SOMO 07
Yova ká kʉ ngbǎ di ná ke?
Ni di ngaddi Yova Mungu djo ná saa na, ni ká adi riddi ke kʉ ngbǎ di ná ke? Ke do ká ni adi nji bbo inga ni ká adi ke nja da kʉ ni ró ro ri, ddiddi dyødyø e da ni ró ro nari bbai? Inga ni ká adi riddi nari kʉ Mungu kʉ nga kʉ ná ke, ro ddikpa kpakpanga bbo vʉvʉ bbai? Nde Yova ká kʉ ngbǎ di ná ke? Biblia adi Yova dhó njonjo kʉ ná sifa d’ra ko dho ndirigoti ri rid’ra Yova adi ngaddi nì ni djo.
1. Ko ká adi Mungu nja nzɨ addudho?
“Mungu kʉ roho.” (Yohana 4:24) Yova nga kʉ njanjani ná le ndí na ri. Ke kʉ nzɨ njani ná le ndí na ra nǎ, nzá ko ka ko nja ná ngana.
2. Yova ká e ngbá sifa ro na mai?
Yova ro nzá ko ka ko nja ri. Ro ke djo ko di lochu ná saa na, ko adi ke ji bbo dhonalo ke kʉ ni kʉ ná ke, bbo thonga ná sifa na ndi kʉ ro. Biblia ripo: “Yova ji chølo ndirigoti ke nzɨ adi chi tøni ndi dho ná ndrŭ ro bba ri.” (Zaburi 37:28) Godhé ke kʉ “jidha na bbo ndirigoti zølo na,” ro bbo pli ke adi fø sifa dhǒ nzanzani ná ndrŭ dho. (Yakobo 5:11) “Yova kʉ chøchø bʉ thí bʉni ná ndrŭ ró, ke adi si ró klø sini ná ndrŭ gøgø.” (Zaburi 34:18, maelezo ya chini) Ni ká churi ngbà nari kʉ, ko nji ná lo ka ndi bbʉ hwè inga njedha Yova thí dho? Ddikpa ke di chelo nji ró, Yova thí adi bʉni bʉ ndirigoti føri adi njedha bbʉ ke dho. (Zaburi 78:40, 41) Ro ddikpa ke di bblo lo nji ró, Yova thí adi hwè ba.—Azø Mezali 27:11.
3. Yova ká adi ndi ji ko ji nari dho ngbaribbai?
Yova dhó sifa kana bbo pli kʉ nari kʉ jidha. Biblia ripo, “Mungu kʉ jidha.” (1 Yohana 4:8) Yova nzɨ adi ndidhó jidha dhǒ Biblia chulu dhé ri, ro ke adi ri dhǒ no ndi no ná ritsi chulu maddi. (Azø Matendo 14:17.) Loroji na, addinga ngbaribbai ma ke no ko nari djo. Ke no ko bblo nari dho, ko ka ko nja d’ad’ani ná rangi, ko rr bblo wá ná miziki, ndirigoti ko mbu djú o ná nyo dzi. Ke jiri ko é hwè na kodhó maisha nǎ.
ANE LONANGA BBO
Aneri ni chu ngbaribbai ma Yova adi ké dho le nanga ka ndi keni ná ritsi nji nari. Ndirigoti anja ngbaribbai ma ke adi ndidhó bblo kʉ ná sifa dhǒ ko dho nari.
4. Roho takatifu kʉ Mungu dhó njí dhi kpakpanga
Ko adi njínji ko thó na nari bbai, Yova adi njínji ndidhó roho takatifu na. Biblia ripo roho takatifu nga kʉ ndrŭ ri, ro ri kʉ ritsi Mungu adi nji na ná kpakpanga. Azø Luka 11:13 ndirigoti Matendo 2:17, ndirigoti anitilo i ngadhudha djo:
-
Mungu si ndidhó roho takatifu “bbʉ” nì ri kó ndi tso ná ndrŭ dho. Nde ni ká adi riddi roho takatifu kʉ ndrŭ inga Mungu dhó njí dhi kpakpanga? Fø ká ni ripo addudho?
