KATAK 07
Kain Anij Rot Jeova?
Ñe kwõj l̦õmn̦ak kõn Jeova Anij, ta eo ejiktok ilo l̦õmn̦ak eo am̦? Kwõj ke l̦õmn̦ak bwe joñan an Jeova utiej elukkuun ettol̦o̦k jãn kwe im kwõjjab maroñ epaake e, ãinwõt an iju ko ettol̦o̦k? Ak kwõj ke pijaikl̦o̦k juon eo me el̦ap an kajoor bõtab ejjel̦o̦k kadkad ko ippãn ãinwõt juon armej? Kõn men in, kain Anij rot Jeova? Ikijjeen Naan eo an, Baibõl̦ eo, Jeova ej kwal̦o̦k jet iaan kadkad ko an, ekoba an itoklimo im kea kake kwe.
1. Etke jejjab maroñ loe Anij?
“Anij ej juon Jetõb.” (Jon 4:24) Eoktak ãnbwinnin Jeova jãn kõj armej. Ej juon jetõb im ej pãd ilañ, juon jikin jejjab maroñ loe.
2. Ta jet iaan kadkad ko kadkadin Jeova?
Meñe jejjab maroñ loe Jeova, ak ñe jej kajjioñ jel̦ã kajjien jenaaj lo bwe ej juon eo em̦ool an pãd im mour, im ewõr kadkad ko rem̦m̦an ippãn me rej kõm̦m̦an ad kõn̦aan epaake e. Baibõl̦ ej ba: “Jeova ej yokwe ekajet jim̦we, im ejjab ilo̦k jãn ro rem̦m̦an An” ak ri-karejar ro an retiljek. (Sam 37:28) Ej bareinwõt juon eo me “elukkuun l̦ap an yokwe im etũriam̦o,” el̦aptata ñan ro rej eñtaan. (Jemes 5:11) “Jeova ej epaak ñan ro erup bũrueer, im Ej lo̦mo̦o̦ren ro rettã wõt ilo aer” ak ro rebbweer. (Sam 34:18) Bareinwõt kwaar ke jel̦ã bwe kõm̦m̦an ko ad rej jelõte Jeova? Ñe juon armej ej kããlõt ñan kõm̦m̦ani men ko renana, men in ej kabũrom̦õje. (Sam 78:40, 41) Bõtab armej eo me ej kõm̦m̦ani men ko rem̦m̦an im rejim̦we ej kam̦õn̦õn̦õiki.—Riit Jabõn Kõnnaan 27:11.
3. Ewi wãween an Jeova kaalikkar bwe ej yokwe kõj?
Kadkad eo em̦m̦antata an Jeova ej yokwe. Ilo m̦ool ‘Anij yokwe.’ (1 Jon 4:8) Jeova ejjab kwal̦o̦k wõt yokwe eo an ikijjeen Baibõl̦ eo, ak ej bar kwal̦o̦ke ikijjeen menin kõm̦anm̦an ko an. (Riit Jerbal 14:17.) Ñan waanjoñak, l̦õmn̦ak kõn wãween an kar kõm̦anm̦an kõj. Ear letok ñan kõj maroñ eo ñan lo kõl̦ar ko raiboojoj, roñjake kõjañjañ ak al ko remmejaja, im edjoñ m̦õñã ko renno̦. Ekõn̦aan bwe jen lo m̦õn̦õn̦õ ilo mour ko ad.
KAM̦WILAL̦L̦O̦K AM̦ MEL̦EL̦E
Katak kõn ta eo Jeova ej kõjerbale ñan kõm̦m̦ani men ko rekabwilõñlõñ. Innem lale ewi wãween an Jeova kwal̦o̦k ñan kõj kadkad ko an raiboojoj.
4. Jetõb kwõjarjar—Kajoor eo an Anij me ej jerbal
Ãinwõt ad kõjerbale peid ñan kõm̦m̦ani jerbal ko, ilo ejja wãween in wõt Jeova ej kõjerbale jetõb kwõjarjar eo an ñan katõprak jerbal ko an. Baibõl̦ eo ej kaalikkar bwe jetõb kwõjarjar ejjab juon anij, ak ej kajoor eo me Jeova ej kõjerbale ñan kõm̦m̦ani jerbal ko an. Riit Luk 11:13 im Jerbal 2:17, innem bwebwenato kake kajjitõk kein:
-
Anij enaaj “lutõkl̦o̦k” jetõb kwõjarjar eo an ioon ro rej kajjitõk kake. Innem kwõl̦ak lale jetõb kwõjarjar ej ke juon anij ak ej ke kajoor eo an Anij me ej jerbal? Etke kwõj ba men in?
