LƐSIN 07

Uskayn Gɔd Jiova Bi?

PLE

We yu tink bɔt Jiova Gɔd, wetin de kam na yu maynd? Yu tink se in na Gɔd we wɔndaful, bɔt de fa frɔm yu jɔs lɛk aw di sta dɛn de fa frɔm wi? Ɔ yu de imajin se in nɔto rial pɔsin, i jɔs pawaful lɛk tɛnda? Uskayn Gɔd Jiova rili bi? Di Baybul tɔk bɔt sɔm pan Jiova in kwaliti dɛn, ɛn i tɔk bak se i bisin bɔt yu.

1. Wetin mek wi nɔ ebul fɔ si Gɔd?

“Gɔd na Spirit.” (Jɔn 4:24) Jiova nɔ gɛt mɔtalman bɔdi lɛk wi. In na Spirit we de na ɛvin, ɛn na ples we wi nɔ ebul fɔ si.

2. Wetin na sɔm pan Jiova in kwaliti dɛn?

Pan ɔl we wi nɔ de si Jiova, in na rial pɔsin we gɛt kwaliti dɛn we de mek di wan dɛn we sabi am kam nia am. Di Baybul se: “Jiova lɛk fɔ du tin tret, ɛn i nɔ go kɔmɔt biɛn in fetful savant dɛn.” (Sam 37:28, NWT) Dɔn bak in na Gɔd we “rili lɛk wi ɛn i gɛt sɔri-at,” mɔ fɔ pipul dɛn we de sɔfa. (Jems 5:11) “PAPA GƆD [“Jiova,” NWT] de nia ɔl udat fil se i dɔn dɔn fɔ am, ɛn i de ɛp udat fil se bɛtɛ nɔ de fɔ am igen.” (Sam 34:18) Bɔt yu bin no se ɛnitin we wi du de afɛkt Jiova? Pɔsin we disayd fɔ du bad tin dɛn kin mek Jiova in at pwɛl ɛn mek i nɔ gladi. (Sam 78:40, 41) Bɔt pɔsin we du wetin rayt kin mek i gladi.—Rid Prɔvabs 27:11.

3. Aw Jiova de sho se i lɛk wi?

Jiova in men kwaliti na lɔv. Infakt, di Baybul se “Gɔd na lɔv.” (1 Jɔn 4:8) Jiova dɔn yuz di Baybul ɛn di tin dɛn we i mek fɔ sho se i lɛk wi. (Rid Akt 14:17.) Fɔ ɛgzampul, tink bɔt aw i mek wi. I mek wi ebul fɔ si fayn fayn kɔlɔ dɛn, yɛri fayn myuzik dɛn, ɛn tes swit it dɛn. I want wi fɔ ɛnjɔy layf.

LAN MƆ

Lan bɔt wetin Jiova de yuz fɔ du wɔndaful tin dɛn. Dɔn lan bak aw Jiova de sho wi in wɔndaful kwaliti dɛn.

4. Oli spirit na di pawa we Gɔd de yuz fɔ du wetin i want

Jɔs lɛk aw wi de yuz wi an fɔ du wok, na so Jiova sɛf de yuz in oli spirit. Di Baybul sho se oli spirit nɔto pɔsin, bɔt na di pawa we Gɔd de yuz fɔ du tin dɛn. Rid Lyuk 11:13 ɛn Akt 2:17, dɔn una tɔk bɔt dɛn kwɛstyɔn dɛn ya:

Gɔd “go put” in oli spirit pan di wan dɛn we aks fɔ am. So yu tink se oli spirit na pɔsin, ɔ na di pawa we Gɔd de yuz fɔ du sɔntin? Wetin mek yu se so?

Jiova de yuz in oli spirit fɔ du wɔndaful tin dɛn. Rid Sam 33:6, NWT ɛn 2 Pita 1:20, 21, dɔn una tɔk bɔt dis kwɛstyɔn:

Wetin na sɔm we dɛn we Jiova dɔn yuz in oli spirit?

5. Jiova gɛt fayn fayn kwaliti dɛn

Mozis na bin fetful man we bin de wɔship Gɔd, bɔt i bin want fɔ no mɔ bɔt di Wan we mek am. So Mozis bin tɛl Gɔd se: “Mek a no yu we dɛn so dat a go no yu ɛn kɔntinyu fɔ du tin we go mek yu gladi fɔ mi.” (Ɛksodɔs 33:13, NWT) Jiova bin tɛl Mozis di kayn pɔsin we i bi ɛn sho am sɔm pan In kwaliti dɛn. Rid Ɛksodɔs 34:4-6, dɔn una tɔk bɔt dɛn kwɛstyɔn dɛn ya:

Us kwaliti dɛn Jiova bin sho Mozis?
Uswan pan Jiova in kwaliti dɛn yu rili lɛk?

6. Jiova bisin bɔt pipul dɛn

Di Ibru pipul dɛn, we na Gɔd in pipul dɛn, na bin slev dɛn na Ijipt. Aw Jiova bin fil we in pipul dɛn bin de sɔfa? Ple di ODIO dɔn una luk insay una Baybul as i de ple, ɔ rid Ɛksodɔs 3:1-10. Dɔn una tɔk bɔt di kwɛstyɔn dɛn we de dɔŋ.

ODIO: Jiova Bin Bisin bɔt In Pipul dɛn we Bin De Sɔfa (2:45)

Wetin dis akawnt tɛl yu bɔt aw Jiova de fil we mɔtalman de sɔfa?—Rid vas 7 ɛn 8.
Yu tink se Jiova rili want fɔ ɛp mɔtalman ɛn i ebul fɔ du dat? Wetin mek yu tink so, ɔ wetin mek yu nɔ tink so?