SULA MAR 07

Jehova En Nyasaye ma Chalo Nade?

TUGE

Ang’o ma biro e pachi sama iwinjo nying Jehova? Be dibed ni ok wanyal bedo osiepe Nyasaye nikech en mabor kodwa kendo olich miwuoro? Koso iparo ni en gi teko mang’eny kaka mor polo ma ok diher kata sudo bute? Kuom adier, Jehova chalo nade? Muma nyisowa moko kuom kido ma Jehova nigo kod kaka odewowa.

1. Ang’o momiyo ok wanyal neno Nyasaye?

“Nyasaye en Roho.” (Johana 4:24) Jehova onge gi del kaka mar dhano. En Roho kendo odak e polo kama ok wanyal nene.

2. Moko kuom kido ma Jehova nigo gin mage?

Ok wanyal neno Jehova. Kata kamano, kaka wamedo ng’eye e kaka wamedo here nikech en Ng’at mantie adier kendo en gi kido mabeyo ahinya. Muma wachonwa niya: “Jehova ohero gima kare, ok obi jwang’o joge momakore kode.” (Zaburi 37:28) Bende, “ogundho gi hera matut kendo okecho ji,” to ahinya ahinya joma chandore. (Jakobo 5:11) “Jehova ni machiegni gi jo ma chunygi onyosore, kendo oreso jo ma chunygi ool.” (Zaburi 34:18) Be ing’eyo ni gik ma watimo nyalo moro Jehova kata nyalo miyo owinj marach? Ng’at moyiero timo gik maricho chwanyo Jehova. (Zaburi 78:40, 41) To ng’at moyiero timo gik makare miyo chunye bedo mamor.—Som Ngeche 27:11.

3. Ere kaka Jehova nyiso ni oherowa?

Kido maduong’ ahinya ma Jehova nigo en hera. Muma wacho ni “Nyasaye en hera.” (1 Johana 4:8) Jehova nyisowa ni oherowa kokalo kuom Muma kod gik ma nochueyo. (Som Tich Joote 14:17.) Kuom ranyisi, par ane kaka nochuewa. Omiyowa nyalo mar neno rangi mabeyo, winjo thum mamit, kod winjo mit mar chiemo. Odwaro ni wabed mamor e ngimawa.

TIM NONRO

Non ane gima Jehova tiyogago mondo otim gik mabeyo miwuoro. Kae to ine kaka Jehova nyisowa kido mabeyo ma en-go.

4. Roho maler en teko mar Nyasaye

Jehova tiyoga gi rohone maler e timo gik moko mana kaka wan bende watiyoga gi lwetewa sama watiyo tich moro. Muma nyisowa ni roho maler ok en ng’ato to en mana teko ma Nyasaye tiyogo e timo gik moko. Som Luka 11:13 kod Tich Joote 2:17, kae to uwuo e wi penjo ma luwogi:

Nyasaye biro ‘olo’ rohone maler kuom jogo ma kwaye. Koro, iparo ni roho maler en ng’ato koso en mana teko ma Nyasaye tiyogo? Ang’o momiyo iwacho kamano?

Jehova tiyo gi rohone maler e timo gik mabeyo ahinya. Som Zaburi 33:6 kod 2 Petro 1:20, 21, kae to uwuo e wi penjo ma luwoni:

Jehova osetiyo gi rohone maler e yore mage?

5. Jehova nigi kido mabeyo

Kata obedo ni Musa ne en jatich Nyasaye, pod nodwaro ni omed ng’eyo Jachuechne e yo maber. Omiyo, Musa nonyiso Nyasaye kama: “Akwayi ni ipuonja yoreni mondo ang’eyi.” (Wuok 33:13) Jehova nonyiso Musa moko kuom kido mabeyo ma en-go. Som Wuok 34:4-6, kae to uwuo e wi penjo ma luwogi:

Gin kido mage mabeyo ma Jehova nigo ma nonyiso Musa?
Gin kido mage ma Jehova nigo ma moriga ahinya?

6. Jehova dewowa

Jotich Nyasaye, ma Jo-Hibrania, ne gin wasumbni e piny Misri. Jehova nowinjo nade sama ne gichandore? Tug SOMO MAR MUMA kendo uluwre gi jasomo, kata usom Wuok 3:1-10, kae to uwuo e wi penjo ma luwo.

SOMO MAR MUMA: Jehova Noresogi e Chandruok (2:45)

Ndikono nyisowa ni Jehova winjoga nade sama dhano chandore?—Ne kwan matindo 7 kod 8.
Be iparo ni Jehova gombo konyo dhano adier kendo ni en gi nyalo mar timo kamano? Ang’o momiyo iwacho kamano?