XNAQʼTZBʼIL 07
¿Tzeʼnxix te Jehová?
¿Tiʼ in nul toj twiʼya aj t-ximana tiʼj Jehová? ¿In kubʼpe t-ximana qa nimxix toklen pero najchaq taʼ tiʼja ik tzeʼn qe cheʼw ateʼ twitz kyaʼj? ¿In kubʼpe t-ximana qa nim tipumal Jehová ik tzeʼn jun qʼankyoq, pero mintiʼ qe tmod? ¿Tzeʼnxix te Jehová? Toj Biblia in tzaj tqʼamaʼn Jehová qe alkyeqe tmod ateʼ ex qa in ximen tiʼj teyele junjun qe.
1. ¿Tiquʼn mintiʼ in nok qqʼoʼn qwitz tiʼj Dios?
«Ate Dios [jun] Xewbʼaj» (Juan 4:24). Mintiʼ te Jehová t-xmilal ik tzeʼn kye xjal. Jun xewbʼaj te ex atz in nanqʼin toj kyaʼj.
2. ¿Alkye junjun tmod Jehová at?
Mintiʼ in nok qqʼoʼn qwitz tiʼj Jehová, pero aj tel qnikʼ kyiʼj tbʼanel tmod, in nonin jlu qiʼj tuʼn tok qkʼujlaʼn ex tuʼn tok qqʼoʼn ik tzeʼn jun xjal. In tzaj tqʼamaʼn Tyol Dios jlu: «In tzalaj Qman qiʼj qa in qbʼinchaʼn ju tzʼaqlxix, ex mintiʼ in che kyaj tkolin qeju waʼlxix tuj kyokslabʼl» (Salmo 37:28). Ax ikx in tzaj «qʼaqʼan tkʼuʼj ex in tzʼeʼy tkʼuʼj qiʼj», mas kyiʼj qe xjal in tzaj yajbʼil kyiʼj (Santiago 5:11). «Niqayin taʼ Qman tuʼn kyklet qe xjal ma tzʼok taʼw bʼis tiʼj kykʼuʼj ex mintiʼtl jatum tuʼn tok qeʼ kykʼuʼj» (Salmo 34:18). ¿Ojtzqiʼnpe tuʼna qa jaku tzalaj tanmi Jehová tuʼn tbʼinchbʼena moqa jaku tzaj tbʼis? Tuʼntzunju aj tkubʼ tbʼinchaʼn jun xjal jun il, in tzaj tbʼis Jehová tuʼn (Salmo 78:40, 41). Qatzun in kubʼ tbʼinchaʼn aju bʼaʼn, nimxix in tzalaj tanmi tuʼn (uʼjinktza Proverbios 27:11).
3. ¿Alkye tten in kubʼ tyekʼin Jehová qa kʼujlaʼn qoʼ tuʼn?
Aju tmod Jehová mas nim toklen atzun kʼujlabʼil. Ex in tzaj tqʼamaʼn Xjan Uʼj jlu: «Ate Dios at tkʼujlalil» (1 Juan 4:8). In kubʼ tyekʼin Jehová tkʼujlabʼil qiʼj aj ttzaj tqʼoʼn Tyol qe ex aj ttzaj tqʼoʼn tkyaqilju at tajbʼen qe tuʼn qanqʼin (uʼjinktza Hechos 14:17). Tbʼanelxix tzeʼn o qo kubʼ tbʼinchaʼn. Tuʼntzunju, jaku tzʼok qqʼoʼn qwitz kyiʼj color, jaku qo tzalaj kyiʼj bʼitz ex jaku qo waʼn kyiʼj tbʼanel wabʼj. Taj Jehová tuʼn qtzalaj kyiʼj kykyaqil tiʼchaq lu.
QO JYON MAS TQANIL
Qo xnaqʼtzan tiʼj tiʼ in najbʼen tuʼn Jehová tuʼn kybʼant tbʼanel tiʼchaq tuʼn. Ex kʼelel qnikʼ tiʼj tzeʼn in kubʼ tyekʼin tbʼanel tmod qukʼil.
4. Aju xewbʼaj xjan: atzun tipumal Dios
Aj qaqʼunan in che ajbʼen qqʼabʼ, atzunte Jehová in najbʼen xewbʼaj xjan tuʼn. In tzaj tqʼamaʼn Tyol Dios qa nya jun xjal xewbʼaj xjan, sino atzun tipumal Dios ex in najbʼen tuʼn tuʼn tbʼant tkyaqil. Kyuʼjinktze Lucas 11:13 ex Hechos 2:17, ex che yoline kyiʼj xjel lu:
-
In tzaj tqʼoʼn Dios xewbʼaj xjan kye qeju in xi kyqanin te. ¿In kubʼpe t-ximana qa jun xjal xewbʼaj xjan moqa tipumal Dios? ¿Tiquʼn in kubʼ t-ximana jlu?
