MPANTTA 07

Muncuwele sana-saana Yehova

TOCAR

Woonela winyu, Yehova ri cani? Niireke nyuuva nnomoona ukhala Nluku rina ikuru cinci, masi ciicammo ri uttayi ni nyuuva khampa itthonttwa cimphwanyannya wiirimu? Awula nyuuva nnomoona wiira khanahimwe ntthu, masi ikhanle ikuru imphwanyannya va watuninyani va, khampa itari? Masi khweeliini Yehova ri cani? Ibiiblya inaanittonkacera makhalelo arinaawe Nluku. Ciicammo, iyo ineera wiira Nluku nawuuwacerani nyuuva.

1. Kontha isiyani khaninkhitiri umoona Nluku?

Ibiiblya nhina ilivuru ya Joau 4:24 ineera: “Nluku nnepa.” Yehova kharina irutthu toko irineehu hiiva. Uyo nnepa ni nokhala wiirimu, nipuro hiiva nihinkhitiriihu woona.

2. Makhaleloni Yehova arinaawe?

Khweeliini, hiiva khaninkhitiri umoona Yehova. Masi neetthucaka myaha cawe, ninawoonenela wiira uyo khanle ntthu okhweeli ni rina makhalelo omaana. Ibiiblya ineera wiira Yehova “uncivela isariya ni uyova khanaanyanyala ale anontthunela.” (Isaalimu 37:28) Uyo ciicammo “naathoonyera venci uthunku ni uyo nakiriri.” Nimoolumacero makhwaawe, uyo naawoonela ikiriri atthu, venci-venci ale anhuva. (Tiyaku 5:11) “Yehova ri wakhiviru ni ale arina nrima wooriipiya; uyo naawoopola ale ari ni masukhuli.” (Isaalimu 34:18, niwehero) Ni mwancuwela wiira citthu cimpankeehu pooti untteeliha awula unriipiha nrima Yehova? Manannani? Ntthu apankaka citthu cootakhala, Yehova naariipiya nrima ni naanyoonyiya. (Isaalimu 78:40, 41) Masi Yehova nokhala ootteeliya nrima ntthuuyo apankaka citthu comaana.—Nsome Miruku 27:11.

3. Manannani Yehova cinthoonyiheraawe wiira naanifenta?

Ikhalelo yootepa uverihela ya Yehova nikhanle nifento. Khweeliini, Ibiiblya ineera wiira “Nluku ninfento.” (1 Joau 4:8) Yehova nothoonyihera wiira naanifenta kahi paahi mbiiblyani, masi ciicammo nhina wo citthu cumpilyaawe. (Nsome Miteko 14:17.) Wootakihera, moone mananna cinumpilyaawe. Uyo numpile ni mananna wankhitiriihu woona ikoore comaana, uviriyana macipo omaana ni ciicammo ulya icoolya coociva. Uyo nopheela wiira hiiva nitteeliye cinene.

MUNCERERE WIITTHUCA WINYU

Moone isiyani invarelaawe nteko Yehova wiira apanke citthu cootikhiniha. Ciicammo, moone mananna cinnithoonyiheraawe makhalelo arinaawe.

4. Nnepa wowaarya ikhanle ikuru ya Nluku

Woopanka itthu, hiiva ninvarelaka nteko matateehu. Vano Yehova isiyani invarelaawe nteko? Uyo novarelaka nteko nnepaawe wowaarya. Ahaavo aneera wiira Nluku phiri nnepa wowaarya. Masi Ibiiblya ineera wiira nnepa wowaarya ikhanle ikuru invarelaawe nteko Nluku wiira apanke ile impheelaawe. Nsome Luka 11:13 ni Miteko 2:17. Mwamalihaka usoma, moopele mwaha ala makohwaala:

Mbiiblyani wiiriye wiira Nluku naahala ‘waamwarusela’ nnepaawe wowaarya ale anonlepela. Vano woonela winyu, Nluku phiri nnepa wowaarya awula nnepa wowaarya ikhanle ikuru ya Nluku? Kontha isiyani nneereenyu commo?

Wiira Yehova apanke citthu cootikhiniha, novarela nteko nnepaawe wowaarya. Nsome Isaalimu 33:6 ni 2 Peturu 1:20, 21. Mwamalihaka usoma, moopele mwaha nna nikohonna:

Khalayi, manannani Yehova caavarenlyaawe nteko nnepaawe wowaarya?

5. Yehova haana makhalelo omaana

Moocesi aari nlopwana aamwiiwelela Nluku. Uhookhalaru commo, uyo ampheela uncuweleeha sana-saana Mumpiihu. Phimaana, uyo ahomwiirela Yehova co: “Ukicuwelihe iphiro caa, wiira miiva kuucuwele.” (Nkwaha 33:13) Vano, Yehova ahonhimyacera Moocesi makhalelo uyova arinaawe. Nsome Nkwaha 34:4-6, ni mwamalihaka usoma, moopele mwaha ala makohwaala:

Makhaleloni arinaawe Yehova yanhimyacenryaawe Moocesi?
Makhaleloni arinaawe Yehova antepa wuucivelani?

6. Yehova nawaawacera atthu

Khalayi, maheperewu yaari apoovu a Nluku ni ayo yahokhala ipottha ilapo yo Iciipitu. Yehova aakhanle cani uwoona wawe apoovwaawe yahuvaka? Munviriyane AWUDIYU awula nsome Nkwaha 3:1-10, ni mwamalihaka, moopele mwaha ala makohwaala:

AWUDIYU: Yehova anwacera uhuvihaciya waya (2:45)

Yehova nokhala cani awoonaka atthu yahuvaka?—Nwehe iveerusu 7 ni 8.
Woonela winyu, niireke khweeliini Yehova naapheela waakavihera apinaatamu ni haana ikuru yoopanka iyo? Kontha isiyani nneereenyu commo?

7. Citthu cimphwanyannya watuninyani cinaanikavihera ucuwela makhalelo arinaawe Yehova

Yehova naahimyaca makhalelo arinaawe, nhina wo citthu cumpilyaawe. Moone IVIDIYU, mwamalihaka woona, nsome Arooma 1:20, ni moopele mwaha nna nikohonna: