DILONGESHA DIA 07
Yehowa utu mushindu kayi?
Utu wela meji ne: Yehowa Nzambi utu mushindu kayi? Utu umumona bu Nzambi munene udi ukemesha kadi udi kuulu menemene kule netu utudi katuyi mua kudia nende bulunda anyi? Peshi bu Nzambi wa bukole bua bungi udi kayi ne bumuntu bua kumvua mutu bantu bumvua anyi? Yehowa utu mushindu kayi menemene? Mu Bible Dîyi diende, Yehowa udi utuleja ngikadilu yende, ne mudiye ututabalela.
1. Bua tshinyi katuena mua kumona Nzambi?
“Nzambi udi Nyuma.” (Yone 4:24) Yehowa kena ne mubidi wa mashi ne mâyi to. Yeye udi Nyuma udi musombele mu diulu, muaba utudi katuyi mua kumona to.
2. Mbikadilu kayi bitu nabi Yehowa?
Nansha Yehowa kayi umueneka, mMuntu mulelela udi ne bikadilu bimpe bidi bisaka badi bamumanye bua kumunanga. Bible udi wamba ne: “Yehowa mmunange kulumbuluisha kuakane, yeye kakulekela bena lulamatu bende nansha.” (Misambu 37:28) Udi kabidi uleja bantu “dinanga dikole menemene ne luse,” nangananga badi bakenga. (Yakobo 5:11) “Yehowa udi pabuipi ne badi ne muoyo musunsuke; udi upandisha badi batekeshibue mu maboko.” (Misambu 34:18, dimanyisha) Udi mumanye ne: malu audi wenza adi mua kusankisha Yehowa anyi kumubungamija anyi? Muntu udi usungula bua kuenza malu mabi udi umuela mâyi ku makasa, umubungamija kabidi. (Misambu 78:40, 41) Kadi muntu udi wenza malu makane udi umusankisha.—Balayi Nsumuinu 27:11.
3. Mmunyi mudi Yehowa uleja ne: mmutunange?
Dinanga ke tshikadilu tshitambe bunene tshia Yehowa. Mu kuamba kuimpe, “Nzambi udi dinanga.” (1 Yone 4:8) Yehowa kena utulejila dinanga diende anu mu Bible to, udi udilejila kabidi mu bintu bidiye mufuke. (Balayi Bienzedi 14:17.) Tuangatabi tshilejilu tshia mushindu udiye mutufuke. Mmutufuke ne bukole bua kumona mekala malenga, kuteleja mijiki milenga, ne kumvua muenya wa biakudia bishême. Mmusue bua tuikale ne muoyo ne disanka.
BUELA MU BUONDOKE
Mona tshitu Yehowa wenza natshi malu adi akemesha. Pashishe umone mudiye utuleja bikadilu biende bitambe buimpe ne utumvuijabi.
4. Nyuma muimpe anyi bukole buenzeji bua Nzambi
Yehowa utu ukuata mudimu ne nyuma wende muimpe anu mututu petu tukuata mudimu ne bianza bietu. Bible udi uleja ne: nyuma muimpe ki mmuntu to, kadi mbukole budi Nzambi wenza nabu malu. Balayi Luka 11:13 ne Bienzedi 2:17, pashishe nuandamune nkonko eyi:
-
Nzambi ‘neitshikijile’ badi bamulomba nyuma wende muimpe. Nunku udi umona ne: nyuma muimpe mmuntu anyi mbukole bua Nzambi? Bua tshinyi udi wamba nanku?
Yehowa udi ukuata mudimu ne nyuma wende muimpe bua kuenza malu a dikema. Balayi Misambu 33:6 ne 2 Petelo 1:20, 21, pashishe nuandamune lukonko elu:
-
Yehowa ukadi muenze mudimu ne nyuma wende muimpe mu malu kayi?
5. Yehowa nNzambi wa malu mimpe
Nansha mukavua Mose utendelela Nzambi Mufuki wende ne lulamatu luonso, uvua ujinga bua kumumanya bimpe menemene. Ke bualu kayi wakambila Nzambi ne: ‘Mmanyisha njila yebe, bua nkumanye.’ (Ekesode 33:13) Yehowa wakandamuna Mose, yeye kumusokoluela bikadilu bia bumuntu Buende. Balayi Ekesode 34:4-6, pashishe nuandamune nkonko eyi:
-
Mbikadilu kayi bia bumuntu bua Yehowa bivuaye musokoluele Mose?
-
Mbiepi bitu bikusankisha wewe?
6. Yehowa utu utabalela bantu
Bena Ebelu mbantu ba Nzambi bavua mu bupika mu Ejipitu. Mmunyi muvua Yehowa mumvue bua mushindu uvuabu babakengesha? Tangilayi MÊYI MAKUATA, nulondeshe mu Bible, anyi nubale Ekesode 3:1-10. Pashishe nuandamune nkonko idi ilonda eyi:
-
Ntshinyi tshidi bualu ebu bukulongesha bua mutu Yehowa umvua patu bantu bakenga?—Tangila mvese wa 7 ne wa 8.
-
Udi umona bishi: Yehowa mmusue kuambuluisha bantu bushuwa anyi? Udi ukokesha bua kubambuluisha anyi? Bua tshinyi udi wamba nanku?
7. Tudi tumanyina bikadilu bia Yehowa ku bintu bidiye mufuke
Bikadilu bia Yehowa bidi bimuenekela ku bintu bidiye mufuke. Tangilayi FILME. Balayi Lomo 1:20, pashishe nuandamune lukonko ludi lulonda elu:
-
Mbikadilu kayi bia Yehowa biudi wewe umona mu bintu bidiye mufuke?
BAMUE BATU BAMBA NE: “Nzambi ki mmuntu to, kadi mbukole nanku budi miaba yonso.”
-
Wewe udi wamba tshinyi?
-
Bua tshinyi udi wamba nanku?
TSHIA KUKUATA
Yehowa mmuntu wa mubidi wa Nyuma udi kayi umueneka. Udi ne bikadilu bimpe bia bungi, nangananga dinanga.
Diambulula
-
Bua tshinyi katuena mua kumona Yehowa?
-
Nyuma muimpe ntshinyi?
-
Yehowa utu ne bikadilu kayi?
BIA KUTANGILA KABIDI
Longa malu a bungi adi atangila bikadilu binene binayi bia Yehowa.
“Nzambi utu mushindu kayi?” (Tshibumba tshia Nsentedi No. 1 2019)
Mona malu adi ajadika ne: Yehowa katu miaba yonso to.
“Nzambi utu miaba yonso anyi?” (Tshiena-bualu tshia mu jw.org)
Mona bua tshinyi Bible udi ufuanyikija nyuma muimpe ne bianza bia Nzambi.
Bivua bikole bua muntu uvua mpofu kuitaba ne: Nzambi uvua umutabalela. Mona tshivua tshishintulule lungenyi luende.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
