KALABO 07

Jehova Maʋaa Wulovɛ Ɣɛ Le?

TƐ GÁ

Ya ɣi-gaa-ziɛna e vile Jehova va, zɛɓɛi ya va e ɣigii zu e vile ba? E ɣisu tɔ ga kee ɣaa-ɓaa Ɣalagi nii maa woozagɛi e va, e ɣɛ velei sɔmɔ dekaitiɛ te la? Ɔɔ e ɣisu tɔ ga Galagi nii gaa-ɓaa zeea ga ʋike, kɛ lɛ nu maa wõi zoga? Jehova maʋaa wulovɛ ɓɔɔ ɣɛ le? Gala Kɔlɔi Jehova luɓo-veleitiɛ lɛɛvɛ, e dɛɛvɛ wɔnɔ ga kpɛdɛvɛ e ʋaa ma.

1. Zɛɓɛi e kɛɛ dɛ lɛ wɛlɛɛ Gala ba?

“Gala ɣa ga ŋinɛ” (ŋinɛ pagɔ). (Jɔ̃ 4:24, NWT) Dɔtɔi e Jehova ya ɛ lɛ ga velei de la. Tɔ gee wɔlɔgi zu, vɛ dɛ lɛ zooga dɔɔ wɛlɛ na va.

2. Jehova luɓo-velei taniga ta ga zɛɓɛ?

Velei ɓalaa dɛ lɛ wɛlɛɛ la Jehova va, tɔ ʋulu zu. Tuɓo-vele vagɔ lamaa ɣa zeea, niitiɛ ta ɓɔ de va de wõi la, de lɔtɔ ba. Gala Kɔlɔi ɣɛ: “Jehova wõivɛ ga tele-bo tuoi. Ɛ lɛ wɔlɔ-wɔlɔ wulu ɣaa ʋega niitiɛ va wõila te ya faa ma.” (Psalms 37:28) Towa numaa ‘maa-wõi zo, e ga maa-wõi-ɣaa-wo nu,’ towa nii ɣɛ ɓɔɔ niitiɛ vɛ te laa-nɔwɔ-wosu. (Jĩi 5:11) Jehova ɣa niitiɛ woba te yii ŋala-ŋalagɛi, towa niitiɛ maazu vɛtɛ te yii zuulizu. (Psalms 34:18) E ɣisu da Jehova wuuzu nɛɛ, ɔɔ de kɛ zii zuuli ga velei da luɓo la? Faa yowũ ɣɛɛ veaitiɛ ta kɛ ɓɔɔ zii zuuli. (Psalms 78:40, 41) Kɛ tuɓo-vele vagɔ veaitiɛ ta kuuzu nɛɛ.—Proverbs 27:11 lodo.

3. Jehova dɛɛvɛ ɣɛ le ga wõila ɣa zeea de ʋaa ma?

Jehova na tuɓo-veleitiɛ ɓɔgapɛ zaama, wõilai ɣa e ga maɓigii. To mu ʋɔlɔ, Gala Kɔlɔi ɣɛ “Gala ka ga wõila.’’ (1 Jɔ̃ 4:8) Jehova lɛ nɔ na wõilai lɛɛni Gala Kɔlɔi zu, kɛ e dɛɛvɛ ɓalaa niitiɛ zu e kpɛtɛɛ. (Te Ɣɛɛ Ʋaitiɛ 14:17 lodo.) Ma wo-kɔ̃ɔ-mai ta ɣa ga, velei e de ɓɛtɛɛ la. E de ɓɛtɛvɛ ga da zoo de wɛlɛ ŋɛni vapagaa va. Da zoo wɔnɔ de gui maa ɣaa nɛɛ wulo, na ɣa ɣɛɛna de daa-mii ŋɛni nɛɛ-nɛɛga mi. É wõini de ŋeteai maa ɣaa-nɛɛ wulo.

