KUDIZA 07
Yehova Wekala Ñahi?
Neyi mutoñojoka hadi Yehova Nzambi, mwamufwikijaña kwikala ñahi? Mwatoñojokaña nenu wakutiyisha woma chikupu nawa wekala kwakulehi nanenu neyi tutumbwa twamumulalanji tudi kwakulehi? Indi kwiji mwamufwikijaña nenu wukweti ñovu chikupu, ilaña hadi neyi muntuku, wudi neyi kudidima kwasweja? Hanu dinu Yehova wekala ñahi? Yehova watuleja yilwilu yindi Mwizu dindi Bayibolu nichatwakamenañayi.
1. Twabulilañadi kumumona Nzambi?
“Nzambi hiSpiritu.” (Yowanu 4:24) Yehova hekala namujimba wawuntuku. Yena hiSpiritu, washakamaña mwiwulu, mwiluña mutunateli kubula kumona.
2. Yilwilwinyi yikwawu yikwetiyi Yehova?
Yehova kwila tumumona nehi, ilaña neyi tumwiluka, tukumukeña muloña hiMuntu wukweti yilwilu yayiwahi. Bayibolu yahosha nawu: “Yehova wakeña wuñanji nawa hamba kashiya indi ashinshikaku.” (Masamu 37:28) Watiyilaña antu “wushona chikupu niluwi,” sweje-e anakukabakana. (Yakoba 5:11) “Yehova wudi kwakwihi nawantu abaluka nyichima; wamwinaña antu achikeka muspiritu.” (Masamu 34:18, tumazu twaheshina) Komana mweluka nenu Yehova nateli kuneña hela kuzañalala nayuma yitwelaña? Muntu welaña yuma yatama wamutiyishaña kutama nawa wamuneñeshaña. (Masamu 78:40, 41) Ilaña muntu welaña yuma yaloña wamuzañaleshaña.—Tañenu Yishimu 27:11.
3. Yehova wamwekeshaña ñahi nindi watukeña?
Chilwilu chaYehova chabadika hikukeña. Kafwampi, “Nzambi hikukeña.” (1 Yowanu 4:8) Yehova wamwekeshaña kukeña kwindi muBayibolu nimuyuma yaleñayi. (Tañenu Yilwilu 14:17.) Chakutalilahu, talenu chatuleñayi. Watuleña nawuswa wakumona wulombu wawuwahi, kutiya tumina twatuwahi nikudiluñisha yakuda. Wakeñaña nindi tuluñeña nawumi.
SANDUJOLENU CHIKUPU
Talenu chuma chazatishañayi Yehova hakukoña yuma yakuhayamisha. Nawa talenu Yehova chatumwekeshelañayi yilwilu yindi yayiwahi.
4. Spiritu yajila hiñovu yaNzambi yazatikaña
Neyi chitwazatishaña makasa etu kuzata nyidimu, Yehova niyena wazatishaña spiritu yindi yajila. Bayibolu yashimuna nawu spiritu yajila himuntu wanyi, ilaña hiñovu yaNzambi yazatishañayi hakwila yuma. Tañenu Luka 11:13 niYilwilu 2:17, kuhiñahu hanjekenu hanawa malwihu:
-
Nzambi “wakahuñunwina” spiritu yindi yajila hadi antu ayilombaña. Komana spiritu yajila himuntu, ntahindi hiñovu yaNzambi yazatikaña? Munahoshelidi mwenomu?
Yehova wazatishaña spiritu yindi yajila hakukoña yuma yakuhayamisha. Tañenu Isamu 33:6 ni 2 Petulu 1:20, 21, kuhiñahu hanjekenu hanilu lwihu:
-
Njilanyi mwazatishilañayi Yehova spiritu yindi yajila?
5. Yehova wukweti yilwilu yayiwahi
Mosi wadiña kambuña aNzambi washinshika, ilaña wakeñeleña kumwilukisha Nleñi yindi. Dichi Mosi wamwilili nindi: “Nleji njila jeyi kulonda nikwiluki.” (Kwidika 33:13) Yehova wamulejeli Mosi yilwilu yindi yayiwahi. Tañenu Kwidika 34:4-6, kuhiñahu hanjekenu hanawa malwihu:
-
Yilwilwinyi yayiwahi yikwetiyi Yehova yamulejeliyi Mosi?
-
Yilwilwinyi yikwetiyi Yehova yayitiyishaña kuwaha?
6. Yehova wayakamenaña antu
Antu jaNzambi, aHeberu, adiña anduñu muEjipitu. Yehova watiyili ñahi chakabakeneñawu? Vumishenu MAZU AKUKWATA DEHI nawa londelenuña muBayibolu yenu, hela tañenu Kwidika 3:1-10. Kuhiñahu hanjekenu hamalwihu analondelihu.
-
Iyi nsañu yinayidizishidi chatiyañayi Yehova neyi antu anakukabakana?—Talenu mavasi 7 ni 8.
-
Komana munakutoñojoka nenu Yehova wakeñaña chikupu kukwasha antu nawa nateli kuyikwasha? Muloñadi?
7. Yileñaleña yamwekeshaña yilwilu yikwetiyi Yehova
Yehova wamwekeshaña yilwilu yindi muyuma yaleñayi. Vumishenu VIDIYO. Kuhiñahu tañenu ARoma 1:20, nawa hanjekenu halwihu lunalondelihu.
-
Yilwilwinyi yaYehova yimwamonaña muyuma yaleñayi?
AMAKWAWU AHOSHAÑA NAWU: “Nzambi himuntuku, hiñovu hohu yekala kwejima.”
-
Munakutoñojokahu nenudi?
-
Munahoshelidi mwenomu?
YUMA YIMUNADIZI
Yehova himuntu itunateli kubula kumona, wukweti yilwilu yayivulu yayiwahi, sweje-e kukeña.
Kuhitulukamu
-
Muloñadi chitukubulila kumumona Yehova?
-
Spiritu yajila hichumanyi?
-
Yilwilwinyi yikwetiyi Yehova?
ILUKILENUHU NSAÑU YIKWAWU
Ilukenu chikupu chekalayi Yehova kuhitila mukudiza hayilwilu yindi yiwana yalema.
“Yilwilwinyi Yikwetiyi Nzambi?” (Kaposhi Kakutalila Na. 1 2019)
Talenu wunsahu wunakumwekesha nawu Yehova hekala muyuma yejimaku.
Talenu chaletesha Bayibolu yesekeji spiritu yajila namakasa aNzambi.
Iyala mputamesu chamukalilili kukuhwelela neyi chakwila Nzambi wamwakamenaña. Talenu chamuletesheli ahimpi yitoñojoka yindi.
“Ichi Namoni Nami Ninami Natela Kukwashaku Amakwawu” (Kaposhi Kakutalila, October 1, 2015)
You May Also Like
MALWIHU AVULA KWIHULAWU ANTU HADI AYINSAHU JAYEHOVA
Yumanyi Yadizishañawu aYinsahu jaYehova?
Munateli kuzatisha Bayibolu yidi yejima yimukweti hakudiza Bayibolu nawaYinsahu jaYehova. Mwani mwakasunuka kutambika antaña niamabwambu kulonda mudizili hamu.
