ahũthagĩra roho wake mũtheru kũruta mawĩra maingĩ. Thomai Thaburi 33:6 na 2 Petero 1:20, 21, mũcoke mwarĩrĩrie kĩũria gĩkĩ:

Jehova ahũthĩrĩte roho wake mũtheru na njĩra ta irĩkũ?

5. Jehova nĩ arĩ ngumo nyingĩ njega

Musa aarĩ ndungata njĩhokeku ya Ngai, no nĩ eendaga kũmũmenya wega makĩria. Kwoguo akĩra Ngai ũũ: “Ũmenyithie njĩra ciaku, nĩgetha ngũmenye.” (Thama 33:13) Jehova aacokeirie Musa na njĩra ya kũmũmenyithia ngumo imwe ciake. Thomai Thama 34:4-6, mũcoke mwarĩrĩrie ciũria ici:

Jehova aamenyithirie Musa ngumo irĩkũ ciake?
Nĩ ngumo irĩkũ cia Jehova igũkenagia mũno?

6. Jehova nĩ arũmbũyagia andũ

Kũrĩ hĩndĩ Aisiraeli maarĩ ngombo bũrũri-inĩ wa Misiri. Jehova aaiguaga atĩa rĩrĩa maathĩnĩkaga? Thikĩrĩriai ŨTHOMI ũyũ wa Bibilia na mũrũmanĩrĩre naguo, kana mũthome Thama 3:1-10, mũcoke mwarĩrĩrie ciũria iria irũmĩrĩire.

ŨTHOMI WA BIBILIA: Jehova nĩ Aaiguaga Ũũru Rĩrĩa Maathĩnĩkaga (2:45)

Rũgano rũu rũrakuonia Jehova aiguaga atĩa rĩrĩa andũ marathĩnĩka?—Rora mũhari wa 7 na 8.
Hihi nĩ ũkuona ta Jehova angĩhota gũteithia andũ, na hihi nĩ endaga kũmateithia? Ũngiuga ũguo nĩkĩ?

7. Ũũmbi nĩ ũguũragia ngumo cia Jehova

Jehova nĩ atũguũrĩirie ngumo ciake kũgerera indo iria ombĩte. Mwĩrorerei VIDEO ĩno, mũcoke mũthome Aroma 1:20, na mwarĩrĩrie kĩũria kĩrĩa kĩrũmĩrĩire.