FAA LAMAA MAA WOLI

Faa maa woli e vile velei va Jehova ɣa faa maa wɔlɔ-wɔlɔga ɣɛɛ la. Na ɣa ɣɛɛna velei Jehova na tuɓo-veleitiɛ lɛɛ la.

4. Gala baa ŋinɛgi—ɣa ga Gala na gaa-ɓai

Velei nɔ da tii ɣɛɛ la ga de yee, Jehova ɣa tii ɣɛ ga baa ŋinɛgi. Gala Kɔlɔi dɛɛvɛ ga Gala baa ŋinɛgi lɛ ga ʋulu ŋɛni, kɛ tɔ ga gaa-ɓai Jehova ɣa tii ɣɛɛ la. A Luki 11:13 ɓɔga Te Ɣɛɛ Ʋaitiɛ 2:17 lodo, wo gaa-zaɣa-kɛɛ nii ɣaa wote:

Taitiɛ ta Gala ɣaa-zaɣa-kɛ baa ŋinɛgi ʋaa ma, towa fe te ya. Na ma, e ɣisu Gala baa ŋinɛgi ɣa ga ʋulu ŋɛni ɓɔɔɓɔɔ, ɔɔ tɔ ga Gala na gaa-ɓai? Zɛɓɛi e kɛɛ yiɛ na wo?

Jehova ɣa faa maa wɔlɔ-wɔlɔga ɣɛ ga baa ŋinɛgi. A Psalms 33:6 ɓɔga 2 Pite 1:20, 21 lodo, wo gaa-zaɣa-kɛɛ nii ɣaa wote:

Jehova vɛɛ tii ɣɛɛzu ga baa ŋinɛgi pelei taniga zu ɣɛ le?

5. Jehova luɓo-velei vagɛ

Mooze ɣɛni ɓɔɔ ga Gala feli nu ɓɔɔɓɔɔ, kɛ e ɣɛni wõini e kpɛtɛ Ɣalagi wɛ̃ɛ ɓɔɔ ga pagɔ. Na ma, Mooze ɣɛni Jehova ma: “Kɛ ge ya lɔgitiɛ wɛ̃ɛ ga ge zoo ge e wɛ̃ɛ.” (Exodus 33:13) Jehova nii ɣaa woteni ga velei e na tuɓo-velei taniga lɛɛni la ga Mooze. A Exodus 34:4-6 lodo, wo gaa-zaɣa-kɛɛ niitiɛ ɣaa wote:

Jehova na tuɓo-velei taniga ta ga zɛɓɛ e dɛɛni ga Mooze?
Jehova na tuɓo-veleitiɛ zaama, ma zɛɓɛ ɣa ɓɔɔ e wõini la?

6. Jehova ɓɛdɛvɛ ɓɔɔ de ma

Gala na numaitiɛ, na ɣa ga Hiiɓuluitiɛ, te ɣɛni ga duo Iije. Jehova ɣi-gaa-ziɛni ɣɛ le e vile daa-nɔwɔ-wogi va te ɣɛni levesu su? GOO-ZIƔII lɛ ga, na ɣa ɣɛɛna e ya Ɣala Kɔlɔi laa lao, Exodus 3:1-10 wɔ. Yà wolona, wo gaa-zaɣa-kɛɛ niitiɛ ɣaa wote.

GOO-ZIƔII: Jehova Ɓɛdɛɛ E Ɣɛni Te Ma Tei Te Ɣɛni Laa-Nɔwɔ-Wosu (2:45)

Zɛɓɛi nii dɛɛ ga yiɛ e vile velei Jehova ɣa ɣi-gaa-ziɛ la e vile daa-nɔwɔ-wogi va da levesu?—Wɛlɛ ma woo 7, ɓɔga 8 va.
E ɣisu Jehova wõini ɓɔɔ e ɓɔ de va? E ɣisu gaa-ɓaa ɣa zeea ga e kɛ? Zɛɓɛi e kɛɛ yiɛ na wo?