KIFUNDWA 07
Lelo Yehova Udi Namani?
Potela Yehova Leza, i bika bikwiya mu ñeni? Lelo umumonanga pamo bwa kintu kampanda kityinwa kidi kulampe mwikadile ñenyenye idi mu kisansa kyayo kidi kulampe? Nansha le umumonanga pamo bwa kibukomo kampanda kyampikwa ngikadila mwikadile mukungulo? Le Yehova aye mwine udi namani? Yehova ukulombola ngikadila yandi imo mu Kinenwa kyandi Bible, ne amba ukutele mutyima.
1. Mwanda waka ketubwanyapo kumona Leza?
“Leza i Mushipiditu.” (Yoano 4:24) Yehova kadipo na ngitu bwa ino yetu. Aye i Mushipiditu, ushikatanga momwa mūlu, kifuko kyoketubwanyapo kumona.
2. Le i ngikadila’ka imoimo idi na Yehova?
Nansha Yehova byakamwekangapo, aye i Muntu udi’ko bine, kadi udi na ngikadila ikoka boba bamuyukile. Bible unena’mba: “Yehova usenswe boloke, kadi kakelapo bantu bandi ba lulamato.” (Ñimbo ya Mitōto 37:28) Yehova “i muyule kisanso kya ku mutyima kadi i wa lusa,” nakampata ku bantu basusuka. (Yakoba 5:11) “Yehova udi pabwipi na boba ba mityima mityumuke; upandijanga boba ba mityima minyoñame.” (Ñimbo ya Mitōto 34:18, kunshi kwa dyani) Le uyukile amba Yehova uteñwanga na bilongwa byotulonga? Yewa ense utonga kulonga bintu bibi umusanshijanga ne kumufītyija mutyima. (Ñimbo ya Mitōto 78:40, 41) Ino yewa utonga kulonga byoloke umusangajanga.—Tangai Nkindi 27:11.
3. Lelo Yehova ulombolanga namani amba witusenswe?
Ngikadila mikatampe ya Yehova i buswe. Ne kadi, “Leza i buswe.” (1 Yoano 4:8) Yehova i mulombole buswe bwandi kupityila ku Bible, ino kadi i ne ku bintu byapangile. (Tangai Bilongwa 14:17.) Tala kimfwa muswelo waetupangile. I mwitupe bukomo bwa kumona misombelo isangaja, kuteja minjiki mineñene, ne kutobadilwa bidibwa bya musonso. Usakanga tusangele būmi.
LANGULUKA BININGE
Wifunde, uyuke kingidilwa kingidijanga Yehova pa kulonga bintu bya kutendelwa. Kadi tala ne muswelo wasokola ne wamwekeja ngikadila yandi isangaja.
4. Mushipiditu ujila i bukomo bwa Leza bwingila
Yehova wingidijanga mushipiditu ujila monka motwingidijijanga batwe makasa etu pa kulonga bintu. Bible unena’mba mushipiditu ujila ke muntupo, ino i bukomo bwingidijanga Leza pa kulonga bintu. Tangai Luka 11:13 ne Bilongwa 2:17, ne kwisambila pa bino bipangujo:
-
Leza ‘upungululanga’ mushipiditu wandi ujila pa boba bamulomba’o. Molangila, mushipiditu ujila i muntu’ni nansha i bukomo bwa Leza bwingila? Mwanda waka ubanena nankyo?
Yehova wingidijanga mushipiditu wandi ujila mwanda wa kulonga bintu bya kutendelwa. Tangai Ñimbo ya Mitōto 33:6 ne 2 Petelo 1:20, 21, ne kwisambila pa kino kipangujo:
-
Le i miswelo’ka imoimo ingidije’mo Yehova mushipiditu wandi ujila?
5. Yehova udi na ngikadila isangaja
Mosesa wādi mutōtyi wa Yehova wa kikōkeji, inoko wādi usaka kuyuka Umpangi wandi senene. O mwanda Mosesa wālombele amba: “Ndyukije mashinda obe, amba nkuyuke abe.” (Divilu 33:13) Yehova pa kulondolola Mosesa, wāmulombwele ngikadila Yandi imoimo. Tangai Divilu 34:4-6, ne kwisambila pa bino bipangujo:
-
Lelo i ngikadila’ka imoimo Yehova yaālombwele Mosesa?
-
Lelo abe i yepi yowasangela’po?
6. Yehova utele bantu mutyima
Bahebelu, bantu ba Leza, bāmuninwe bupika mu Edipito. Lelo Yehova wātengelwe namani na masusu abo? Londai MAWI MAKWATE nansha kutanga Divilu 3:1-10, ne kwisambila pa bipangujo bilonda’bya.
-
Le ino nsekununi itulombola bika pa mwiivwaninanga Yehova kitatyi kisusuka bantu?—Tala vese 7, ne 8.
-
Le ulanga Yehova usakanga bine kukwasha bantu ne le udi na bukomo bwa kwibakwasha? Mwanda waka ubanena nankyo?
7. Bupangi busokolanga ngikadila ya Yehova
Yehova witulombolanga ngikadila yandi kupityila ku bintu byapangile. Talai VIDEO. Kupwa, tangai Bene Loma 1:20, ne kwisambila pa kipangujo kilonda’kya.
-
Le i ngikadila’ka ya Yehova yomonanga mu bintu byapangile?
BANTU BAMO BANENANGA’MBA: “Leza ke muntupo udi’ko bine, ino i kibukomo’tu kidi konsokonso.”
-
Le abe ulanga’po namani?
-
Ne mwanda waka ubalanga nankyo?
MU KĪPI
Yehova i Mushipiditu wampikwa kumweka ino udi na ngikadila isangaja mivule, nakampata buswe.
Pitulukai’mo
-
Mwanda waka ketubwanyapo kumumona Yehova?
-
Le mushipiditu ujila i bika?
-
Lelo Yehova udi na ngikadila’ka imoimo?
KIMBA
Yukidija senene Yehova na kwifunda ngikadila yandi iná mikatampe.
Jingulula bukamoni bulombola’mba Yehova kadipo mu kintu kyonso.
“Le Leza Udi Konso, mu Kintu Kyonso?” (Kishinte kya pa Entelenete)
Wifunde, umone mwanda waka Bible utelanga mushipiditu ujila ne bu kuboko kwa Leza.
Muntu umo mpofu wadi upela kwitabija’mba Leza umutele mutyima. Tala i bika byashintyile milangwe yandi.
“Pano Mona bu Mbwanya Kukwasha Bakwabo” (Kiteba kya Mulami, 1 Kweji 10, 2015)
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
