TUTO 07
Jehova ki ya Cwañi?
Hamunahana ka za Jehova Mulimu, ki lika mañi zetaha mwa munahano wamina? Kana muikutwa kuli ki yasabisa hahulu, ni kuli uinzi kwahule ni mina sina feela moliinezi linaleli ze mwa mulalambinda o kwahule mwa mbyumbyulu? Kamba kana munahana kuli unani maata amatuna hahulu, inge mushika wa pula? Kanti Jehova ki ya cwañi luli? Mwa Linzwi lahae, yona Bibele, Jehova ulutaluseza mwainezi luli. Mi hape Bibele ilutaluseza kuli waisa pilu batu.
1. Ki kabakalañi halusa koni kubona Mulimu?
“Mulimu ki Moya.” (Joani 4:24) Jehova haana mubili sina luna batu moluinezi. Mulimu ki moya mi upila mwa lihalimu, ili sibaka selusa koni kubona.
2. Ki tulemeno mañi totuñwi twanani tona Jehova?
Halukoni kubona Jehova. Kono halufita fa kumuziba, lukalanga kumulata kakuli uteñi luli mi unani tulemeno totunde. Bibele ibulela kuli: “Jehova ulata katulo yelukile, mi haana kuyubeka babasepahala bahae.” (Samu 37:28) Hape Jehova unani “lilato lelituna ni makeke” sihulu kwa batu babakopana ni manyando. (Jakobo 5:11) “Jehova ufakaufi ni babalobehile lipilu; upilisa babazwafile.” (Samu 34:18, litaluso ze kwatasi) Mi kana mwaziba kuli kunani mwaikutwelanga Jehova halueza lika zeñwi? Haikutwangi hande habona mutu yaeza lika zemaswe. (Samu 78:40, 41) Kono watabanga habona mutu yaeza lika zende.—Mubale Liproverbia 27:11.
3. Jehova ubonisa cwañi kuli walulata?
Kalemeno kakatuna ka Jehova ki lilato. Mane, “Mulimu ki lilato.” (1 Joani 4:8) Jehova ubonisa kuli walulata ka kulufa Bibele, mi hape luiponela lilato lahae kwa lika zabupile. (Mubale Likezo 14:17.) Ka mutala, hamunahanisise feela mwalubupezi Jehova. Ulubupile ni buikoneli bwa kubona mibala yeshutana-shutana yeminde, kuutwa milumo, mane ni buikoneli bwa kutaluhanya moliutwahalela lico zeshutana-shutana. Lika ze kaufela libonisa kuli Jehova ubata kuli luikole bupilo.
MUBATISISE
Muitute zaitusisanga Jehova kuli apete lika zetuna. Mi hape mubatisise ka za mo Jehova aluboniseza tulemeno twahae totunde.
4. Moya okenile ki maata a Mulimu asebeza
Sina feela moluitusisezanga mazoho aluna kuli lukone kueza misebezi yemiñwi, Jehova ni yena uitusisanga moya wahae okenile kuli apete milelo yahae. Bibele ibonisa kuli moya okenile haki Mulimu, kono ki maata aitusisa Mulimu kuli akone kupeta misebezi yahae. Mubale Luka 11:13 ni Likezo 2:17, mi kihona mukanyakisisa lipuzo zelatelela:
-
Mulimu uka fa moya okenile ku babamukupa ona. Kana munahana kuli moya okenile ki Mulimu, kamba ki maata a Mulimu asebeza? Ki kabakalañi hamubulela cwalo?
Jehova uitusisanga moya wahae okenile kuli aeze misebezi yemituna. Mubale Samu 33:6 ni 2 Pitrosi 1:20, 21, mi kihona mukanyakisisa puzo yelatelela:
-
Ki mwa linzila mañi mo Jehova naaitusisize moya wahae okenile?
5. Jehova unani butu bobunde
Mushe neli mutangaa Mulimu yanaasepahala, kono naabata kuziba zeñata ka za Mubupi wahae. Mushe naakupile Mulimu kuli: “Nizibise linzila zahao, kuli nikuzibe.” (Exoda 33:13) Jehova naalabile kupo yeo ka kutaluseza Mushe mwainezi yena Jehova. Mubale Exoda 34:4-6, mi kihona mukanyakisisa lipuzo zelatelela:
-
Ki tulemeno mañi twanani tona Jehova twanaatusize Mushe kuziba?
-
Kwa tulemeno twa Jehova, ki tufi tomutabela hahulu?
6. Jehova waisa pilu batu
Nako yeñwi batu ba Mulimu, bona Maheberu, nebakile baba batanga mwa Egepita. Jehova naaikutwile cwañi batu bahae hane banyanda? Muteeleze kwa LITABA ZEBALILWE kamba mubale Exoda 3:1-10. Kihona mukanyakisisa lipuzo zelatelela.
-
Kulikana ni litaba zemusazo teeleza ze, Jehova uikutwanga cwañi ka za manyando ebakopana ni ona batu?—Mubone litimana 7 ni 8.
-
Kana munahana kuli Jehova ubata luli kutusa batu mi unani maata a kueza cwalo? Ki kabakalañi hamunahana cwalo?
7. Lwakona kuituta tulemeno twa Jehova kwa lika zabupile
Jehova ulutusa kulemuha tulemeno twahae kwa lika zabupile. Mubuhe VIDIO. Kihona mukabala Maroma 1:20, ni kunyakisisa puzo yelatelela.
-
Ki tulemeno mañi twa Jehova tomulemuha kwa lika zabupile?
BABAÑWI BABABULELANGA KULI: “Mulimu haki mutu, ki moya feela oliteñi kai ni kai.”
-
Mubona cwañi?
-
Ki kabakalañi hamuikutwa cwalo?
LITABA KA BUKUSWANI
Halukoni kubona Jehova, kono lwakona kulemuha tulemeno twahae totunde inge cwalo lilato.
Mulundulule
-
Ki kabakalañi halusa koni kubona Jehova?
-
Moya okenile ki nto mañi?
-
Ki tulemeno mañi twanani tona Jehova?
MUBONE LITABA ZEÑWI
Muekeze kwa zibo yamina ka za Jehova ka kuituta tulemeno totutuna totune twanani tona.
Munyakisise lika zebonisa kuli taba ya kuli Jehova uinzi kai ni kai haki ya niti.
Mubone libaka Bibele haibiza moya okenile wa Mulimu kuli ki mazoho ahae.
Muuna yomuñwi yali sibofu, naasalumeli kuli Mulimu wamuisa pilu. Mulemuhe zene mutusize kucinca mubonelo wahae.
“Cwale Seniikutwa Kuli Nakona Kutusa Batu Babañwi” (Tawala ya Mulibeleli, October 1, 2015)
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