Jeova ej kõjerbale jetõb kwõjarjar eo an ñan kõm̦m̦ani men ko rekabwilõñlõñ. Riit Sam 104:30 im 2 Piter 1:20, 21, innem bwebwenato kake kajjitõk in:
-
Ta jet iaan wãween ko me Jeova ear kõjerbale jetõb kwõjarjar eo an ie?
5. Kadkad ko rem̦m̦an kadkadin Jeova rej kãitoklimoik kõj
Moses ear juon ri-karejeran Anij etiljek, meñe ãindein ak ear kõn̦aan kal̦apl̦o̦k an jel̦ã kajjien ri-Kõm̦anm̦an eo an. Kõn men in Moses ear ba ñan Jeova: “Kwõn kwal̦o̦k ñan eõ ial̦ ko Am̦, bwe in jel̦ã kake Kwe.” (Exodus 33:13) Jeova ear uwaake Moses im kwal̦o̦k ñane jet iaan kadkad ko kadkadin. Riit Exodus 34:4-6, UBS, innem bwebwenato kake kajjitõk kein:
-
Ta kadkad ko kadkadin Jeova me ear kwal̦o̦k ñan Moses?
-
Kadkad ta ko rem̦m̦an ippam̦ kõn Jeova?
6. Jeova ej kea kake armej
Armej ro an Anij ilo iien ko etto, ak ri-Hibru ro, rar ri-kõm̦akoko ilo Ijipt. Ewi wãween an kar Jeova eñjake kõn an kar armej ro an iioon eñtaan? Kõjoe AUDIO eo im l̦oore aer riit, ak kwõmaroñ riit Exodus 3:1-10. Innem bwebwenato kake kajjitõk kein:
-
Ta eo bwebwenato in ej kwal̦o̦k kõn wãween an Jeova eñjake ñe armej ro rej iioon eñtaan?—Lale eoon 7 im 8.
-
Kwõl̦ak lale Jeova elukkuun ke kõn̦aan jipañ armej, im ewõr ke an maroñ ñan jipañ er? Etke kwõj ba men in?
7. Menin kõm̦anm̦an ko rej kwal̦o̦k kõn kadkad ko an Jeova
Jeova ej kwal̦o̦k kadkad ko an ikijjeen menin kõm̦anm̦an ko an. Kõjo̦e PIJAIN ALWÕJ eo. Innem riit Rom 1:20, im bwebwenato kake kajjitõk in:
-
Ta kadkad ko an Jeova kwõj loi ilo men ko ear kõm̦anm̦ani?
JET ARMEJ REJ BA: “Kõnke jejjab maroñ loe Anij jejjab maroñ jel̦ã kajjien.”
-
Ta am̦ l̦õmn̦ak?
-
Etke kwõj ba men in?
TARLEP IN KATAK EO ILO TUKADU
Jeova ej juon jetõb jejjab maroñ loe im elõñ kadkad ko ippãn relukkuun em̦m̦an, el̦aptata yokwe.
Ãlij
-
Etke jejjab maroñ loe Jeova?
-
Ta in jetõb kwõjarjar?
-
Ta jet iaan kadkad ko kadkadin Jeova?
KAL̦APL̦O̦K AM̦ MEL̦EL̦E
Kam̦wilal̦l̦o̦k am̦ jel̦ã kõn Jeova ilo am̦ katak kõn emãn iaan kadkad ko an rel̦l̦ap.
L̦õmn̦ak kõn kein kam̦ool ko me rej kaalikkar bwe Jeova ejjab pãd ilo men otemjej.
Lale etke Baibõl̦ eo ej ba bwe jetõb kwõjarjar ej ãinwõt pein Anij.
Juon em̦m̦aan me epilo ear pen an tõmak bwe Anij ej kea kake e. Lale ta eo ear kõm̦m̦an bwe en ukot an l̦õmn̦ak.
“Ij Kab Kiiõ Kile bwe Imaroñ Jipañ ro Jet” (Naan in Keeañ, Nobõm̦ba 2015)
