ILINNIAGASSAQ 07
Jehova qanoq ittuua?
Jehova Guuti qanoq takorloortarpiuk? Guuti ataqqinartorsuugami inunnit qanillineqarsinnaanngila? Imaluunniit kinaassuseqanngitsutut nukiinnaava? Jehova qanorpiaq ittuua? Oqaatsini, Biibili, aqqutigalugu Jehovap qanoq ittuunini ilinnillu soqutiginninnini ersersippaa.
1. Sooq Guuti takusinnaanngilarput?
“Guuti anersaajuvoq.” (Johannesi 4:24) Jehova uagutsitulli timeqanngilaq. Takuussaanngitsuuvoq Biibilimi ‘qilammik’ taaneqartartumiittoq.
2. Jehova qanoq pissuseqarpa?
Jehova takussaanngitsuugaluarluni kinaassusiliviuvoq, nuannersunillu pissuseqarami asajuminartuuvoq. Jehova pillugu Biibilimi ima allassimasoqarpoq: “Eqqortoq iluaraa imminullu ilumoortut imminiiginnarnagit.” (Tussiaat 37:28) Aamma ‘qamannga pisumik misigissuseqarlunilu nallittuisuuvoq’, ingammik naalliuuteqartunut. (Jaaku 5:11) Jehovap “qanippai sequmissimasumik uummatillit, annaattarpai aserortersimasumik anersaallit”. (Tussiaat 34:19) Aamma iliuutsigut Jehovap misigissutsimigut sunnertissutigisarpai. Inuk ajortuliorniarluni aalajangertoq pakatsissutigalugulu aliasuutigisarpaa. (Mosesimik 1. 6:5, 6) Ajunngitsuliortorli nuannaarutigisarpaa. – Ussatit 27:11 atuarsiuk.
3. Jehovap asanninnini qanoq takutippaa?
Biibilimi allassimavoq ‘Guuti tassaasoq asanninneq’. (Johannesimit 1. 4:8) Tassa asanninneq Jehovap pissusiisa pingaarnersaraat. Asanninnerali aamma pinngortitarsuarmi takuneqarsinnaavoq. (Apustilit Suliaat 14:17 atuarsiuk). Assersuutigalugu pinngortippaatigut qalipaatinik alutornaqisunik takusaqarsinnaatilluta, nipilersuutinik tusarnersunik tusarnaarsinnaatilluta mamartunillu nerisaqarsinnaatilluta. Kissaatigaami pilluassasugut.
ITISILIINEQ
Jehova tupinnangaartunik iliuuseqarumalluni suna atortaraa paasiniaruk. Aamma pissusini nuannersut qanoq ersersittarai misissoruk.
4. Anersaaq illernartoq – Guutip nukinga
Suliaqaleraangatta assatsinnik atuisarnitsitulli Jehovap anersaani illernartoq atortarpaa. Biibilimi ersersinneqarpoq anersaaq illernartoq kinaassusiliunani tassaasoq nukik Guutip suliaqarnermini atortagaa. Lukkarsi 11:13 aamma Apustilit Suliaat 2:17 atuarsigit apeqqutillu uku eqqartorlugit:
-
Guutip imminut qinusut anersaamik illernartumik ‘kuisiffigisarpagit’, taava anersaaq illernartoq kinaassusiliusimassava, imaluunniit tassaassava Guutip nukinga? Sooq taama isumaqarpit?
Jehova anersaani illernartoq atorlugu tupinnangaartunik iliuuseqartarpoq. Tussiaat 104:30 aamma Petrusimit 2. 1:20, 21 atuarsigit apeqqullu una eqqartorlugu:
-
Jehovap anersaani illernartoq atorlugu naammassisaasa ilaat suuppat?
5. Jehova nuannersumik kinaassuseqarpoq
Moorsisip Pinngortitsisini, Jehova, ilisarisimanerulerusuppaa. Taamaattumik ima oqarfigaa: “Aqqutinnik nalunaarfiginnga ilisimaleqqullutit.” (Mosesimik 2. 33:13) Jehovallu akigamiuk qanoq ittuunini oqaluttuaraa. Mosesimik 2. 34:4-6 atuarsigit apeqqutillu uku eqqartorlugit:
-
Jehova Moorsisimut qanoq imminut ilisaritippa?
-
Jehovap pissusiisa ilaat sorleq nuannarinerpaaviuk?
6. Jehovap inuit soqutigai
Guutip itsaq innuttai, Israalikkut, Egyptenimi naalliullutik inussiaataasimapput. Tamanna Jehovap qanoq sunnertissutigaa? TUSARNAAGASSIAQ tusarnaarsiuk imaluunniit Mosesimik 2. 3:1-10 atuarsiuk. Kingorna apeqqutit tulliuttut eqqartorsigit.
-
Oqaluttuaq taanna naapertorlugu inuit naalliunnerat Jehovap qanoq isumaqarfigaa? – Versit 7 aamma 8 takukkit.
-
Ilimagaajuk Jehovap inuit ilumut ikiorusukkai taamaaliorsinnaasorlu? Sooq taama isumaqarpit?
7. Jehovap pissusii pinngortitarsuarmi erserput
Jehovap qanoq ittuunini pinngortitamigut ersersippaa. VIDEO takusiuk. Kingorna Romamiut 1:20 atuarsiuk apeqqullu tulliuttoq eqqartorlugu.
-
Jehovap pissusiisa ilaat sorliit pinngortitaani maluginiarpigit?
OQARTOQARTARPOQ: “Guuti takusinnaannginnatsigu ilisarisimalersinnaanngilarput.”
-
Illit qanoq isumaqarpit?
-
Sooq taama isumaqarpit?
EQIKKAANEQ
Jehova anersaajuvoq takuneqarsinnaanngitsoq. Nuannersorpassuarnik pissuseqarpoq, pingaarnertullu asannittuuvoq.
Uteqqiineq
-
Sooq Jehova takusinnaanngilarput?
-
Anersaaq illernartoq suua?
-
Jehovap pissusiisa ilaat suuppat?
NAMMINEQ MISISSUGASSATIT
Guutip pissusiisa pingaarnerit sisamat misissornerisigut Jehova ilisarisimaneruleruk.
“Guuti qanoq ittuua?” (Napasuliaq Alapernaarsuiffik nr. 1 2019)
Guutip sumi tamaaniinnginneranut uppernarsaatit maluginiakkit.
“Guuti sumi tamaaniippa?” (Nittartakkatsinni allaaserisaq)
Paasiniaruk sooq anersaaq illernartoq Guutip assaanut Biibilimi assersuunneqartoq.
“Anersaaq illernartoq sunaava?” (Nittartakkatsinni allaaserisaq)
Angutip tappiitsup Guutimit soqutigineqarnini upperiuminaatsippaa. Sooq isummani allanngortinneraa paasiniaruk.