In najbʼen xewbʼaj xjan tuʼn Jehová tuʼn kybʼant qe tbʼanel tiʼchaq tuʼn. Kyuʼjinktze Salmo 33:6 ex 2 Pedro 1:20 ex 21, ex che yoline tiʼj xjel lu:
-
¿Tzeʼn o tzʼajbʼen xewbʼaj xjan tuʼn Jehová?
5. Ateʼ tbʼanel tmod Jehová
Maske kukx ajbʼen Moisés te Dios, ok tilil tuʼn tuʼn tok tojtzqiʼnxix. Tuʼntzunju, xi tqʼamaʼn Moisés jlu te: «In chin kubʼsane twitza tuʼn ttzaj tyekʼuna tbʼeya weye, tuʼntzun tel nnikʼe tiʼja» (Éxodo 33:13). Tzaj ttzaqʼweʼn Jehová tnaʼj Dios Moisés ex xi tqʼamaʼn junjun tmod te. Kyuʼjinktze Éxodo 34:4 a 6 ex che yoline kyiʼj xjel lu:
-
¿Alkyeqe tmod Jehová xi tqʼamaʼn te Moisés?
-
¿Alkye junjun tmod Jehová mas tbʼanel in nela toj twitza?
6. In ximen Jehová kyiʼj xjal
E ok aj Israel te majen toj tnam Egipto ex ok bʼinchaʼn nim nya bʼaʼn kyiʼj. ¿Tiʼtzun kubʼ tnaʼn Jehová tej tok tqʼoʼn twitz tiʼj jlu? Jaku tzʼok kybʼiʼne AUDIO ex che lepeʼke tiʼj, moqa kyuʼjinktze Éxodo 3:1 a 10 ex che yoline kyiʼj xjel lu:
-
¿Tiʼ in tzaj tyekʼin txʼolbʼabʼil lu teya tiʼjju in kubʼ tnaʼn Jehová aj tok bʼinchaʼn nya bʼaʼn kyiʼj xjal? (Kyqʼonke kywitze tiʼj versículo 7 ex 8).
-
¿In kubʼpe t-ximana qa taj Jehová tuʼn tonin kyiʼj xjal? ¿Jakupe bʼant jlu tuʼn? ¿Tiquʼn in kubʼ t-ximana jlu?
7. Kyiʼj tbʼinchbʼen Jehová in nel qnikʼ kyiʼj tmod
In nel qnikʼ kyiʼj tbʼanel tmod Jehová tiʼj tkyaqilju o bʼant tuʼn. Kyqʼonke kywitze tiʼj VIDEO. Yajxitl kyuʼjinktze Romanos 1:20 ex che yoline tiʼj xjel lu:
-
Aj tok tqʼoʼna twitza kyiʼj tbʼinchbʼen Jehová, ¿alkyeqe tmod in nel tnikʼa tiʼj?
AJU IN TZAJ KYQʼAMAʼN JUNJUN XJAL: «Mlayx tzʼel qnikʼ tiʼj Dios tuʼnju nya qʼanchaʼl».
-
¿Tiʼ teya t-ximbʼetz tiʼj?
-
¿Tiquʼn in kubʼ t-ximana jlu?
TOJ CHʼIN YOL
Jun xewbʼaj te Jehová ex mlay tzʼok qqʼoʼn qwitz tiʼj. Ax ikx ateʼ tbʼanel tmod, ik tzeʼn tkʼujlabʼil.
Aju ma qo yolin tiʼj
-
¿Tiquʼn mlay tzʼok qkeʼyin Jehová?
-
¿Tiʼ aju xewbʼaj xjan?
-
¿Alkye junjun tmod Jehová at?
OJTZQINKA CHʼINTL
Jaku tzʼel mas tnikʼa tiʼj Jehová aj t-xnaqʼtzana tiʼj kyaje tmod mas nim kyoklen.
Ojtzqinka tiquʼn in xi qqʼamaʼn qa nya at Jehová kyoj kykyaqil lugar.
Ojtzqinka tiquʼn in tzaj tqʼamaʼn Biblia qa ik xewbʼaj xjan ik tzeʼn qe tqʼabʼ Dios.
Bʼaʼn tuʼn tok tojtzqiʼna tiquʼn kwest ela toj twitz jun xjal moẍ tuʼn t-xi tnimen qa in ximen Dios tiʼj ex tiquʼn chʼexpaj t-ximbʼetz.
«Jaʼlo jaku chin onine kyiʼj txqantl» (Xnaqʼtzbʼil toj uʼj Xqʼuqil)
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
