LEKSION 07

¿Pënën Jyobaa ets wiˈix jyaˈayˈaty?

WINʼIX TI AYUK

¿Wiˈix mijts xypyawinmayë Jyobaa? ¿Mbawinmaapy ko yëˈë tuˈugë Dios mëdiˈibë yajpatp jantsy jagam extëm tuˈugë mëtsäˈä? ¿O mbawinmaapy ko yëˈë tuˈugë Dios mëdiˈibë jantsy kumëjääw jeˈeyë ko kyaj ti tjawë? ¿Wiˈixë Jyobaa jyaˈayˈaty? Mä yˈAyuk xytyuknijäˈäwëm wiˈix jyaˈayˈaty ets ko xymyëmäˈäy xymyëdäjëm.

1. ¿Tiko kyaj mbäät nˈijxëmë Dios?

‘Dios käˈäp yaˈixy’ (Juan 4:24, TY). Jyobaa kyaj tmëdatyë nyiniˈkx kyëbäjk extëm ëtsäjtëm. Kyaj mbäät nˈijxëm ets mä jam tsyëënë kyaj nanduˈun yaˈixy.

2. ¿Wiˈixë Jyobaa jyaˈayˈaty?

Jyobaa kyaj mbäät nˈijxëm, per ko nˈixyˈäjtëm, ta nmëwingoˈonëm mët ko jantsy oy jyaˈayˈaty. Biiblyë jyënaˈany ko Jyobaa ‘yëˈë xëmë tsyojkypyë mëdëybyë etsë oybyë, käˈäp nijënäˈä tˈëxmatsy mëdiˈibë oy mëduunëbën’ (Salmo 37:28, TY). Yëˈë tsojkp ets paˈˈayoop, ets niˈigyë duˈun jyaˈayˈaty mët pënaty ayoowdëp (Santya̱ˈa̱gʉ 5:11). “Wingonë Jyobaa yajpääty mä pënaty jyäˈäwëdëp ja jyot kyorasoon amäˈäts tukmäˈätsë; yaˈˈawäˈätspëtsëëmpy pënaty mëk mon mëk tuk yajpattëp” (Salmo 34:18). ¿Mnijäˈäwëbë nety ko ti ëtsäjtëm nduˈunëm mbäädë Jyobaa jotkujk yajnayjyawëty o yajmay yajtäjˈyëty? Ko nduˈunëm mëdiˈibë kyaj yˈoyëty, axëëk yajnayjyawëty ets yajmoon yajtujkëp (Salmo 78:40, 41). Per ko nduˈunëm mëdiˈibë oy, ta agujk jotkujk yajnayjyawëty (käjpxë Proverbios 27:11).

3. ¿Wiˈixë Jyobaa xytyukˈijxëm ko xytsyojkëm?

Mëdiˈibë Jyobaa mas niˈigyë yajnigëxëˈkypy, yëˈë tsojkën. Biiblyë jyënaˈany ko “Dios yëˈë dëˈën ja tsojkën” (1 Fwank 4:8). Jyobaa xytyukˈijxëm ko xytsyojkëm ko të xymyoˈoyëmë Biiblyë ets ko tijaty të dyajkojtäˈäy (käjpxë Apostʉlʉty o Hechos 14:17). Okwinmay wiˈix ojts xyajkojëm, ojts dyajkojˈyë wiin parë mbäät nˈijxëm këxy kaˈpxyë koloor, tatsk parë nmëdoˈowëmë ëy yaˈaxy etsë ääw parë ndukxondakëm o njaygyajpëm ja jëˈxy pëky mëdiˈibë wiˈixëmë jyäˈäwën. Jyobaa tsyojkypy ets ndukxondakëmë jukyˈäjtën.

AK NIJAWË NIˈIGYË

Min nˈokˈijxëm ti Jyobaa yajtuumpy parë ttuny tijaty mëjwiin kajaa, ets ok ta net nimaytyakëm wiˈix jyaˈayˈaty.

