ZIRLAI 07

Jehova Chu Eng Ang Nge A Nih?

PLAY RAWH

Pathian Jehova chungchâng i ngaihtuah hian i rilruah eng nge lo lang? Ani chu ropui tak leh ngaihsânawm tak, mahse hla taka awm arsite ang maia nangmah hlat taka awm angin i ngai em? Nge ni a, ani chu thiltithei tak; mahse, mize nei lo khawpui rî ang maiin i mitthlâ zâwk? Jehova nihna dik tak chu eng nge ni? A Thu, Bible hmangin Jehova chuan a miziate bâkah, nangmah a ngaihsak che tih a târ lang a ni.

1. Engvângin nge Pathian kan hmuh theih loh?

“Pathian chu Thlarau a ni.” (Johana 4:24) Jehova chuan tisa a nei lo. Ani chu Thlarau, kan hmuh theih lohna hmun vâna awm a ni.

2. Jehova mize ṭhenkhat chu eng nge ni?

Jehova chu hmuh theih loh ni mah se, amah hretute tâna mize duhawm tak nei Mi tak tak a ni. Bible chuan: “LALPA chuan rorêlna fel a ngaina si a. A mi thianghlimte chu a kalsan ngai lo,” a ti a. (Sâm 37:28) Ani chu a bîk takin, hrehawm tuarte chungah ‘khawngaihna leh zahngaihnain’ a khat bawk a ni. (Jakoba 5:11) “LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn.” (Sâm 34:18) Chu bâkah, kan thiltihin Jehova chungah nghawng a nei thei tih i hria em? Thil ṭha lo tih thlangtu chuan ani chu a tilungni lovin, a tilungngai a. (Sâm 78:40, 41) Mahse, thil dik tih thlangtu erawh chuan a tilâwm thung a ni.—Thufingte 27:11 chhiar rawh.

3. Engtin nge Jehova’n min hmangaih tih a lantîr?

Jehova mize langsâr ber chu hmangaihna a ni a. A nihna takah chuan, “Pathian chu hmangaihna a ni.” (1 Johana 4:8) Jehova’n a hmangaihna chu Bible aṭang mai ni lovin, a thil siamte aṭang pawhin a lantîr a. (Tirhkohte 14:17 chhiar rawh.) Entîr nân, min siam dân hi lo ngaihtuah ta ila. Ani chuan rawng mawi takte hmuh theihna te, rimawi nalh tak tak ngaihthlâk theihna te, leh thil tui tak takte hriat theihna min pe a. Nun hlimawm tak nei tûrin min duh a ni.

ZIR BELHIN HMUH BELH RAWH

Jehova’n thil mak takte a siam dân zir la. Tichuan, a mize duhawm takte a lan chhuahtîr dân hmu ang che.

4. Thlarau thianghlim—Pathian chakna

Hnathawh nân kan kut kan hmang ang bawkin, Jehova’n a thlarau thianghlim chu a hmang a. Bible chuan thlarau thianghlim chu mi ni lovin, hnathawh nâna Pathian hman chakna angin a târ lang a ni. Luka 11:13 leh Tirhkohte 2:17 chhiarin, hêng zawhnate hi sawiho vang che u:

Pathianin a thlarau thianghlim chu a dîltute chungah a “leih” ang. Chuti chu, thlarau thianghlim chu mi angin nge i ngaih a, Pathian chakna angin? Engvângin nge chutianga i sawi theih?

Jehova’n a thlarau thianghlim chu thilmak tak takte hlen chhuah nân a hmang a. Sâm 33:6 leh 2 Petera 1:20, 21 chhiarin, he zawhna hi sawiho vang che u:

Eng kawngtein nge Jehova’n a thlarau thianghlim a hman?

5. Jehova’n mize duhawm tak a nei

Mosia chu Pathian betu rinawm tak a ni a; mahse, amah Siamtu chu hriat chian lehzual a duh a ni. Chuvângin, Mosia chuan Pathian hnênah: “Nangmah ka hriat chian theih nân che . . . i kawngte hi . . . mi hriattîr ang che,” a ti a. (Exodus 33:13) A chhân lêtnaah Jehova chuan Mosia chu A mize ṭhenkhatte a hrilh a ni. Exodus 34:4-6 chhiarin, hêng zawhnate hi sawiho vang che u:

Jehova’n a eng miziate nge Mosia hnênah a hrilh?
Jehova miziate zîngah eng nge i duh ber?

6. Jehova’n mite a ngaihsak

Pathian mi, Hebrai mite chu Aigupta-ah sal an tâng a. Engtin nge an hrehawm tawrhna chuan Jehova a nghawng? AUDIO chu chhuahin lo en ve ula, a nih loh leh Exodus 3:1-10 chhiar ang che u. Tichuan, a hnuaia zawhnate hi sawiho vang che u.

AUDIO: Jehova’n An Hrehawm Tawrhna A Tawrhpui (2:45)

He thu hian Jehova’n mihringte hrehawm tawrhna a tawrhpui dân eng nge a hrilh che?—Châng 7 leh 8 en rawh.
Jehova’n mihringte a ṭanpui duhin, a ṭanpui theih i ring em? Engvângin nge?

7. Thil siamte chuan Jehova miziate an lantîr

Jehova’n a miziate chu a thil siamte aṭangin a lantîr a. VIDEO chu chhuah rawh. Tichuan, Rom 1:20 chhiarin, a hnuaia zawhna hi sawiho vang che u.