MWE LUTLUT 07

Jeova El Kain In God Fuhkah Se?

PLAY

Ke pacl ma sruhmuhnyuck Jeova God, meac oasr ke nuhnak lom? Yac kom fwefwelac kacl, tuhsruhktuh kom puhla muh el arlac loes liki kom, oacna itu inkuhsrao? Kuh yac kom nuhnkuh kacl muh el arlacna fokoko oacna sie pahkah upac, tuhsruhktuh wacngihn puhlakihn lal? Suc na pwacye Jeova? Bible uh ahkkahlwemye ohiyac wowo lal. Ma inge oacyacpac fahk lah el nuhnkuh keim.

1. Efuh kuht tiac kuh in liye God?

“God El Nguhn.” (John 4:24) Wacngihn mahno in ikoac luhn Jeova. El sie Nguhn suc muhta inkuhsrao, sie acn ma kuht tiac kuh in liye.

2. Meac kuhtuh ohiyac wowo luhn Jeova?

Kuht tiac kuh in liye Jeova. Tuhsruhktuh, ke kuht etwacllah na pwacye, kuht ac fah luhngse el mweyen el sie God na pwacye ma oasr ohiyac wowo lal. Bible uh fahk lah Jeova el “luhngse ma suwohs, ac el tiac pihlesraclos suc oaru nuh sel.” (Psalm 37:28) El oacyacpac “sesseslah ke kuhlwacng ac pahkotwen,” yohkna nuh sin mwet suc sun mwe kweok. (James 5:11) “Leum God el apkuhran nuh selos suc inse muhsahllah, ac El molelos suc wacngihnlac finsrak la.” (Psalm 34:18) Yac kom etuh lah kuht kuh in ahkenganye kuh ahkahsorye Jeova ke orekma lasr? El ahsor ac toasr ke pacl mwet uh oruh ma kuluk. (Psalm 78:40, 41) Tuhsruhktuh elos fin oruh ma suwohs, elos ahkenganyacl Jeova.—Riti Soakas 27:11, BMK.

3. Jeova el ahkkahlwemye fuhkah lah el luhngse kuht?

Ohiyac wo emeet luhn Jeova pa luhngse. Pwacye, “God El luhng.” (1 John 4:8) In wekuhnacng nuhke ma Bible uh fahk, luhngse luhn Jeova liyeyuck pac ke ma el oraclah. (Riti Orekma 14:17.) Ke sie mwe puhpuhlyuck, nuhnkuh ke inkacnek wo ma el orekuhtlac. Kuht kuh in liye tuhn na kahto, lohng on na wowo, ac ema mongo yucyuc. El luhngse kuht in engankihn moul.

AHKYOHKYE LUTLUT LOM

Lotwelah lah meac Jeova el orekmakihn in oraclah ma pucspucs. Ac liye lah Jeova el ahkkahlwemye nuh sesr fuhkah ohiyac wowo lal uh.

4. Nguhn muhtahl pa kuh luhn God

Ke pacl kuht luhngse in oruh ma se, kuht orekmakihn pahosr, Jeova el orekmakihn nguhn muhtahl lal in oruh ma pucspucs. Bible uh ahkkahlwemye lah nguhn muhtahl pa kuh se ma God el orekmakihn in oruh ma se. Ma inge tiac sie mwet in nguhn. Riti Luke 11:13 ac Orekma 2:17, BMK. Tohkohyang sramsramkihn kihsen siyuck inge:

God el ac fah ‘okoaclah nguhnal’ nuh selos suc siyuck ma inge. Ke ma inge, kom nuhnkuh tuh nguhn muhtahl pa kuh luhn God kuh sie mwet in nguhn? Efuh kom nuhnkuh ohinge?

Jeova el orekmakihn nguhn muhtahl lal in ahkpwacyeye ma usrnguck pucspucs. Riti Psalm 104:30 ac 2 Peter 1:20, 21, ac tohkohyang sramsramkihn kihsen siyuck se inge:

Meac kuhtuh inkacnek ma Jeova el orekmakihn nguhn muhtahl lal?

5. Oasr ohiyac wowo pucspucs luhn Jeova

Moses el sie mwet kuhlwacnsap oaru luhn God, tuhsruhktuh el puhla muh el srackna enenuh in ahkyohkye etwacack lal sin El suc Oracllah. Pwacnacng, Moses el fahk nuh sel: “Luti nuh sihk inkacnek lom, tuh nga fah kuh in etwe kom.” (Exodus 33:13, BMK) Ke ma inge, Jeova el fahk nuh sel Moses ohiyac wowo Lal uh. Riti Exodus 34:4-6, ac tohkohyang sramsramkihn kihsen siyuck inge:

In fal nuhke fuhs inge, meac kuhtuh ohiyac wowo luhn Jeova?
Ohiyac wowo fuhkah luhn Jeova kom luhngse na pwacye?

6. Jeova el nuhnkuh ke mwet uh

Mwet Hebrew, suc mwet luhn God in pacl meet ah, elos mwet kohs fin acn Egypt. Meac Jeova el puhla ke mwet lal uh sun mwe kweok? Lohng AUDIO kuh riti Exodus 3:1-10. Tohkohyang, sramsramkihn kihsen siyuck ten inge.

AUDIO: Jehovah Cared About Their Suffering (2:45)

Meac ma suhmuhslah inge ahkkahlwemye ke puhlakihn luhn Jeova ke pacl mwet uh elos kweok?—Liye fuhs 7 ac 8.
Kom nuhnkuh muh oasr kuh luhn Jeova ac el luhngse na pwacye in kahsruh mwet uh? Efuh kom fahk ohingacn?