OSHILESHWA 07
Jehova okwa tya naanaa ngahelipi?
Oshike hashi uya momadiladilo oye ngeenge owa diladila kombinga yaJehova Kalunga? Mbela omunenenene noitatu dulu okukala tu na ekwatafano naye? Mbela oho diladila kutya Kalunga omhepo ashike yongaho i na eenghono dinenenene, ndele ke na omaukwatya mahokwifa? Jehova okwa tya naanaa ngahelipi? Jehova okwe tu hololela omaukwatya aye okupitila mEendjovo daye, Ombiibeli, nonokutya oku na ko nasha nafye.
1. Omolwashike ihatu dulu okumona Kalunga?
“Kalunga oye Omhepo.” (Johannes 4:24) Jehova ke na olutu lopambelela ngaashi fye. Ndele oku na olutu lopamhepo noha kala meulu omo ihatu dulu okumona.
2. Amwe omomaukwatya aJehova oelipi?
Ihatu dulu okumona Jehova, ndele ngeenge otwe lihongo kombinga yaye, ohatu ka kala tu mu hole, molwaashi oku li omunhu wolela noku na omaukwatya mawa. Ombiibeli oya ti: “Omwene oku hole ouyuki, novadiinini vaye ite va efa nande.” (Epsalme 37:28) Jehova “omunalukeno nomunanghenda,” unene tuu kwaavo tava mono oixuna. (Jakob 5:11) “Omwene oku li popepi nomitima da teyauka, Ye oha xupifa ava ve nomhepo ya nyanyauka.” (Epsalme 34:18) Owe shi shiiva ngoo kutya eenghatu detu otadi dulu okuhafifa, ile okunyemateka Jehova? Omunhu oo a hoolola okuninga oinima ii ohe mu udifa nai noku mu nyematifa komutima. (Epsalme 78:40, 41) Ashike omunhu oo ha longo osho shiwa oha hafifa omutima waye.— Lesha Omayeletumbulo 27:11.
3. Jehova ohe shi ulike ngahelipi kutya oku tu hole?
Ohole oyo oukwatya waJehova wa tongomana, ile tu tye, “Kalunga oye ohole.” (1 Johannes 4:8) Jehova ina ulika ashike ohole yaye okupitila mOmbiibeli, ndele okwe i ulika yo okupitila meshito. (Lesha Oilonga 14:17.) Pashihopaenenwa, diladila ashike monghedi omo e tu shita. Okwe tu shita hatu dulu okumona omaluvala mawa, hatu hafele omusika nokumakela omilyo doikulya iwa. Okwa hala tu hafele onghalamwenyo.
KONAKONA MOULE
Lihonga nghee Jehova ha ningi oinima ikumwifi. Ndele to lihongo yo nghee he tu ulikile omaukwatya aye a hokwifa.
4. Omhepo iyapuki oyo eenghono daKalunga tadi longo
Ngaashi ashike fye hatu longifa omake etu tu longe sha, Jehova naye oha longifa omhepo yaye iyapuki. Ombiibeli otai hongo kutya omhepo iyapuki kai fi omunhu, ndele eenghono daKalunga odo ha longifa, opo a wanife po oilonga yaye. Lesha Lukas 11:13 nosho yo Oilonga 2:17, ndele tamu kundafana omapulo taa shikula:
-
Kalunga ota ka “tilila” omhepo iyapuki ovo tave i pula. Mbela oto diladila kutya omhepo iyapuki oi li omunhu, ile oi li eenghono daKalunga tadi longo? Omolwashike to tile ngaho?
Jehova oha longifa omhepo yaye iyapuki, opo a longe oilonga ikumwifi. Lesha Epsalme 33:6; 2 Petrus 1:20, 21, ndele tamu kundafana epulo tali shikula:
-
Opeemhito dilipi Jehova a li a longifa omhepo yaye iyapuki?
5. Jehova oku na omaukwatya a hokwifa
Moses okwa li omupiya waKalunga omudiinini nokwa li a hala okushiiva shihapu kombinga yOmushiti waye. Onghee Moses okwa li e mu pula a ti: “Shiivifile nge eendjila doye, opo ndi shiive oku ku shiiva.” (Exodus 33:13) Opo nee Jehova okwa li a lombwela Moses amwe omomaukwatya aYe, oo taa ulike kutya ye omunhu a tya ngahelipi. Lesha Exodus 34:4-6, ndele tamu kundafana omapulo taa shikula:
-
Jehova okwa li a lombwela Moses omaukwatya aYe elipi?
-
Omaukwatya aJehova elipi wa hokwa unene?
6. Jehova oku na ko nasha novanhu
Oshiwana shaKalunga shOvaheberi osha li moupika muEgipti. Okwa li e udite ngahelipi eshi a mona okuhepekwa kwasho? Dana OSHINYANDWA SHOKUPWILIKINWA ile u leshe Exodus 3:1-10, ndele tamu kundafana omapulo taa shikula.
-
Ehokololo eli otali ku hongo shike shi na sha nanghee Jehova ha kala e udite, ngeenge ovanhu tava mono oixuna?— Tala ovelise 7, 8.
-
Mbela Jehova okwa hala ngoo shili okukwafela ovanhu noku na eenghono doku shi ninga? Omolwashike to tile ngaho?
7. Ohatu dulu okulihonga kombinga yomaukwatya aJehova meshito
Jehova ote tu hololele omaukwatya aye okupitila meshito. Dana OKAVIDIO. Opo nee lesha Ovaroma 1:20, ndele tamu kundafana epulo tali shikula.
-
Omaukwatya aJehova elipi u wete okupitila moinima oyo a shita?
VAMWE OHAVA TI: “Kalunga ke fi omunhu, ndele oye omhepo oyo i li keshe pamwe.”
-
Ove oto ti ngahelipi?
-
Omolwashike to tile ngaho?
ENGONGO
Jehova omunhu woPamhepo, oo iha dulu okumonika, noku na omaukwatya mahapu mahokwifa, ngaashi ohole.
Eendululo
-
Omolwashike ihatu dulu okumona Jehova?
-
Omhepo iyapuki oshike?
-
Amwe omomaukwatya aJehova ongaashi elipi?
TALA OUYELELE WA WEDWA PO
Lihonga shihapu kombinga yomaukwatya aJehova opo u mu shiive nawa.
Tala komaumbangi oo taa ulike kutya Jehova ke li keshe pamwe.
“Mbela Kalunga oku li keshe pamwe?” (Oshitukulwa shi li ko jw.org)
Tala kutya omolwashike Ombiibeli tai ti omhepo iyapuki oi li eenghono daKalunga.
Tala nghee omulumenhu umwe omupofi a li ha mono shidjuu okwiitavela kutya Kalunga oku na ko nasha naye. Oshike she mu kwafela a lundulule etaleko laye?
“Paife ondi udite kutya ohandi dulu okukwafela vamwe” (Oshungonangelo, 1 Oktoba 2015)
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