Yova adi njínji ndidhó roho takatifu na ndiro ndi njí ké dho le nanga ka ndi keni ná njí d’e. Azø Zaburi 33:6 ndirigoti 2 Petro 1:20, 21, ndirigoti anitilo i ngadhudha djo:
-
Yova ká njingʉe njí ro ndidhó roho takatifu na ngbá chulu mai?
5. Yova kʉ bblo kʉ ná sifa na
Nì mai Musa ngʉe chi tøni Mungu dho ná ke ro, ke jingʉeri ndi chu ritsi no ná ke bblo pli. Fø lo dho Musa pongʉeri ɨ ke dho: “Aliri ma famu nidzá chu, ndiro ma chu ni d’e.” (Kutoka 33:13) Fø ro Yova dhongʉe ndi kʉ na ná sifa ro ke dho. Azø Kutoka 34:4-6, ndirigoti anitilo i ngadhudha djo:
-
Yova ká dhongʉe ndi kʉ na ná ngbá sifa Musa dho?
-
Yova dhó bbo tho ni nyǒ nari ká kʉ ngbá sifa?
6. Yova adi ngaddi nì ndidzá ndrŭ djo
Waebrania ngʉe Mungu dzá ndrŭ, kpa ngʉ nzani nza Mizri nǎ nokpa dhi maisha nǎ. Yova ká ngʉ ndi mbu ngbaribbai ndidzá ndrŭ ngʉ nzani nari dho? ANIRR ODIO ndirigoti adyø, inga azø Kutoka 3:1-10 nǎ kʉ ná lo. Ndirigoti anitilo i ngadhudha djo.
-
Fø lo ká ngbá longaddi ni dho ngbaribbai ma Yova adi ndi mbu ndidzá ndrŭ di nzani ró nari djo? —Anja verse 7 ndirigoti 8.
-
Ni ká riddi nari kʉ, Yova adi riji ndi kó ndrŭ tsotso bbʉbbʉ ndirigoti ri ká ka ndi kaka ke njiri fø? Ká addudho, inga nzá addudho?
7. Yova dhó sifa njani no ke no ná ritsi chulu
Yova dhǒ ndidhó sifa no ndi no ná ritsi chulu. Aninja VIDEO. Føri goti azø Waroma 1:20, ndirigoti anitilo i ngadhudha djo.
-
Ni ká adi Yova dhó ngbá sifa nja no ke no ná ritsi chulu?
NJA NDRŬ ADI RIPO: “Mungu nga kʉ ndrŭ ri, ke kʉ ddikpa kpakpanga, krʉ ngalu ndi kʉ ro.”
-
Nde ni ká adi riddi ngbǎ?
-
Fø ká ni adi riddi addudho?
LO DZÁ DɄNGA
Yova ro nzá ko ka ko njari. Ro ke kʉ bblo sifa na bí, ri kana bbo pli kʉ nari kʉ jidha.
Lo djolu le ngʉ nari
-
Ko ká adi Yova nja nzɨ addudho?
-
Roho takatifu ká kʉ addu?
-
Yova ká kʉ ngbá sifa ro na mai?
NI KA NI CHU NÁ NJA LO
Aneri ni chulo bbo Yova dhó 4 kʉ ná bbobbo sifa djo.
“Mungu Ni Mutu wa Namna Gani?” (Munara wa Mulinzi Na. 1 2019)
Aneri ni chu Yova nga kʉ krʉ kʉ ná ngalu ri nari dhǒ ná lo.
“Mungu Iko Fasi Yote?” (Jw.org djó kʉ ná lo)
Anja addudho ma Biblia ddi roho takatifu Mungu thó na nari.
“Roho takatifu Ni Nini?” (Jw.org djó kʉ ná lo)
Ddikpa nga nyǒ kʉ ná ke dho ringʉe kpakpa ndi u Mungu ji ndi ji nari. Anja addu ma øngʉe kedhó ngaddidha thika nari.
“Sasa Ninajisikia Kuwa Ninaweza Kusaidia Wengine” (Munara wa Mulinzi, 1 Mwezi wa 10, 2015)
