ISAMBILILO 07

Kani BaYawe ni BaLesa Bakuba Shani?

LISHENI

Findo fiisa mwilangulushi lyenu ili mwalanguluka pali baYawe Lesa? Kani mulalanguluka’ti tekuti mubepo icibusa cabo, pakuti balicindamishe makosa kabili bali ukutali? Kani mulalanguluka’ti balikwatishe amakosa kabili tabakwetepo inkumbu? Kani baYawe muli bucine ni baLesa bakuba shani? Baibolo ilatubuule’fingi pa mibelo yabo. Ilatubuula nekweba’ti balitubikileko makosa akalango kabili balatulama.

1. Nindo tekuti tubwenepo baLesa?

‘BaLesa Mupashi.’ (Yoane 4:24) BaYawe tabalipo ne munefu koti bantunshi. Bo Mupashi. Nakabili, balekala kwiulu ukutali, uku abantunshi tababonapo.

2. Mibelo ya kuba shani imo-imo iyi baYawe bakwete?

Tekuti tubonepo baYawe, nangabe’fyo, bali ne mibelo iiweme makosa. Kabili ukusambilila pali bo ne kubeshiba bwino, kulilengeshe abantu abakuti ubwingi ukubatemwa makosa. Baibolo ilalabila ati: ‘BaYawe basololweshi abaweme, tabalekeleshapo aba bucine kuli bo.’ (Amasamo 37:28) Nakabili, baYawe “bali ne nkumbu ishikulu ne luse ulwinji,” makosa makosa kuli babo abalukupenga. (Jakobo 5:11) ‘Balekala apepi na babo abali ne mitima itobekele, balabapulusha abali ne mitima ya kubombomana.’ (Amasamo 34:18) Pano, kani mulishi ukweba’ti ifi tucita fingalengesha baYawe ukusangalala neli ukusomenwa ku mutima? Fyacine, umuntu uusalululapo ukucite’fibipile, alabasomesha ku mutima. (Amasamo 78:40, 41) Pano umuntu uusalululapo ukulukucite’fiweme, alabasangalasha makosa.—Pendeni Ifishimpi 27:11.

3. Kani baYawe balalangisha shani ati balitutemenwe?

Ubutemwe e mibelo ya baYawe iicilile makosa. Baibolo ilalabila ati: “BaLesa e butemwe.” (1 Yoane 4:8) BaYawe balalangishe’fi batutemenwe ukupitila muli Baibolo, eli na muli fyefyo balengele. (Pendeni Ifyacitilwe 14:17.) Ku cakubwenako, alakanyeni pa bantunshi. BaYawe balitulengele ne mpese ya kubona amakaala aapusene-pusene, ukulitemweshe’nyimbo ishiweme, eli ne kulitemweshe’fyakulya ifiweme. Icine, balafwaya’ti tulukulitemwesha amekalilo aaweme.

SAMBILILENI IFINGI

Ishibeni’ci baYawe bapyungisha pa kukonsha imilimo yabo iya kukankamika. Sambilileni na pali fyefyo baYawe balangisha imibelo yabo iiweme.

4. Umupashi uuswetelele makosa abaLesa

Fwe bantunshi, tulapyungisha amaboko ukucite’fintu ifilekene-lekene. Koti ni fyopele’fyo, baYawe nabo balapyungisho’mupashi wabo uuswetelele pa kukonsha imilimo yabo yonse lukoso. Baibolo ilalabila ati umupashi uuswetelele talipo ni baLesa abene, sombi makosa aabapyungisha pa kucite’fintu ifilekene-lekene. Pendeni Luku 11:13 na Ifyacitilwe 2:17, ne kwambaala ifyakwipushe’fi:

BaLesa ‘baketila’ umupashi wabo uuswetelele pali bonse lukoso abalukubalomba. Kani mulukulanguluka ati umupashi uuswetelele ni baLesa, neli makosa bapyungisha? Nindo mwalabilile’fyo?

BaYawe balapyungisha umupashi wabo uuswetelele pa kukonshe’milimo yabo iya kukankamika. Pendeni Amasamo 33:6 na 2 Petilo 1:20, 21, ne kwambaala icakwipushe’ci:

Ni muli shisa nshila baYawe bapyungishepo kale umupashi wabo uuswetelele?

5. BaYawe bali ne mibelo iiweme makosa

Mose ali mupyungishi wa cine uwa baLesa. Nangabe’fyo, alukufwaya ukwishiba bwino Abalengeshi bakwe. Popele alilombele baLesa ati: “Mundangishe inshila shenu.” (Ifyakufuma 33:13) Pakuti pali fyefyo, baYawe kababuulako Mose ifi bali, eli ne mibelo yabo imo-imo. Pendeni Ifyakufuma 34:4-6, eli ne kwambaala ifyakwipushe’fi:

Ni isa mibelo pa mibelo yabo, iyi baYawe babuulileko Mose?
Ni isa mwatemwapo makosa?

6. BaYawe balibikileko makosa akalango ku bantunshi

Pa mpindi imbi, abaEbeya, abali abantu ba baLesa bali mu busha ku Ijipiti. Kani baYawe balukumfwa shani pali fyefyo abantu babo balukupenga? Kutikeni ku MASHIWI AKOPELWE eli ne kulondamo, neli pendeni Ifyakufuma 3:1-10. Panuma ya fyefyo, ambaaleni ifyakwipusha fyakonkapo.

AMASHIWI AKOPELWE: BaYawe Balibwene Ukupenga Kwabo (2:45)

Ukwelelwa ne filembelelwe pali lili ilembo, kani baYawe balomfwa shani ili abantunshi balukupenga?—Boneni apakupenda pa 7 na 8.
Kani mulicetekele ati muli bucine baYawe balafwaisho’kofwako abantunshi kabili ati bali ne makosa akucite’fyo? Nindo mwalabilile’fyo?

7. Imibelo ya baYawe ilabwenekela na muli fyefyo balengele

Imibelo ya baYawe ilabwenekela na mu fintu ifilekene-lekene ifi balengele. Tambeni VIDYO. Panuma pendeni AbaLoma 1:20, eli ne kwambaale’cakwipusha cakonkapo.