DILONGI 07

Yinki mutindu Yehova kele?

KUWA NA

Ntangu nge kekanisaka Yehova Nzambi, yinki kekuizilaka nge na makanisi? Yandi kele muntu ya kukamua kasi yandi kele ntama na nge, lokola kaka bambuetete ya galaksi yina kele ntama? To nge kemonaka ti yandi kele kilendo kasi yandi mekondua kimuntu, lokola kaka mupepe ya ngolo? Yinki mutindu mpenza Yehova kele? Na nzila ya Mpova na yandi Biblia Yehova kena kumonisa bikadulu na yandi, mpe yandi ketudilaka beto dikebi.

1. Samu na yinki beto kele na dikoki ve ya kumona Nzambi?

“Nzambi kele mpeve.” (Yoane 4:24) Yehova kele ve na nzutu ya kinsuni. Yandi kele mpeve yina kezingaka na dizulu, kisika yina beto lenda mona ve.

2. Yinki kele mua ndambu ya bikadulu yina kemonisaka kimuntu ya Yehova?

Atako yandi kemonanaka ve, kasi yandi kele muntu ya kedika yina kele na bikadulu yina ketindaka bantu yina kezolaka yandi bazaba yandi. Biblia metuba: ‘Yehova kezolaka lunungu, mpe yandi kesundula ve bantu na yandi ya kukuikama.’ (Nkunga 37:28) Yandi kele diaka ‘nzola mingi ya ntima mpe yandi kemonisaka ntima kiadi,’ mingi mingi na bantu yina keniokuamaka. (Yakobo 5:11) ‘Yehova kevuandaka pene pene ya bantu yina kele na kiadi; yandi kevukisaka bantu yina melemba nzutu.’ (Nkunga 34:18, noti na yinsi ya paje) Mpe nge mezaba ti mambu yina nge kesalaka lenda sepedisa to kupesa Yehova kiadi? Muntu yina keponaka kusala mambu ya yimbi kepesaka yandi mpasi na ntima mpe kiadi. (Nkunga 78:40, 41) Kasi muntu yina kesalaka mambu ya mbote kepesaka yandi kiese.—Tanga Bingana 27:11.

3. Yinki mutindu Yehova kemonisaka ti yandi kezolaka beto?

Kikadulu ya nene ya Yehova kele nzola. Yazola tuba, ‘Nzambi kele nzola.’ (1 Yoane 4:8) Yehova kemonisaka nzola na yandi kaka na nzila ya Biblia ve, kasi na nzila ya bima yina yandi salaka. (Tanga Bisalu 14:17.) Tala, na kifuani, mutindu yandi salaka beto. Yandi pesaka beto dikoki ya kumona bakulere ya kitoko, kuwa miziki ya kitoko, mpe kusepela na madia ya kitoko. Yandi zola beto sepela na luzingu.

KOTA NA MPINDA

Longuka yina Yehova kesalaka samu na kukokisa mambu ya kukamua. Na manima tala mutindu Yehova kemonisaka beto bikadulu na yandi ya kitoko.

4. Mpeve ya nlongo —ngolo ya Nzambi yina kesalaka

Mutindu kaka beto kesadilaka maboko na beto samu na kusala, Yehova kesadilaka mpeve ya nlongo na yandi. Biblia kena kumonisa ti mpeve ya nlongo kele muntu ve, kasi ngolo yina yandi kesadilaka samu na kusala konso diambu yina yandi zola sala. Tanga Luka 11:13 mpe Bisalu 2:17, mpe na manima tadila kiuvu yayi:

Nzambi ‘ketiamuna’ mpeve ya nlongo na yandi na bantu yina kelombaka yau. Kasi, nge kekanisaka ti mpeve ya nlongo kele muntu, to yakele ngolo ya Nzambi yina kesalaka? Samu na yinki nge metuba mutindu yina?

Yehova kesadilaka mpeve ya nlongo na yandi samu na kusala mambu ya kukamua. Tanga Nkunga 33:6 mpe 2 Piere 1:20, 21, mpe na manima tadila kiuvu yayi:

Yinki kele ndambu ya mitindu yina Yehova sadilaka mpeve ya nlongo na yandi?

5. Yehova kele na bikadulu ya kitoko

Mose vuandaka nsambidi ya Nzambi ya kukuikama, kasi yandi zolaka kuzaba Mvangi na yandi mbote mbote. Na yau Mose tubilaka yandi: ‘Monisa munu banzila na nge, samu munu zaba nge.’ (Kubasika 33:13) Samu na kupesa yandi mvutu, Yehova monisaka na Mose ndambu ya bikadulu yina kemonisaka kimuntu na Yandi. Tanga Kubasika 34:4-6, na manima tadila biuvu yayi:

Yinki kele bikadulu ya kimuntu ya Yehova yina yandi monisaka na Mose?
Yinki bikadulu ya Yehova kesepedisaka nge mingi?

6. Yehova ketudilaka bantu dikebi

Baebreo, bisadi ya Yehova, vuandaka bananga na Ezipito. Yinki mutindu Yehova tulaka dikebi na bampasi na bau? Tula AUDIO mpe landa yau, to tanga Kubasika 3:1-10. Na manima tadila biuvu yayi melanda.

AUDIO: Yehova tudilaka bampasi na bau dikebi (2:45)

Yinki disolo yango kena kutubila beto samu na mutindu Yehova kekukimonaka samu na bampasi ya bantu?—Tala baverse 7 mpe 8.
Nge mekanisa ti Yehova kezolaka mpenza kusadisa bantu mpe yandi kele na dikoki ya kusala yau? Samu na yinki? Sasila mvutu na nge.

7. Nsemono kemonisaka bikadulu ya Yehova

Yehova kemonisaka bikadulu na yandi na nzila ya bima yina yandi salaka. Tula VIDEO. Na manima tanga Baroma 1:20, mpe tadila kiuvu yayi melanda.