4. Espiritë santë yëˈë ja mëjääw mëdiˈibë Dios yajtuumpy

Duˈun extëm ëtsäjtëm nyajtuˈunëmë këˈë parë tijaty nduˈunëm, nanduˈunë Jyobaa, yëˈë yajtuumbyë yäˈädë myëjääw parë tijaty ttuny. Mä Biiblyë kyaj mä jyënaˈany ko espiritë santë yëˈëjëty tuˈugë dios, yëˈëjën ja Diosë myëjääw mëdiˈibë tijaty tyuktuundaapy. Käjpxtë Lukʉs 11:13 etsë Hechos 2:17, TNM ets nimaytyäˈäktë mëdiˈibë yä yajtëëpy:

Dios myoˈoyaambyë espiritë santë pënaty amdoowëdëp. Pääty, wiˈix mˈokwinmay, ¿yëˈëdaa espiritë santë tuˈugë jäˈäy o Diosë myëjääw? ¿Ets tiko duˈun mwinmay?

Jyobaa yajtuumbyë yäˈädë myëjääw parë tijaty ttuny mëdiˈibë mëjwiin kajaa. Käjpxtë Salmo 33:6 etsë 2 Peedrʉ 1:20, 21, ets nimaytyäˈäktë mëdiˈibë yä yajtëëpy:

¿Wixatyë Jyobaa të dyajtunyë myëjääw?

5. Nmëwingonäˈänëmë Jyobaa mët ko jantsy oy jyaˈayˈaty

Moisés kanäk jëmëjtë nety kujk tmëdunyë Dios, per duˈunyëm tˈixyˈäjtˈadëˈëtsany. Pääty tˈanmääy: “Tukniˈˈijxëgëts ja mnëˈë nduˈu parë nˈixyˈatët” (Éxodo 33:13). Jyobaa ta ttukˈawäˈänë Moisés wiˈix yëˈë jyaˈayˈaty. Käjpxtë Éxodo 34:4-6 ets nimaytyäˈäktë mëdiˈibë yä yajtëëpy:

¿Wiˈixë Jyobaa nyaynyimaytyakë jyaˈayˈaty?
Ets mijts, ¿ti niˈigyë Jyobaa mdukˈoyˈijxypy extëm jyaˈayˈaty?

6. Jyobaa xymyëmäˈäy xymyëdäjëm

Dios myëdäjt tuˈugë kyäjpn mëdiˈibë yajtijtë israelitëty ets yajtuumbëˈäjt yajmosëˈäjttë jap Egipto. ¿Wiˈixë Jyobaa nyayjyäˈäwë ko ja kyäjpn tˈijxˈayooy? Mëdoowˈittë GRABASYONK ets paˈixtë, o käjpxtë Éxodo 3:1-10. Ta net xynyimaytyäˈäktët mëdiˈibë yä yajtëëpy:

GRABASYONK: Jyobaa mëk tjäˈäwë ko tˈijxˈayooy ja nyax kyäjpn (2:45)

Extëm jyënaˈanyë yäˈädë tekstë, ¿wiˈixë Jyobaa nyayjyawëty ko tˈijxˈayoyë jäˈäy? (Ixtë bersikulo 7 etsë 8).
Wiˈix mˈokwinmay, ¿jyantsy pyudëkëyaambyëdaa Jyobaa naxwinyëdë jäˈäy? ¿Mbäädëdaa duˈun ttuny? ¿Ets tiko duˈun mwinmay?

7. Ko nˈijxëm tijatyë Jyobaa të dyajkojy, ta nbëjkëmë kuentë wiˈix jyaˈayˈaty

Jyobaa xytyuknijäˈäwëm wiˈix yëˈë jyaˈayˈaty ko nˈijxëm tijaty të dyajkojy. Ixtë BIDEO. Ta net xykyäjpxtëdë Romanʉs 1:20 ets xynyimaytyäˈäktët mëdiˈibë yä yajtëëpy: